Luka 20 - Amazwi Yakwe Leza 2013

Yesu yamuzya kuno wafumya maka

¹ Uwanda umwi lino Yesu wasambilizyanga antu mu Ng'anda ikulu yakwe Leza nu kukosola Ilandwe Lisuma, yasimapepo akalamba na yakasambilizya ya Masunde, pali pamwi na aikolo, iiza kunoli.

² Alino yamunena yati, “Tunene, uzye maka cii yano ukweti akucita vintu vii? Uzye aweni uwakupeela maka kwene yaa?”

³ Yesu nawe aasuka ati, “Nani kwene namamuzya iuzyo. Nenini,

⁴ uzye Yoane wafumizye kwi maka akuwatizya? Uzye akuli Leza nanti ku antu?”

⁵ Nao yatandika kupazyanya aisikulu yati, “Uzye tumati uli? Ndi twati, ‘Wafumizye kuli Leza,’ nawe amati, ‘Uzye lyene, pacani mutataile Yoane?’

⁶ Nupya tutangati, ‘Wafumizye ku antu,’ pano antu yaa yonsi yamatutama na mawe, pamulandu wakuti yasininkizya vino Yoane wali a kasema.”

⁷ Acino yaasuka yati, “Tutamanyile kuno wafumizye.”

⁸ Yesu nawe ayanena ati, “Nani kwene ntakumunena uwampela maka akucita vintu vii.”

Mulumbe wa alimi ya calo ca matingi

⁹ Lyene Yesu atwalilila kulanda, aumila antu mulumbe uu ati, “Kwali umuntu uwalimile calo ca matingi. Alino acipanzisya ku alimi, nga apita ku mpanga yuze pa nsita ntali.

¹⁰ Lino nsita yakuzombola yafika, atuma muomvi wakwe ku alimi kuti yakamupeleko mulingo wakwe uwa vizao vya matingi. Lelo alimi yamuma alino yamuzinga, nawe apita minwe mitupu.

¹¹ Lyene atuma muomvi namuze, lelo nawe kwene yamuma nu kumuvundanya, alino yamuzinga, apita minwe mitupu.

¹² Umwine wa calo atuma muomvi wakwe citatu, lelo nawe kwene yamucisa, alino yamusumbila kunzi ya calo.

¹³ Lyene mwine wa calo ca matingi ati, ‘Uzye namacita uli? Namatuma umwanane umonsi mukundwe. Mwanane wene yalamucindika!’

¹⁴ Lelo lino alimi yamulola, yavwanzyanya yati, ‘Wii ali mwana wakwe aalatoola icuma. Tuini tumukome, ni calo cimaya icitu!’

¹⁵ Caleka yamufumya kunzi ya calo ca matingi, nga yamukoma. Yesu auzya ati, “Uzye lyene, umwine wa calo ca matingi alacita uli ku alimi yao?

¹⁶ Aliza akome alimi yao, nu kupeela icalo ca matingi ku alimi yauze.” Lino antu yuvwile cii, yavwanga yati, “Citanga ciye vii awe!”

¹⁷ Yesu ayalolekesya nga ayauzya ati, “Uzye lyene, icalembwa cino cikati, ‘Iwe lino yakakuula yakanyile lyene lyacisilwe iwe lya pitungi lya ng'anda,’ cikasenula uli?

¹⁸ Wensi wino alaponela piwe lili, wene alavunolwa, Lelo wino wensi wino iwe lili lilaponela, wene alavungolwa.”

Iuzyo lya pa musonko

¹⁹ Yakasambilizya ya Masunde na yasimapepo akalamba yalondanga inzila yakuti yalemelemo Yesu pa nsita kwene ilya, pano yamanyile vino wayasyentekanga mu mulumbe. Lelo yoopa antu.

²⁰ Lino yakwata kasita kasuma, yatuma inengu izyaicisile kwati zya cumi, pakuti ziteye Yesu mu mazwi yano walandanga, kuti zingamupeela mu makasa ya mulasi uwali na maka pa uteko.

²¹ Caleka inengu zimuzya ziti, “Kasambilizya, twamanya vino ukalanda nga nu kusambilizya ivya cumi. Nupya twamanya vino utaya na kasoozi, lelo ukasambilizya Masunde yano Leza akalonda kuti antu yayela.

²² Uzye, ciine na Masunde yakwe Leza kuti, twasonka kuli Kesa nanti foo?”

²³ Lelo Yesu lino wamanya ucenjezi wao, ayanena ati,

²⁴ “Ndangizyini lupiya longa. Uzye usyu ni zina ilyaya penepo ivyakwe weni?”

²⁵ Nao yaasuka yati, “Ivyakwe Kesa.” Caleka nawe ayanena ati, “Lyene pelini Kesa vyakwakwe, Leza nawe mumupele vyakwakwe.”

²⁶ Lyene yaposiwa kumuteya mu mazwi yano walanzile kuku pa manso ya antu. Lyene lino yazunguka cuze pa kwasuka kwakwe, yazuka yaya cele.

Iuzyo lya pamulandu wa kuzyukuka kufuma ku afwe

²⁷ Lyene Asaduki yamwi, yano akati antu yatalazyukuka kufuma ku afwe, iiza kuli Yesu yamuzya yati,

²⁸ “Kasambilizya, Mose watulembile Isunde, ati, ‘Muntu ndi wafwa nu kusya umuci kwaula ana, umwina wakwe alinzile kupyana silenzi kuti amuvyalile ana.’

²⁹ Lyene kwali aina cinimbali. Uwakutandika watwite mama, nga afwa kwaula kusya nanti umwana.

³⁰ Lyene wakwe ciili apyana silenzi,

³¹ nga pacisila na wakwe citatu kwene. Mu musango uli onga yonsi kwene cinimbali yafwile, kwaula kusya umwana nanti wenga.

³² Pacisila umwanaci nawe kwene afwa.

³³ Uzye lyene, pa wanda wakuzyukuka wene alaya muci wakwe weni? Pano yonsi cinimbali yamutwite.”

³⁴ Yesu nawe ayaasuka ati, “Antu amu mukulo uu yakatwala nga nu kutwalwa.

³⁵ Lelo yao yano calinga kuzyukuka kufuma ku afwe nu kwikala pamwi na Leza mu umi upya, yene yatalatwala nanti kutwalwa.

³⁶ Pano yene yalakolana wa angeli, nupya yatangafwa. Yene ana yakwe Leza, pano yene yalazyukuka kufuma ku afwe.

³⁷ Na Mose kwene, mu mazwi alembwa pamulandu wa kupya kwa cimpuza, wasininkizye vino afwe yalazyukuka yaye nu umi, lino wamile Mwene ati, ‘Leza wakwe Abulaamu, na wakwe Isaki na Yakobo.’

³⁸ Wene asi Leza wa afwe, lelo a Leza wa antu aumi. Pano kunoli antu yonsi aumi.”

³⁹ Lyene yakasambilizya ya Masunde yamwi yamunena yati, “Kasambilizya, wavwanga ningo!”

⁴⁰ Lyene kutali umuntu wakuti auzye Yesu iuzyo na lyuze.

Iuzyo lya pali katuula uwalavilwe

⁴¹ Yesu ayauzya ati, “Uzye yangalanda uli yati Katuula Uwalavilwe umwana wakwe Davidi?

⁴² Davidi umwisikulu walanda mu lupapulo lwakwe Masamu ati, ‘Mwene wanenyile Mwene wane ati, Ikala kwi kasa lilunji lyane

⁴³ kufika lino ndakucimvizya anisi yako kuti yaye wa cilimba ca ngazo zyako.’

⁴⁴ Davidi wamwamile ati, ‘Mwene.’ Uzye lyene, Katuula uwalavilwe angaya uli umwana wakwe Davidi?”

Yesu wasokela alondezi yakwe pamulandu wakwe yakasambilizya ya Masunde

⁴⁵ Lino antu yonsi yakuuvwa kunoli, Yesu anena alondezi yakwe, ati,

⁴⁶ “Cenjelini kuli yakasambilizya ya Masunde, yano atemwa kutandala ni mingila yao itali nu kulamukwa nu mucinzi mu masokoni. Yano atemwa kwikala pa vilimba vya ucindami mu mang'anda ya mapepo na pa vifulo visuma pa vimulo.

⁴⁷ Yano akaliila yamukamfwilwa vyuma mu ucenjezi nu kuyasomba pa kuyapepela mapepo atali. Yaa, kuvunukwa kwao kulaya kukulu cuze.”