Malango 2 - Amazwi Yakwe Leza 2013

¹ “Mukusyalikizya tusuka tusenuka nga itutenuka kulungama ku lwanga, tupita umu nzila iyaya kuli Yemba Muyenzu, wakwe vino Yawe wapeezile ilamulo. Nupya twasumvile insita tula tukululumba mu mpanga ya myamba ya Edomu.

² “Lyene Yawe anena ukuti

³ twatitululumba ku na ku mu mpanga ii ya myamba pa nsita ntali ilingane, nu kuti ndakai tulinzile kulungama ku katutu.

⁴ Wene wanenyile ukumupeela amalamulo yaa, akuti, ‘Mwasya mupite ukusalala impanga ya myamba yamu Edomu, impanga ya anyonko, amu mupanda wakwe Esau. Yene yamauvwanga intete zya pali mwemwe.

⁵ Lelo mutalinzile ukuyasonka kuti mutandike ukulwa inkondo nayo, pamulandu wakuti intalamupeela impanga yao, nanti akacipande akalingine ukulyata sile ulwazo lwinu. Natimpeela impanga ya myamba ya Seili ku amu mupanda wakwe Esau.

⁶ Ivyakulya vyao pamwi na manzi vyene mungakala.’

⁷ “Mwiusye vyonsi vino Yawe wamupolelela mu milimo inu yonsi. Wene wamusakamalanga nu kumuwaka lilyo lyonsi lino mwalulumbanga mu lwanga ulutaikulila. Apa myaka ii yonsi amakumi yani Yawe wali namwe, nupya mutulilwanga icintu nanti cimwi.

⁸ “Acino itupitilizya ulwendo lwitu ukupuzya impanga ya Seili, itusya umuseo uwafuma mu Eloti na Ezioni Gebeli, nu kulungama kuli Yemba wa Musilya, nga tusenukila lwaku katutu itulungama nu museo uwamu lwanga uwaku Moabu.

⁹ Alino lyene Yawe wanenyile ati, ‘Mutezya ukucuzya aina Moabu, amu mupanda wakwe Loti, nanti ukuyasonka kuti mukatusye inkondo mulwe nayo. Yene nayapeela umusumba wa Ali, nupya ntalamupeela impanga yao ili yonsi.’ ”

¹⁰ (Apa mpiti aikalanga mu musumba wa Ali aina Emimu, ivi yantu ivituuluke ivyali umutundu uwamaka cuze. Yali ivipombolo wa ina Anaki, umutundu uze uwa vipombolo.

¹¹ Wa ina Anaki, aina Emimu nayo kwene yayamanga ukuti aina Lefaimu. Lelo aina Moabu yene yamanga aina Lefaimu yati aina Emimu.

¹² Aina Holi yikalanga mu Edomu, lelo amu mupanda wakwe Esau yayazinzile mwenemo, iyonona uluko lwao, nga aisikulu yikala mwenemo, wakwe vino aina Izlaeli yazinzile anisi yao mu mpanga ino Yawe wayapezile.)

¹³ “Alino lyene itulamba Luzi lwa Zeledi wakwe vino Yawe watunenyile ukucita.

¹⁴ Ukutandikila pano twakatukile ku Kadesyi Banea ukwizafika na pano twalambile Luzi lwa Zeledi, papisile imyaka amakumi yatatu na cinani. Lilyo ala asilika yonsi yafwa, wakwe vino Yawe walafile kunoyali.

¹⁵ Yawe umwisikulu uwayazulwile mpaka aleka kuti yonsi pyu yasile mu kufwa.

¹⁶ “Pacisila lino yonsi yatiyafwa,

¹⁷ Yawe watunenyile ati,

¹⁸ ‘Ilelo mumapita musalale mu mpanga ya ina Moabu, mulondele umuseo uno walungama ku Ali.

¹⁹ Lino mwapalamila ku mpanga ya ina Amoni, mutaca mwezye ukuyacuzya nanti ukuyakatusizya inkondo, pamulandu wakuti mwemo ntalamupeela icipande ca mpanga ino nayapeela.’ ”

²⁰ (Impanga ii nayo kwene yamanyika wa mpanga ya Lefaimu, izina lya antu aikalanga kweneko. Aina Amoni yamanga aina Lefaimu yati Zamuzumimu.

²¹ Yene yali ivipombolo wa ina Anaki. Yali avule cuze nupya yali amaka. Lelo Yawe wayononyile, pakuti aina Amoni yapoke impanga yao nu kwikala mwenemo.

²² Yawe wacisile icili cimwi ku ina Edomu, amu mupanda wakwe Esau, yano yatenzi mu mpanga ya myamba ya Edomu. Wene wononyile aina Holi, pakuti aina Edomu yapoke impanga yao nu kwikala mwenemo, muno yacili ikala ukufika na pilelo.

²³ Kulanda pa ina Aavi, yano yatenzi mu misumba yonsi mpaka ukufika nu ku Gaza, impanga yao yaposilwe na ina Kafitoli afumile ku Kafitoli, yayo ayakomile nu kwikala mu mpanga yao.)

²⁴ “Pacisila cakupita ukusalala mu mpanga ya Moabu, Yawe watunenyile ati, ‘Lyene tenukini nga mulambe Luzi lwa Alinoni. Namapeela mu makasa inu Siooni umwina Amoli, umwene waku Hesyiboni, kumwi ni mpanga yakwe. Yangini mukamuzanze mupoke impanga yakwe mwikale mwenemo.

²⁵ Ukutandikila sile ilelo kwene ne Yawe namaleka kuti antu konsikonsi yaoopa mwemwe. Antu yonsi yalazakaza ku ntete pa kuvwa izina linu.’

Aina Izlaeli yacimvya umwene Siooni

²⁶ “Lyene natumile inkombe ukufuma ku lwanga lwa Kedemoti kuti ziye kuli Siooni umwene waku Hesyiboni, ku kuyamunena amazwi amutende akuti,

²⁷ ‘Tuzumilizye ukupita ukusalala mu mpanga inu. Tumalondela sile inzila ukwaula kupaaluka.

²⁸ Ivyakulya vino tumalyanga na manzi yano tumamwanga tumakalanga sweisikulu. Cino swemo tukulonda sile ukupita ukusalala mu mpanga yako,

²⁹ suka tuce tulambe nu Luzi lwa Yodani, twingile nu mpanga ino Yawe akupeela kunotuli. Amu mupanda wakwe Esau, yano yakaikala mu Edomu, na aina Moabu, yano yakaikala mu Ali, yene yatuzumilizye ukupita mu mpanga yao.’

³⁰ “Lelo Siooni umwene waku Hesyiboni atatuzumilizye ukupita ukusalala mu mpanga yakwe. Yawe Leza winu walenzile umwenzo wakwe uumalale nu kutalama pakuti amupeele mu makasa itu kuti tumucimvye nu kupoka impanga yakwe, ino napilelo tucili tukwikala mwenemo.

³¹ “Lyene Yawe anena ati, ‘Lola, vino natintazyela umwene Siooni kumwi ni mpanga yakwe. Tolini impanga yakwe nu kwikala mwenemo.’

³² Siooni na antu yakwe ali pa kwiza ku kutulwisya apipi nu musumba wa Yaazi.

³³ Lelo Yawe Leza witu amupeela mu makasa itu, nga naswe itumukoma, itukoma na ana yakwe aonsi, kumwi na asilika yakwe yonsi.

³⁴ Lilyo kwene itupokolola nu konona imisumba yakwe yonsi, nu kukoma antu onsi, aonsi, anaci, na ana kwene. Tutasile nanti wenga uwa mbezu.

³⁵ Itusampa ing'ombe ni vyuma vyonsi ivyali mu misumba ilya.

³⁶ Yawe Leza witu uwalesile kuti tungapokolola imisumba yonsi, ukutandikila ku Aloeli, mu mbali mbali ya Cifoloma ca Alinoni, ukufika nu ku musumba uwaya pakasi ka cifoloma cici, nzila yonsi ukufika nu ku Gileadi. Kusi umusumba uwakweti ilinga lino lingatuposya kukwela.

³⁷ Lelo ukulingana ni lamulo lino Yawe watupeezile, swemo tutaile ku mpanga ya ina Amoni nanti ku nkumba ya Luzi lwa Yaboki nanti ku misumba ya mpanga ya myamba nanti ku ncende yuze ili yonsi kuno wene watulesizye ukufika kweneko.