Luka 22 - Amazwi Yakwe Leza 2013

Yapangana kukoma Yesu

¹ Lyene uwanda wa kuzevya Cimulo ca Mukate usi na Citutumusi, cino cikaamwa Cimulo ca Ucilo, wapalime.

² Yasimapepo akalamba na yakasambilizya ya Masunde yalondanga inzila yakuti yalemelemo Yesu nu kumukoma munkama pano yoopanga antu.

Yuda wazumila kukoopa Yesu

³ Lyene Ciwa aingila muli Yuda, wino yamanga ukuti Iskalyoti, uwali uwamu alondezi ikumi na yaili.

⁴ Lyene aya kuli yasimapepo akalamba na yamusika amu Ng'anda ikulu yakwe Leza, kuti auvwane nao inzila yakuti ayakoopele Yesu.

⁵ Nao yazanga cuze nga yazumilizyanya kumupeela impiya.

⁶ Caleka azumila, nga atandika ukulonda inzila iya kukoopelamo Yesu kunoyali mu nkama.

Yesu waiteyanya ukulya cimulo ca ucilo pamwi na alondezi Yakwe

⁷ Lyene uwanda wa kuzevya Cimulo ca Mukate usi na Citutumusi ufika, lilyo lino ana ya mfwele a Ucilo yakakomwa.

⁸ Alino Yesu atuma Petulo na Yoane, ayanena ati, “Yangini mukatuteyanyizizye umwakulila Cimulo ca Ucilo.”

⁹ Nao yamuzya yati, “Uzye aukwi kuno ukulonda kuti tukateyanye?”

¹⁰ Nawe aasuka ati, “Lino mwingila mu musumba, mumakomanya umonsi asenzile nsembo ya manzi. Namwe mumulondele nu mu ng'anda kwene muno amaingila. Alino munene mwine wa ng'anda muti,

¹¹ ‘Kasambilizya wati, Uzye muputule uwa enyi ulikwi kuno alondezi yane pamwi nani tumalila Cimulo ca Ucilo?’

¹² Lyene amaya kamulange muputule ukulu cuze uwa ng'anda ya papela muno vyonsi vyati viteyanyiziwa ningo. Amuno mukateyanye vyonsi.”

¹³ Lyene yapita yaya yazana vyonsi wakwe vino Yesu wayanenyile, alino nao yateyanya kuzevya kwa Cimulo ca Ucilo.

Cimulo ca Mwene

¹⁴ Lyene lino kasita kafika Yesu aikala nu kulya Cimulo pa cipango pamwi na atumwa yakwe.

¹⁵ Alino ayanena ati, “Nkulondesya ukulya Cimulo cii ca Ucilo pamwi namwe lino ntali ncule!

¹⁶ Caleka namunena vino ntalalya Cimulo nacuze kufika lino cilacitwa nupya mu Wene wakwe Leza.” [

¹⁷ Lyene Yesu atoola ulwako, ataizya Leza, avwanga ati, “Tolini lwako luu, nu kumwamo mwensi kwene.]

¹⁸ Pano namunena vino kufuma ndakai ntalamwa nupya vifenwa vya vizao vya matingi, kufika lino Uwene wakwe Leza uliza.”

¹⁹ Alino atoola umukate ataizya Leza, aumokoola, alino aupela kunoyali, avwanga ati, “Uu uli mwili wane, uwapeelwa pamulandu winu. Mwacita cii pa kunjiusya.”

²⁰ Mu musango uli onga kwene, lino yamala ukulya ayapeela lwako, avwanga ati, “Lwako luu ulwa upangano upya uno Leza watamapo insimbi nu wazi wane, uno wapongololwa pamulandu winu.”

²¹ “Lelo lolini! Wino amankoopa wene tukulya nawe cimulo pa cipango pano kwene.

²² Mwana wa Muntu alafwa wakwe vino Leza wapingula, lelo kalanda ku muntu wino amamukoopa!”

²³ Lyene yatandika ukuuzyanya aisikulu kuti, yamanye aweni uwa munoyali amacita cii.

Alondezi yapazyanya pamulandu nu ukulu

²⁴ Lyene kupazyanya kuya pakasi ka alondezi, pamulandu wakwe wino alinzile ukuya mukulu kuluta yonsi panoyali. Luk 9:46

²⁵ Yesu nawe ayanena ati, “Yakateeka ya antu atataila Leza yakwata maka pa antu yao, nga ni ntunguluzi zyao nazyo zikayaama zisikulu ziti, ‘Intunguluzi zisi na lusoko.’

²⁶ Lelo cisi vivyo muli mwemwe. Mu cifulo cakwe cii, mukulu uwa muli mwemwe alinzile aye kwati munono na wino akuteeka nawe alinzile aye kwati muomvi.

²⁷ Uzye mukulu aweni? Uzye awiyo akaikala pansi, nu kulya nanti awiyo akamuombela? Uzye asi awiyo akaikala nu kulya? Lelo nemo indi pakasi kinu wa muomvi.

²⁸ “Mwemo mwati muposya pamwi nani mu macuzi yane onsi.

²⁹ Namupeela Uwene wakwe vino Tata wampile Uwene.

³⁰ Mulalya nu kumwa pa cipango cane mu Wene wane, nga nu kwikala pa vilimba vya wene nu kupingula imitundu ikumi na iili ya ina Izlaeli.

Yesu wasowela vino Petulo amamukana

³¹ “Simoni, Simoni! Lola Ciwa watazumiliziwa na Leza kuti amweele mwensi, wakwe vino antu yakaela ingano.

³² Lelo nati nkupepela Simoni kuti utailo wako utatovoka. Na lino ulazenzuka, uce ukomelezye anyonko onsi.”

³³ Lelo Petulo avwanga ati, “Mwene, indi umuiteyanye ukuya ku ng'anda yaminyololo nu kufwa pamwi nawe.”

³⁴ Yesu nawe amunena ati, “Nakunena, Petulo, ilelo kwene, lino mukolwe atacili alamule wemo umankana maila yatatu ale ukuvwanga vino utamanyile.”

Cikwama ca mpiya, mufuko wa kulengelamo nu lupanga

³⁵ Lyene Yesu ayauzya ati, “Lino namutumile kwaula kusenda cikwama, nanti mufuko wa kulengelamo vimwi, nanti ndyatu, uzye muulilwe cimwi?” Nao yaasuka yati, “Awe.”

³⁶ Yesu nawe ayanena ati, “Lyene ndakai, wino wensi akweti cikwama ca mpiya nanti mufuko wa kulengelamo alinzile asende. Na wino wensi atakwata lupanga alinzile akazye ikoti lyakwe alino akale lupanga.

³⁷ Acino namunena vino icalembwa mu malembelo pamulandu wane, icikati, ‘Wapendilwe ukufwa pamwi na yakaifya,’ cili nu kufikiliziwa.”

³⁸ Alondezi nao yavwanga yati, “Lola! Mwene tukweti mpaanga ziili.” Nawe ayanena ati, “Cati cilingana!”

Yesu wapepa pa Mwamba wa Olivi

³⁹ Yesu afuma mu musumba, aya ku Mwamba wa Olivi, ndi vino wacitanga pe. Wene wapisile pamwi na alondezi yakwe.

⁴⁰ Lino wafika ku cifulo cici, ayanena ati, “Pepini kuti mutaponela mu matunko.”

⁴¹ Lyene atala ayasya, apita katalamukila, nga afukama apepa ati,

⁴² “Tata, ndu kasi sisya lwako luu lwa ucuzi kunondi. Kusi kulonda kwane, lelo kulonda kwako kucitike.” [

⁴³ Mungeli aloleka kunoli kufuma kwiyulu amukomelezya.

⁴⁴ Mu kunyunguluka kukulu cuze apepa ukuluta, ala ni yevu lyakwe likutonela pansi kwati amamata akulu a wazi.]

⁴⁵ Lino wata kupepa, akatuka awela ku alondezi azana yakaswile, ala yati yanyomelwa na malanda.

⁴⁶ Alino ayanena ati, “Pacani mukukasula? Katukini mupepe kuti mutaponela mu matunko.”

Kulemwa kwakwe Yesu

⁴⁷ Walanga lino Yesu acili vwanga, iumba ilyatungulwilwe na Yuda, wenga uwamu alondezi ikumi na yaili, liifika. Lyene Yuda aya kuli Yesu kuti amutonsole.

⁴⁸ Lelo Yesu amuuzya ati, “Yuda, uzye mukutonsola kwako amuno ukukoopela Mwana wa Muntu?”

⁴⁹ Lino alondezi yalola icali nu kucitika, yamuzya yati, “Mwene, uzye tuomvye mpaanga zitu?”

⁵⁰ Wenga uwa munoyali asempa ikutwi lilunji lya muzya wakwe Simapepo Mukulu.

⁵¹ Lelo Yesu avwanga ati, “Casila, tini cii!” Lyene alimba ikutwi lya muntu, amupozya.

⁵² Lyene Yesu anena yasimapepo akalamba na yamusika amu Ng'anda ikulu yakwe Leza, nga na aikolo amu Ayuda aizile ku kumulema ati, “Uzye mwizile kuli nene ni mpaanga ni zya ntuwa, ungati nene cipondo?

⁵³ Nali namwe manda aingi mu Ng'anda ikulu yakwe Leza, nga namwe mutandemile. Lelo ii ili nsita inu, lino maka ya mfinzi yakuteeka.”

Petulo wakana Yesu

⁵⁴ Lyene lino yalema Yesu, yamutwala ku ng'anda yakwe Simapepo Mukulu. Lelo Petulo wene amulondela katalamukila.

⁵⁵ Lyene lino yapemba umoto pakasi ka musolo wa nsaka ya milandu nu kwikala pansi, Petulo nawe waile aikala pansi pali pamwi nao.

⁵⁶ Lyene umukazyana wenga uwamu yaomvi amulola pano watenzi mu luswepo lwa moto. Umukazyana amulolekesya alino avwanga ati, “Muntu wii, nawe kwene wali pamwi na Yesu.”

⁵⁷ Lelo Petulo akana ati, “Mwanaci we, nemo ntamanyile umuntu wiyo.”

⁵⁸ Lino papita kasita kanono umuntu namuze anena Petulo ati, “Nawe kwene wewe uwa munoyali.” Lelo Petulo avwanga ati, “We muntu we, ala asi nene.”

⁵⁹ Lino papita manye aawa yonga umuntu namuze kwene avwanga nu kusininkizya ati, “Cumi, umuntu wii nawe kwene wali pamwi na Yesu, pano wene uwaku Galile!”

⁶⁰ Lelo Petulo amunena ati, “We muntu we, nemo ntamanyile cino ukuvwanga.” Lilyo kwene lino acili akuvwanga, mukolwe alamula.

⁶¹ Alino Umwene aseleuka alolekesya Petulo, lyene Petulo aiusya mazwi yano Umwene wamunenyile ati, “Lino mukolwe atacili alamule ilelo, wemo umankana maila yatatu ale ukuvwanga vino utamanyile.”

⁶² Alino Petulo afumila panzi, nga alila minsozi nu ulanda ukulu cuze.

Yasaalula Yesu nu Kumuma

⁶³ Antu alindanga Yesu yamusaalula nu kumuma.

⁶⁴ Alino yamuvimba pa manso, yamuzya yati, “Ale tunganya! Uzye aweni uwakuma?”

⁶⁵ Alino yalanda na mazwi aingi a misuli kunoli, ala yakumutuka.

Yesu mwi Tengo lya Ayuda

⁶⁶ Lyene lino waca, aikolo, yasimapepo akalamba, na yakasambilizya ya Masunde yakongana pali pamwi, yaleta Yesu mwi Tengo lyao.

⁶⁷ Lyene yamunena yati, “Tunene, uzye wewe uli Katuula uwalavilwe?” Lelo nawe aasuka ati, “Ndi namunena musikuntaila,

⁶⁸ nupya ndi namuzya iuzyo, musikwasuka.

⁶⁹ Lelo kufuma ndakai Mwana wa Muntu amaikala kwi kasa lilunji lyakwe Leza wa maka onsi.”

⁷⁰ Alino yonsi yamuzya yati, “Uzye lyene wewe uli Mwana wakwe Leza?” Nawe aasuka ati, “Mwavwanga ukuti anene kwene.”

⁷¹ Alino yavwanga yati, “Tusikulonda umboni nauze! Sweisikulu twati tuyuvwila pa mulomo wakwe.”