Luka 16 - Amazwi Yakwe Leza 2013

Mulumbe wakwe kangalila uwali incenjezi

¹ Yesu anena alondezi yakwe ati, “Kwali umuntu mukama uwakweti kangalila wino wapilwe mulandu wakonona vyuma vyakwe.

² Caleka aama kangalila amunena ati, ‘Icani cii, cino nkuuvwa pali wewe? Leta tuvwe ndole vyalembwa pamulandu wa wangalizi wako, pano nupya utangaya kangalila.’

³ Kangalila nawe aivwanzya umwisikulu ati, ‘Mwene wane amanzinga pa ncito yane. Uzye namacita uli? Ntakoma ku kulima, nupya nakwata ni nsonyi zyakulenga.

⁴ Endi, namanya vino ndacita lino yalanzinga pa ncito, pakuti antu yace yampokelele.’

⁵ “Caleka aama kunoli wenga pa antu yonsi yano ali ni nkongole ku mwene wakwe. Auzya wankolelo ati, ‘Uzye uli ni nkongole zinga ku mwene wane?’

⁶ Nawe amunena ati, ‘Mafuta kulingana manye yalita makumi yatatu na cinimbali.’ Kangalila amunena ati, ‘Tola apalembwa nkongole zyako, ikala pansi zuwa ulembepo makumi yasano.’

⁷ Lyene auzya wakwe ciili ati, ‘Uzye nawe wakongola zinga?’ Nawe amunena ati, ‘Masaaka ya ngano myanda itatu na makumi yasano.’ Kangalila amunena ati, ‘Tola apalembwa nkongole zyako, ulembepo masaaka ya ngano myanda iili na makumi cinani.’

⁸ “Lyene mwene alumbanya kangalila uwali incenjezi pamulandu wakucenjela kwakwe, pano antu alondela vyamu nsi ii, amisango ili yonga, yacenjela kuluta antu yano yakapita mu luswepo lwakwe Leza.”

⁹ Caleka namunena ukuti muomvye vyuma vya ucenjezi mu kwandana ucuza, pakuti lino vyuma vyasila yakamupokelele mu ng'anda yape.

¹⁰ Wino ali uwakutailwa mu vintu vinono alaya uwakutailwa nu mu vintu vingi. Wino asi uwakutailwa mu vintu vinono atalaya uwakutailwa nu mu vintu vingi kwene.

¹¹ Lyene ndi usi uwakutailwa mu kusunga kwa vyuma vya ucenjezi, ungaya uwakutailwa uli mu kusunga kwa vyuma vya cumi?

¹² Nanti ndi utali uwakutailwa pa cintu cisi cako, uzye aweni angakupeela cintu cako?

¹³ “Pasi muomvi angaombela aene yaili. Pano angapata wenga nu kutemwa umuze, nupya angayela wenga nu kusula umuze. Mutangaombela Leza nga ni vyuma.”

Kulanda pa Masunde nu Wene wakwe Leza

¹⁴ Lyene Afaliseo lino yuvwa vii yasoweka Yesu, pano yatemilwe vyuma.

¹⁵ Yesu ayanena ati, “Mwemo mukaizifilizya pa manso ya antu lelo Leza wamanya vyaya mu myenzo inu, pano vintu vino antu yakaelenganya ukuti vyacindamisya kunoyali ala ivya winyi pa manso yakwe Leza.

¹⁶ “Ivyalembwa mu mpapulo zyakwe Mose na zyakwe yakasema vyakosozilwe kufika mu manda yakwe Yoane Kawatizya. Kufuma papo kwene Ilandwe Lisuma lya Wene wakwe Leza likukosolwa, na wensi akwezya na maka kwingilamo.

¹⁷ Lelo icangupale iyulu ni nsi ukusila kuluta kalitoni konga kamu Masunde kafumiwepo.

¹⁸ “Muntu wensi uwata umuci wakwe nu kutwala muze, ala walongozya. Na wino uwatwala umwanaci wino yata, ala walongozya.

Lazalo nu muntu Mukama

¹⁹ “Kwali umuntu mukama uwazwalanga insalu ziyenzulukile zyamutengo, uwalyanga ningo nupya watenzi mu luzango lwa manda pe.

²⁰ Apa mpongolo ya ng'anda yakwe pakupaanga mupina umwi, izina lyakwe a Lazalo, uwali ni vilonda mwili onsi.

²¹ Nupya wakumbwanga ukulya tuvungwa utwaponanga kufuma ku cipango ca mukama. Nu kuluta pali cii yasimbwa yamumyantilanga ivilonda.

²² “Mupina asuka afwa, asendwa na angeli ku kwikala pipi na Abulaamu. Mukama nawe kwene afwa nu kuzikwa azikwa.

²³ Lyene kuzimo kuno wali mukucula kukulu cuze, asanzula amanso alola Abulaamu patali, na Lazalo ala atenzi pipi nawe.

²⁴ Lyene alaizya ati, ‘Tata Abulaamu, uye na mizu panondi, untumile Lazalo atimpike insongo ya munwe wakwe mu manzi kuti aiize azusye ululimi lwane. Pano nkucula cuze mu moto uu.’

²⁵ “Lelo Abulaamu avwanga ati, ‘Cuza wane, iusya vino mu nsita ya umi wako wapezilwe vintu vyonsi visuma, lino Lazalo wene wapilwe vintu vyonsi viipe. Lelo ndakai wene kuno watatekeziwa, lino wemo ukucula cuze.

²⁶ Nupya lola, kuli manga izike cuze pakasi kako naswe, cakuti yano akulonda kulamba kufuma kuko ukwiza kuno yatangacicita, nanti asweswe kwene tutangiza kuko.’

²⁷ Mukama nawe ati, ‘Tata, lyene nakulenga kuti utume Lazalo ku ng'anda yakwe tata,

²⁸ pano nkweti aina yane yasano. Leka apite akayaceule kuti nao yatakize ku cifulo cii ica ucuzi.’

²⁹ “Abulaamu ati, ‘Anyonko yakweti mpapulo zyakwe Mose na yakasema zya kuyasoka. Leka yuvwe ivyaya mwenemo.’

³⁰ Mukama ati, ‘Tata Abulaamu, cico citangaciyazwe! Lelo ndi umwi uwamu afwe wazyukwike nu kuya kunoyali, lyene yangazenzuka.’

³¹ Lelo Abulaamu amunena ati, ‘Ndi yataluvwa ivyaya mu mpapulo zyakwe Mose na yakasema, nanti umwi angazyukuka kufuma ku afwe yatangasininkizya.’”