Malango 12 - Amazwi Yakwe Leza 2013

Yasontelela aina Izlaeli incende yonga sile umwa kupepela

¹ Nga nupya Mose wavwanzile ati, “Vii, ali vyeo na masunde yano mumalondelanga mu mpanga ino Yawe Leza wa vikolwe vinu watamupeela kuti ingaya iyakwinu pa manda yonsi yano muli apuma.

² Muce monone incende zyonsi pyu, zino imitundu ino mwazana mwenemo ikapepelapo tuleza twao. Incende zyonsi izya pa myamba apapeela, izya pa twamba kumwi ni zya mwisika ya vimiti vya matesi ali yonsi.

³ Muce momolole utuvuwa twao, mutamole ni viumbili vya mawe, nu kuputola incesi zyakwe Asyela. Muputole nu tuluwi twakwe tuleza twao nu kulovya amazina yatuko mu ncende zizya.

⁴ “Mutakezye ukupepa Leza winu mu musango uno antu yayo yakapepela tuleza twao.

⁵ Muce mwapepela Leza winu pa ncende ino umwisikulu alasolola ukufuma mukasi ka mitundu inu pakuti apano yonsi yakakonganila ku kumulumbanya.

⁶ Ali pano mulamupeelela amawila inu akoca ni mpolelwa zyuze, ivikumi na mawila, amawila yano mwalaya ukupeela kuli Yawe, alino na mawila akuitemelwa mweisikulu, kumwi na mayeli ya ng'ombe ni mfwele zinu.

⁷ Papa kwene pa manso yakwe Yawe ali pano mulalya nu kusansamuka na ang'anda zinu pamulandu nu usuma wa vintu vino Yawe Leza winu wamupeela, vino mwaombile.

⁸ “Insita iya lino ilafika mutaca mwacita wakwe vino mukacita lyonsi. Pasi pano ukufika na pilelo cila muntu akaicitila icili consi cino welenganya ukuti cili ningo,

⁹ pamulandu wakuti mutacili mufike mu mpanga ya ulayo muno mulikala ku matwi cele.

¹⁰ Ndi mwaca mwalamba Luzi lwa Yodani, Yawe Leza winu alamupeela amaka ya kupoka impanga nupya mulikala mwenemo. Alamucingilila ku anisi inu pakuti mungaca mwaikala ku matwi cele.

¹¹ Yawe umwisikulu aliwe alasolola incende pakuti mwamupepela. Papo kwene ali pano mulatwala vyonsi vino ne Mose namukonkomezya. Ni vintu vivyo vili wa mawila inu akoca nga ni mpolelwa zinu zyuze. Alino ni vikumi na mawila inu, nga na mawila yauze aiyele yano mwalaya ukupeela kuli Yawe.

¹² Lyene mulasansamuka pa manso yakwe Yawe Leza winu apali pamwi na ana inu, na aomvi inu, na ina Levi akaikala mu misumba inu. Mwaiusya ukuti aina Levi Yene yatapiilwe impanga ingaya impanga yao iyaupyanyi.

¹³ Mutakezye ukutuula amawila inu akoca pa ncende yonsi ino mwaitemelwa.

¹⁴ Muce mwatuulila amawila inu akoca pa ncende yonga sile ino Yawe alasolola, apakasi ka mutundu onga mu mitundu inu. Papo kwene sile ali pa kutuulila impolelwa zinu zyakoca nu kucitila penepo ivintu vyonsi ndi vino namupeela ilamulo.

¹⁵ “Lelo kwene insambu zyonsi mwatimukwata izya kufyula iviteekwa vinu nu kulya ku ncende ino mutenzi. Mungalya ukulingana na pano Yawe wamupelela. Mwensi kwene mungalya, ciye mwemwe yasangululwe nanti mwemwe yakowele, ukulya kutupu wakwe vino mukalya inyama ya mpanga ili wakwe mpombo nanti mpelembe.

¹⁶ Lelo mutaca mwalya zino zicili nu wazi. Uwazi wene muce mwawitila pansi wa manzi.

¹⁷ Monsi muno mulaikala mutaca mwatola nu kulya icikumi ca pa mbezu zinu, nanti waini, nanti amafuta ya miolivi, nanti iyeli lya ng'ombe nanti imfwele zinu, nanti uwila uli onsi uno mwalaya ukupeela kuli Yawe, nanti uwakuitemelwa kwene.

¹⁸ Mwemwe kwene kumwi na ana inu, aomvi inu alino na ina Levi akaikala ku misumba inu muce mwavilila vivyo vyonsi pa manso yakwe Yawe Leza winu, pa ncende yonga mpo iyakupepela penepo. Papo kwene ali pano muce mwaliila nu kusansamuka pa vintu vyonsi visuma vino Yawe Leza winu wamupeela.

¹⁹ Mutaca mulekelezye aina Levi yano mwikala nayo mu mpanga inu.

²⁰ “Lino Yawe alakuzya impanga inu, wakwe muno walavile, muce mwafyula inyama nu kulya pano mukulondela.

²¹ Ndi cakuti ukwa kupepela kwatalimpa na pano mukaikala, lyene wakwe muno imunenile mungafyula iciteekwa cinu cino Yawe wamusekela nu kulila ku mang'anda inu lyonsi lino mwatemwa.

²² Mwensi pyu, ciye mwemwe asangululwe nanti akowele, mungalya inyama zizyo wakwe vino mukalya inyama ya mpanga, ili wakwe mpombo nanti mpelembe.

²³ Lelo cisi cakwezya ukulya inyama lino icili nu wazi, pamulandu wakuti uwazi umwaya umi. Fwandi mutalinzile ukulya umi ni nyama kwene.

²⁴ Mutaca mwezye ukulya uwazi. Uwazi wene muce mwawitila pansi wa manzi.

²⁵ Ndi mutalalya uwazi, ale mwayela isunde lii, na Yawe alazanga, nga ni vintu vyonsi vilamuzipila mwemwe na amu mupanda winu.

²⁶ Lelo mulinzile kutoola amawila inu apaatulwa pamwi na mawila yauze yano mwalaya ukupeela kuli Yawe, nga muye ku ncende ino Yawe alasolola.

²⁷ Ali kuno muce mwatuula amawila inu akoca pa kavuwa kakwe Yawe Leza winu, inyama nu wazi kwene. Alino muce mupongolwele uwazi wa mawila inu apambali ya kavuwa, lelo inyama yene mungalya.

²⁸ Muce mwatekela nu kuyela amalamulo yonsi yano nkumupeela, nga ni vintu vyonsi vilamuzipila mwemwe na amu mupanda winu amanda pe, pamulandu wakuti mulacita icisuma icakuzanzya Yawe Leza winu.

Cisi cakwezya ukupepa utuluwi

²⁹ “Yawe Leza winu alonona antu amu nko zyuze lino mulasawanga impanga yao, nga namwe mulapoka impanga iyo nu kwikala mwenemo.

³⁰ Pacisila lino Yawe alamalila ukonona antu amu nko zizi, namwe muce mutekele pa kukana londelela imipepele yao, pamulandu wakuti mungailetelela pa kuuzya imuti, ‘Uzye mu musango ci uno antu amu mitundu ii yakatumikila tuleza twao? Naswe kwene tulinzile ukucita vino yakacita.’

³¹ Cisi cakwezya ukupepa Yawe Leza winu mu musango wao, pamulandu wakuti yene pa kupepa tuleza twao yakacita ivimisango vimwi ivyawinyi vino Yawe Leza winu wapata. Yene yakaoca na ana yao aonsi na anaci pa kuyatuula impolelwa kuli tuleza twao utuluwi.

³² “Mulinzile ukucita vyonsi vino namupeela ilamulo ukucita. Mutakezye ukulunda penepo nanti ukufumya penepo icili consi.”