Malango 15 - Amazwi Yakwe Leza 2013

Umwaka wakwe cinimbali

¹ “Lyonsi ndi papita imyaka cinimbali muce mwasuulako ku nkongole.

² Alino umusango wakusuulila inkongole auwa uwakuti wino wensi uwakongwesya umwina Izlaeli muze impiya alinzile ukusuula kuli vino wakongwisizye. Wene atalinzile ukulifya umwina Izlaeli nanti umwina wakwe, pamulandu wakuti insita ino Yawe wasonta iya kusuula ku nkongole yatilandwa apaswe.

³ Ungalifya umwinamasi inkongole ino wakukwatila, lelo utakezye ukulifya umunyonko cino wakukongola.

⁴ “Yawe Leza winu alamupolelela mu mpanga ino akumupeela kuti iye iyakwinu. Kusi nanti wenga uwamu antu inu alaya umupina

⁵ ndi cakuti mwayela amasunde yakwe Yawe Leza winu nu mwenzo onsi nga nu kulondela ningo amalamulo yakwe yano nkumupeela apilelo.

⁶ Yawe alamupolelela wakwe muno walavile. Mulakongwesya impiya ku antu amu nko izingi, lelo mwemo mutalaazima nanti acimwi kunoyali. Mulateeka inko izingi, lelo kusi uluko ululamuteeka.

⁷ “Ndi cakuti mu musumba onga pa misumba iya mpanga ino Yawe akumupeela mwazanwa umunyonko umwina Izlaeli uwataulilwa cimwi, lyene mutakezye ukukwata ulusoko kunoli nupya mutakezye ukukana ku mwazwilizya.

⁸ Mucifulo cakwe cico, muce muye antu ya wila nu kukongwesya umwi ukulingana na vino angalonda.

⁹ Mutakezye kukana ukukongwesya umwi icintu cimwi, pamulandu wakuti umwaka wakusuula inkongole wapalama. Mutakezye ukwelenganya ukwipe ukwa musango uu kuye mu myenzo inu. Ndi cakuti mwakana ku kongwesya umunyonko, ale lyene wene alailizyanya kuli ne Yawe, nga namwe mulaya nu mulandu.

¹⁰ Mulinzile ukuya antu ya wila kunoli ukwaula ulusoko, nga Yawe alamupolelela mu milimo inu yonsi.

¹¹ Insita zyonsi kulaya aina Izlaeli apina nupya aulilwe, acino nkumupeela ilamulo kuti muye antu ya wila kunoyali.

Amasunde pa lwakusunga azya

¹² “Ndi umwina Izlaeli, umonsi nanti umwanaci, waikazya umwisikulu kunuli nu kukuombela imyaka mutanda, mu mwaka wakwe cinimbali ulinzile ukumuta aye umuntungwa.

¹³ Nga lino wamuleka waya umuntungwa, utakezye kuleka kuti apite minwe mitupu.

¹⁴ Uye umuntu wa wila kunoli nu kumupeela pa vintu vino Yawe wakupolelela ivili wa viteekwa vyako, imbezu ukufuma pa lwano lwa kupuulila, na waini.

¹⁵ Mwaiusya ukuti mwemo mwali azya mu mpanga ya Eguputo nga Yawe Leza winu wamukulwile nga imuya antungwa. Uli mulandu uno ndakai nkumupeela ilamulo lii.

¹⁶ “Lelo umuzya wako atangalonda ukupita akusye. Limwi wene angakutemwa atemwe na amu ng'anda yako nga cimuzanzye ukwikala.

¹⁷ Lyene umutwale lwa pa mulyango wa ng'anda yako nga papa kwene umutulule ikutwi, nga lyene amaya umuzya wako mpaka imfwa. Mu musango uli onga avino ucite nu ku muzya wako umwanaci.

¹⁸ Utakezye ukwelengaya ukuti cili icitale ukuta umuzya wako aye umuntungwa. Pasi pano wene wakuombela imyaka mutanda pa malipilo ukulingana na citika wa malipilo yano ukapeela uwa ncito.

Amayeli ya ng'ombe na a mfwele

¹⁹ “Mupaatwile Yawe Leza winu amayeli yonsi akalume a ng'ombe na a mfwele. Mutakezye ukuomvya iyeli lyakwe yamasaye ilya ng'ombe zinu nanti ukusenya amavumbu imfwele ili yonsi pa mfwele zii.

²⁰ Cila mwaka mwemwe pamwi na amu ng'anda zinu muce mwazifyula nu kuzilila pa manso yakwe Yawe pa ncende yonga ino wene wasolola.

²¹ Lelo ndi cakuti iciteekwa cikweti iyala limwi, nanti cikasinta nanti capafula, nanti cikweti akaulema kamwi akipisye, ale lyene kusi kucipeela impolelwa kuli Yawe Leza winu.

²² Iciteekwa ca musango uwo icakuliila sile ku ng'anda. Umuntu mukowele na asi mukowele kwene, ukulingana nu lutambi, angalya inyama iyo wakwe vino mungalya mpombo nanti impelembe.

²³ Lelo mutakezye ukulya uwazi. Mulinzile ukupongolwela uwazi pa musili wakwe vino mukaitila amanzi.”