Luka 9 - Amazwi Yakwe Leza 2013

Yesu watuma alondezi yakwe ikumi na yaili

¹ Yesu aama alondezi ikumi na yaili pali pamwi, nga ayapeela maka akufumya mipasi yankota yonsi nu kupozya indwala.

² Lyene ayatuma ku kukosola vya Wene wakwe Leza nu kupozya alwale.

³ Alino ayanena ati, “Mutasenda icintu cimwi pa lwendo lwinu. Kusi kusenda intuwa, mufuko wakulengelamo vimwi, nanti mukate, nanti mpiya, nanti cakuzwala na cuze.

⁴ Konsi kuno yalamupokelela mwikale mu ng'anda ili imwi kufika lino mulafuma mu musumba uwo.

⁵ Konsi kuno antu yatalamuzengela, muce mufume mu musumba uwo, nu kukunta ulukungu lwaku ngazo zinu, kuya umboni kunoyali.”

⁶ Alino alondezi yapita mu mizi, ala yakukosola Ilandwe Lisuma nu kupozya alwale konsi.

Helodi wasakamikwa

⁷ Lino Helodi kateeka uwamu Galile uvwa vintu vii vyonsi ivyacitikanga, cimupezya mano cuze. Pano antu yamwi yatangi Yoane Kawatizya watazyukuka kufuma ku afwe.

⁸ Yauze nao ala yakuti, Eliya wataiza, nga nupya ala yakuti awenga wamuli yakasema yampiti watazyukuka kufuma ku afwe.

⁹ Lelo Helodi ati, “Naputwile Yoane umutwe. Uzye lyene umuntu wii aweni, wino nkuvwilapo vintu vii?” Lyene wakasi kuti angalola Yesu.

Yesu wimula antu kuluta pa mazimbi yasano

¹⁰ Lino atumwa yawela yalandila Yesu vyonsi vino yaomvile. Lyene yapaatuka, ayasenda, yapita nawe ku musumba wa Betisaida.

¹¹ Lelo lino maumba yamanya cii, yamulondela. Nawe ayazengela, ayasambilizya pamulandu wa Wene wakwe Leza, nga apozya na yao alondanga kupoziwa.

¹² Lino ilanzi lyatemba, alondezi ikumi na yaili yapalama kunoli yamunena yati, “Nena antu yapite mu mitanda nu ku mizi izingulwike pakuti yalonde ivyakulya nu kwa kulala. Pano kuno uku matololo.”

¹³ Lelo wene aasuka ati, “Mwemwe kwene yapelini vyakuti yalye.” Nao yati, “Tukweti sile mikate isano nga ni inswi ziili. Uzye ukulonda kuti tuye tukakalile iumba lii lyonsi ivyakulya?”

¹⁴ Pali antu aonsi manye mazimbi yasano. Yesu anena alondezi yakwe ati, “Nenini antu ikale pansi mu maumba maumba, cila umba manye makumi yasano.”

¹⁵ Lyene alondezi yateka antu pansi.

¹⁶ Alino Yesu atoola mikate isano ni inswi ziili, alingamila kwiyulu, ataizya kuli Leza. Lyene amokoola mikate, apeela alondezi yakwe kuti yankanye antu.

¹⁷ Onsi yalile iikuta. Lyene alondezi yasola imvungwa izyasile, yazuzya imise ikumi na iili.

Petulo waumbula ukuti Yesu ali Katuula Uwalavilwe

¹⁸ Insita imwi Yesu wapepanga ala ali sile na alondezi yakwe. Yesu ayauzya ati, “Uzye antu yakati nene weni?”

¹⁹ Nao yaasuka yati, “Yamwi yakati wewe Yoane Kawatizya. Yamwi yakati wewe Eliya. Alino yamwi nao yakati wewe umwi wamuli yakasema yampiti uwatazyukuka kufuma ku afwe.”

²⁰ Yesu nawe ayauzya ati, “Uzye mwemo, mukati nene weni?” Petulo nawe aasuka ati, “Wewe uli Katuula uwalavilwe.”

Yesu wasowela ucuzi, imfwa nu kuzyukuka kwakwe

²¹ Alino Yesu ayapeela ilamulo kuti yatanena umuntu nanti umwi pali cii.

²² Caleka ayanena ati, “Mwana wa Muntu ali nu kucula cuze, nupya aikolo na yasimapepo akalamba, na yakasambilizya ya Masunde yalamukana nu kumukoma, lelo pa wanda wakulenga yatatu alazyukuka kufuma ku afwe.”

²³ Lyene anena yonsi ati, “Muntu umwi ndi akasi kundondela, aikanye, aisendele ulupanda manda yonsi nga andondele.

²⁴ Pano wino wensi akalonda kutuula umi wakwe wene alauponzya. Lelo wino wensi amaponzya umi wakwe pamulandu wane, wene alautuula.

²⁵ Uzye umuntu alakwata muzano cii ndi walonka ivya mu nsi vyonsi, lelo waponzya umi wakwe nanti ukuulovya? Awe kusi cimwi!

²⁶ Muntu ndi wankana pamwi na mazwi yane, Mwana wa Muntu nawe alamukana lino aliiza mu lulumbi lwakwe, nu mu lulumbi lwakwe Isi nga nu lwa angeli yamuzilo.

²⁷ Cumi namunena vino, apano yali yamwi pano atalafwa kufika lino yalalola Uwene wakwe Leza.”

Yesu wakaoka pa mwamba

²⁸ Papisile umulungu kufuma lino Yesu walanzile vintu vii, Yesu asenda Petulo, Yoane na Yakobo yaya pa mwamba ku kupepa.

²⁹ Lino acili akupepa, cinso cakwe ciloleka ciiyele, ni vizwalo vyakwe viyengesa cuze viya vitiswe wa luswepo.

³⁰ Lilyo kwene antu yaili, Mose na Eliya, yavwazyanya nawe.

³¹ Yene yalolike mu lulumbi ala yakulanda na Yesu pamulandu wa mfwa ino wali nu kufwa ku Yelusalemu.

³² Petulo na auze yano wali nao ala yati yanyomelwa nu tulo. Lelo lino yazyuka yalola kuyengesa kwa lulumbi lwakwe Yesu na antu yaili aimi nawe.

³³ Lino yaa yaili yacilifumapo yasya Yesu, Petulo anena Yesu ati, “Kasambilizya, catuzipila kuti twali tutenzi kuno kwene. Tumakuula insakwe zitatu, yonga iyakwako, yuze iyakwe Mose, nayuze iyakwe Eliya.” (Atamanyile cino wavwanzile.)

³⁴ Lino acili akuvwanga, Lyene ikumbi liiza liyavimba. Caleka alondezi yuvwa intete lino cinzingwa ci kumbi cayavimba.

³⁵ Ni izwi lyuvwika kufuma mwi kumbi liti, “Wii, Mwanane wino nasolola, mwamuvwa.”

³⁶ Pacisila lino izwi lyuvwika, alondezi yalola vino Yesu ali wenga. Caleka yene pa nsita ilya yatanenyile umuntu nanti umwi pali cino yaweni.

Yesu wapozya umwana mulumendo uwali nu mupasi wankota

³⁷ Pa wanda uwalondelile, lino Yesu na alondezi yakwe yatatu yatentemuka kufuma pa mwamba, iumba likulu cuze limukomanya.

³⁸ Umuntu umwi mwi umba alaizya ati, “Kasambilizya nakupapata kuti upozye umwanane umonsi, uwaya sile wenga.

³⁹ Mupasi wankota ukamulema, umuponya pansi nga apunda izwi likulu, alino umutensya na maka cakuti afumya ni itomvu ku mulomo. Pa kufuma ukasya wamucisola.

⁴⁰ Nali napapatila alondezi yako kuti yaufumye, lelo yali yaposiwa.”

⁴¹ Lyene Yesu ayanena ati, “Ala! Mwe antu amu mukulo usi na utailo nupya uvulungane! Uzye namaya namwe nu kumutekelela kufika lilaci?” Lyene anena umuntu ati, “Leta umwana wako kuno.”

⁴² Lino mulumendo acili akwiza, mupasi wankota umuponya pansi alino umutensya na maka. Alino Yesu akalipila mupasi wankota, apozya mulumendo, nga nupya amupeela kuli isi.

⁴³ Antu yonsi yazunguka pa maka akulu yakwe Leza. Lelo lino antu yonsi yacili yakuzunguka pa vintu vyonsi vino Yesu wacitanga, Yesu anena alondezi yakwe ati,

Yesu wasowela nupya pa mfwa yakwe

⁴⁴ “Muvwikisye ningo vino nati munena. Mwana wa Muntu alakoopelwa ku antu.”

⁴⁵ Lelo yene yatamanyile vino cii casenulanga. Walanga muvwango uu wafiswa kunoyali cakuti yatamanyile vino ukusenula nga yuvwile intete kuti yamuzye pamulandu uu.

Uzye mukulu aweni?

⁴⁶ Lyene alondezi yatandika kupazyanya pamulandu wakwe wino angaya mukulu pakasi kao.

⁴⁷ Lelo Yesu amanya vino yakwelenganya. Caleka atoola umwana munono, amwimika pa mbali yakwe,

⁴⁸ ayanena ati, “Wino wensi akazengela umwana munono wakwe wii pamulandu wane, ala wanzengela. Na wino wensi uwanzengela, ala wazengela wino uwantuma. Pano wino ali munono kuluta pali mwemwe mwensi, wene ali mukulu.”

Wino wensi asikumulwisya ala ali namwe

⁴⁹ Yoane avwanga ati, “Kasambilizya, twaweni umuntu umwi ala akufumya mipasi yankota mwi zina lyako, nga twamulesizye pano asi uwa mwi umba litu.”

⁵⁰ Lelo Yesu ayanena ati, “Mutamulesya. Pano wino wensi asikumulwisya ala ali namwe.”

Aina Samaliya yakana kupokelela Yesu

⁵¹ Lino manda yapalama akuti Yesu asendwe kwiyulu, lyene apanga ulwendo kuya ku Yelusalemu.

⁵² Atuma inkombe zyakumukolelela, zino zyaile mu muzi wa Samaliya ku kumuteyanyizizya vintu vyonsi.

⁵³ Lelo kuku antu yatamupokelile, pano camanyike ningo vino wayanga ku Yelusalemu.

⁵⁴ Lino Yoane na Yakobo alondezi yakwe Yesu yaweni cii, yamuzya yati, “Mwene, uzye ukulonda kuti twame moto kufuma kwiyulu kuti wize uyonone?”

⁵⁵ Lelo Yesu aseleuka ayakalipila.

⁵⁶ Lyene apita nao ku muzi uze.

Antu alinzile kulondela Yesu

⁵⁷ Lino yacili yakupita mu museo, umonsi umwi anena Yesu ati, “Namakulondela konsi kuno umaya.”

⁵⁸ Yesu amunena ati, “Yankusa yakwata ininga umwa kulala, ni vyunyi vyakwata ivinsanzo, lelo Mwana wa Muntu atakwata pa kusamila mutwe wakwe.”

⁵⁹ Lyene anena umonsi namuze ati, “Ndondela.” Lelo wene amwaasuka ati, “Mwene, leka ntale mpite kuti nkazike tata.”

⁶⁰ Yesu amunena ati, “Leka afwe yazike afwe yao. Wemo pita ukakosole vya Wene wakwe Leza.”

⁶¹ Na muze kwene ati, “Mwene, namakulondela, lelo leka ntale mpite nkapakasye aku ng'anda yane.”

⁶² Yesu amwaasuka ati, “Wino wensi uwatandika kulima nga acili akulola icisila ala atalinzile ukuya mu Wene wakwe Leza.”