Malango 1 - Amazwi Yakwe Leza 2013

¹ Mu lupapulo luu muli amazwi yano Mose wavwanzile ku ina Izlaeli yonsi lino yali mu lwanga lwaku ufumondaka wa Luzi lwa Yodani. Yene yali mu cifoloma ca Yodani, pipi nu ku Sufi pakasi ka musumba wa Palani ku mbali yonga nga ni misumba ya Tofeli, Labani, Hezeloti, na Dizaabu ku mbali yuze.

² (Cikasenda amanda ikumi na onga ukupita ulwendo ukufuma ku Mwamba wa Holebu ukuya ku Kadesyi Banea ku nzila ya mpanga ya Edomu, ya myamba.)

³ Pa wanda wakutandika uwa mwezi uwalenga ikumi na onga mu mwaka uwalenga amakumi yani pacisila lino yatiyafuma mu Eguputo, Mose anena aina Izlaeli ivintu vyonsi vino Yawe wamupeezile ilamulo kuti ayanene.

⁴ Cii cali pacisila lino wene watacimvya Siooni umwene wa ina Amoli, wino wateesile mu musumba wa Hesyiboni, nga na Ogi umwene waku Basyani, wino wateesile mu misumba ya Asyitaloti na Edilei.

⁵ Cali lino antu yali lwaku ufumondaka wa Luzi lwa Yodani mu muputule wa mpanga ya Moabu lino Mose watandike kuyalondolwela amasunde nga na masambilizyo yakwe Leza. Ayanena ati,

⁶ “Lino twali pa Mwamba wa Holebu, Yawe Leza witu wavwanzile kunotuli ati, ‘Caticilingana ukwikalisya kuno mwatimwikalisya pa mwamba uu.

⁷ Pangululini insakwe zinu nga muye ku nkolelo. Yangini ku mpanga ya myamba iya ina Amoli nga nu ku ncende zyonsi izizingulwike lwaku Cifoloma ca Yodani, ku mpanga ya myamba nu ku mpanga zitambalale, lwaku kaeya, nga nu ku nkumba yakwe Yemba wa Adiliya. Yangini ku mpanga ya Kenani mupitilile kucila pa Myamba ya Lebanoni mufike nu ku luzi lukulu lwa Yufulate.

⁸ Impanga ii yonsi aino ne Yawe nalavile ukupeela kuli Abulaamu, Isaki, Yakobo, nga nu ku vikolwe vinu. Yangini mukapokolole impanga ilya mukikalemo.’ ”

Mose wasonta yakapingula

⁹ Mose anena antu ati, “Lino twali pa Mwamba wa Sinai namunenyile inti, ‘Umulimo wakutungulula mwemwe watiunkomela cuze. Ntangembombe nenga.

¹⁰ Yawe Leza winu uwalenga kuti muvule wa ntanda umwiyulu.

¹¹ Si Yawe, Leza wa vikolwe vinu, aleke muvulileko amaila izimbi nu kumipolelela wakwe vino walavile!

¹² Lelo uzye cingacitika uli kuti umutembo wakuputula imilandu inu unyomele pali nene nenga sile?

¹³ Sololini antu yamwi amano, akwata ukwiluka, amanyikisya vintu nupya acindikwa, ukufuma muli cila mutundu, nga nani ndayapeela umulimo wa kwangalila mwemwe.’

¹⁴ Namwe mwazumile ukuti icintu cii icisuma ukucita.

¹⁵ Acino natoozile intunguluzi zyamano zilamoke zino mwasolwile ukufuma mu mitundu inu, nga nzipeela uwangalizi kuti zyamwangalila. Zimwi zyangalilanga antu izimbi, zimwi zyangalilanga antu umwanda, zimwi zyangalilanga antu amakumi yasano, na zimwi zyangalilanga antu ikumi. Nasolwile na yacilolo yauze mu mitundu yonsi.

¹⁶ “Pa nsita ilya nakonkomizye yakapingula inu inti, ‘Mwauvwa imilandu ino antu inu yamaletanga kunomuli. Mulinzile kupingula cila mulandu ukwaula ulufyengo, cisi cimwi ndu mulandu uli pakasi ka antu inu nanti ndi uli pakasi kinu na inamasi yano yakwikala namwe.

¹⁷ Mutaya na kasoozi lino mukupingula. Mwapingula cila muntu kwaula kunyomela mbali, cisi cimwi vino umuntu wiyo ali. Mutaoopa umuntu nanti umwi, pano upinguzi uno mumacita ukafuma kuli Leza. Ndi umulandu umwi wakomesya cuze kunomuli, muulete kunondi nga nani ndapingula.’

¹⁸ Pa nsita ilya ili imwi kwene namunenyile vintu vyonsi vino mwali nu kucita.

Yatuma inengu ukufuma ku Kadesyi Banea

¹⁹ “Lyene wakwe vino Yawe watupeezile ilamulo kuti tucite, twafumile pa Mwamba wa Holebu nga tusalala ulwanga lulu lukulu ulwakofya itulungama ku mpanga ya myamba iya ina Amoli. Alino tufika ku Kadesyi Banea.

²⁰ Lyene namunenyile inti, ‘Mwatimufika ku mpanga ya myamba ya ina Amoli, ino Yawe Leza witu akutupela.

²¹ Lolini, Yawe Leza winu watamupeela impanga. Yangini mukapokolole impanga ilya wakwe vino Yawe, Leza wa vikolwe vinu, wamunenyile. Mutuvwa intete nanti kutovoka.’

²² “Lelo mwizile kunondi nu kuti, ‘Lekini tutume antu nkolelo yakatunengwile impanga, pakuti yangiza yatunene inzila ino ingazipisya kunotuli kupitamo nga ni vyaya imisumba ya kweneko.’

²³ “Ilangulusi lilyo lyalolike ilisuma kunondi. Acino nasolwile antu ikumi na yaili, wenga ukufuma muli cila mutundu.

²⁴ Antu yaya yatumbela impanga ya myamba, nga yafika ku Cifoloma ca Esyikoli nga iyacendezya.

²⁵ Yatuletela iviseekwa vimwi vino yazanyile kuku, nga yatunena ukuti impanga ino Yawe akutupela yavunda wakwe cimwi.

²⁶ “Lelo mutakasi ukuya kweneko. Mwakanyile kuyela ilamulo lyakwe Yawe Leza winu.

²⁷ Mwailizyanyizye pakasi kinu, imuti, ‘Yawe watupata. Watufumya ku Eguputo kuti aize atupeele mu makasa ya ina Amoli pakuti yangatukoma.

²⁸ Uzye pacani cino tungaila kukwa? Tukuuvwa intete. Antu yano twatumile kweneko yakutunena ukuti antu aya kukwa yaya namaka cuze nupya amalamba ukutuluta, nu kuti yakaikala mu misumba ya malinga atali kufika nu mwiyulu. Yene yaweni aina Anaki kukwa!’

²⁹ “Lelo namunenyile inti, ‘Mutoopa antu yaya.

³⁰ Yawe Leza winu amamutungulula, nga amamulwisizya, wakwe vino mwaweni akucita mu Eguputo

³¹ nu mu lwanga kwene. Kuku mwaweni vino Yawe wamusenzile nzila yonsi amuleta ku cifulo cii, wakwe vino isi akasunsa umwana pa ciye.’

³² Lelo nanti namunenyile vii, nalyo kwene mutataile Yawe,

³³ nanti angala wene wamukolelelanga kuti amulondele cifulo pakuti mukuule insakwe. Apa kuti amulange inzila, wene wamukolelelanga mu mvumba ya moto usiku nu mu mvumba yi kumbi umusanya.

Yawe wavunuka aina Izlaeli

³⁴ “Yawe uvwile kuilizyanya kwinu nga asoka. Acili cino wene walafile ati,

³⁵ ‘Kusi nanti wenga uwamu mukulo uu uwipe alingila mu mpanga ivunde ino nalavile ukupeela ku vikolwe vinu.

³⁶ Suka sile Kalebu umwana wakwe Yefune aalingilamo. Wene acili uwakutailwa kunondi, nga nani ndapeela impanga ino waile aendezya kunoli nu ku amu mupanda wakwe.’

³⁷ “Pamulandu wakwe mwemwe Yawe wansokile nga avwanga ati, ‘Nanta awewe kwene, Mose, utalingila mu mpanga ilya.

³⁸ Lelo ukomelezye kazwilizya wako, Yoswa umwana umonsi wakwe Nuni. Wene alatungulula aina Izlaeli kuti yakapyane impanga ilya.’

³⁹ “Lyene Yawe anena swensi ati, ‘Ana inu yano yacili anono atali yamanye kupusanya pakasi ka cisuma ni ciipe, yalingila mu mpanga ilya, ana yaya kwene yano mwatangi yalayasenda mu uzya. Indayapeela impanga ilya, nga nayo yalaipyana.

⁴⁰ Lelo mwemo, seleukini nga mutenuke nu kuswilila kulungama ku lwanga mupite umu nzila iyaya kuli Yemba Muyenzu.’

⁴¹ “Lyene mwemo mwaasuka muti, ‘We Mose, twatitwifya kuli Yawe. Lelo ndakai tumaya tukayalwisye, wakwe vino Yawe watupeezile ilamulo.’ Nga lyene cila wenga munomuli waiteinye ukuya mukulwa, ala akwelenganya ukuti cili icangumpale ukuzanza impanga ya myamba.

⁴² “Lelo Yawe anena ati, ‘Uyanene yateezya ukuya ku kulwa, pamulandu wakuti ntamaya namwe, nga na anisi inu yamamucimvya.’

⁴³ Namunenyile amazwi yano Yawe wavwanzile, lelo mwemo mutasumvileko amano. Mwamutalamile nga nu mu cilumba cinu imutumbela impanga ya myamba.

⁴⁴ Lyene aina Amoli yano yikalanga mu myamba ilya yamukatukile wa cikundi ca nzimo. Yene yamuzinginye mpaka kufika nu ku Holima nga kukwa kwene akuno yamucimvizye mu mpanga ya myamba ya Edomu.

⁴⁵ Lino mwawelulwike mwakuusile kuli Yawe kuti amwazwe, lelo wene atuvwile nanti kusumbako amano kunomuli.

Imyaka ino aina Izlaeli yatenzi mu lwanga

⁴⁶ “Acino mwatenzi mu Kadesyi amanda avule pa nsita yonsi ino mwali kweneko.