Luka 13 - Amazwi Yakwe Leza 2013

Zenzukini kuti mutakafwe

¹ Pa kasita kaka kwali antu anenyile Yesu pamulandu na ina Galile yano Pilato wakomile lino yapelanga impolelwa kuli Leza.

² Yesu ayauzya ati, “Pamulandu uno aina Galile yalya yakomilwe mu musango ulya, uzye mukwelenganya vino yene yali akaifya kuluta aina Galile yauze onsi?

³ Namunena nati, awe. Lelo ndi mutangazenzuka, mwensi kwene mulalowa wakwe vino yalovile.

⁴ Nanti antu yaya ikumi na cinani, yano akomilwe lino ulupungu lwa mu Siloamu lwayaponile, uzye mukwelenganya vino yali akaifya kuluta antu yauze yonsi amu Yelusalemu?

⁵ Namunena nati, awe. Lelo ndi mutangazenzuka, mwensi kwene mulalowa wakwe vino yalovile.”

Mulumbe wa musamvu uno utaseekanga vizao

⁶ Lyene Yesu ayanena mulumbe ati, “Kwali umuntu uwakweti calo ca matingi muno mwali musamvu uwakulanga. Lyene waile ku kulonda masamvu ku musamvu, lelo atazanyileko nanti lyonga.

⁷ Caleka wanenyile muomvi uwamu calo ati, ‘Uvwa! Pa myaka itatu nkaiza mu kulonda masamvu ku muti uu, lelo nsizanako nanti lyonga. Ukome upone pansi! Uzye pacani cino wene ungafumwila musili mu calo?’

⁸ Lelo muomvi aasuka ati, ‘Mwene leka uye, tuulolele pa mwaka onga sile. Nemo ndaulimilila mwisika nu kwikamo muvundo.

⁹ Lyene ndi waca waseeka masamvu mu mwaka ukwiza, cilazipa. Lelo ndi waca utaseesile, lyene ulakomwa.’”

Yesu wapozya umwanaci cilema pa Sabata

¹⁰ Pa Sabata Yesu wasambilizyanga mu ng'anda imwi ya mapepo.

¹¹ Mwali umwanaci uwali nu mupasi wankota uno wamucisile cilema pa myaka ikumi na cinani. Wakongozanga nupya atololokanga.

¹² Lino Yesu wamulola, amwama, amunena ati, “Mwanaci we, wakululwa ku ndwala yako.”

¹³ Alino Yesu amwikapo makasa yakwe, nga lilyo kwene mwanaci aololoka alumbanya Leza.

¹⁴ Intunguluzi yamu ng'anda ya mapepo ikalipa pano Yesu wapozya umuntu pa Sabata. Caleka ivwanga ku antu iti, “Kwaya manda mutanda yano tungaombamo. Caleka mwaiza mu manda yaa mukupoziwa, lelo mutaiza pa Sabata!”

¹⁵ Lyene Mwene nawe amunena ati, “Yasomvi mwe! Uzye wenga muli mwemwe asyasapula masae nanti punda wakwe kufuma mu luwa nu kumupeela manzi pa Sabata?

¹⁶ Ngu mwanaci wii uwamu luko lwakwe Abulaamu, wino Ciwa wanyepa mu uzya pa myaka ikumi na cinani, uzye wene atangapoziwe pa Sabata?”

¹⁷ Lino walanda vii, anisi yakwe yaya ni nsonyi, lelo antu yonsi ala yakuzanga pa vintu vyonsi vyakuzunguka vino wacitanga.

Mulumbe wa lumbezu lwakwe musunta

¹⁸ Lyene Yesu auzya ati, “Uzye Uwene wakwe Leza ukoline na cani? Uzye ningaukolanya ku cani?

¹⁹ Ukoline wa lumbezu lwakwe musunta, luno umuntu watile mu calo cakwe. Lyene lino lwamela luya musunta, nga akula aya umuti, ni vyunyi viluka vinsanzo mu misambo ya cisao cauko.”

Mulumbe wa citutumusi

²⁰ Nupya kwene auzya ati, “Uzye Uwene wakwe Leza ningaukolanya kuli cani?

²¹ Ukoline wa citutumusi cino umwanaci watozile atikanya nu usu wa ngano uwingi kufika lino umunya watutumuka.”

Mulyango ufyenkane

²² Lyene Yesu apita mu misumba nu mu mizi, ala akusambilizya lino ali pa lwendo lwaku Yelusalemu.

²³ Umwi amuuzya ati, “Mwene, Uzye antu alatuulwa anono sile?” Nawe ayaasuka ati,

²⁴ “Lwisini kwingilila pa mulyango ufyenkane. Pano namunena vino antu aingi yalalonda kwingila, lelo yalaposiwa.

²⁵ Mwine wa ng'anda alakatuka nu kuyali cisasa. Lyene mulimilila panzi nu kutandika kukonkonsya ku cisasa nu kuti, ‘Mwene, tuyulileko!’ Nawe alaasuka ati, ‘Ntamanyile kuno mufumile.’

²⁶ Lyene mulamunena muti, ‘Twalyanga nu kumwa pamwi nawe. Wasambilizyanga mu misumba itu.’

²⁷ Lelo nawe alaasuka ati, ‘Ntamanyile kuno mufumile. Fumini pano, mwe yakacita ya viipe.’

²⁸ Lyene kulaya kulila nu kulumanya incecete lino mulalola Abulaamu, Isaki, na Yakobo, na yakasema yonsi mu Wene wakwe Leza, lino mwemo mulasumbwa kunzi!

²⁹ Antu yalafuma ku ufumondaka nu ku uwondaka, ku katutu nu ku kaeya, nu kwikala pa cimulo mu Wene wakwe Leza.

³⁰ Acisila yalaya ankolelo, na yao ali ankolelo ndakai yalaya acisila.”

Yesu walila pamulandu wa antu amu Yelusalemu

³¹ Pa kasita kaka yamwi amu Afaliseo iiza kuli Yesu yamunena yati, “Fuma kuno pitanga, pano Helodi akulonda kukukoma.”

³² Yesu nawe ayanena ati, “Pitini mukanene nkusa wiyo muti, ‘Nkufumya mipasi yankota nu kupozya alwale ilelo na mutondo na pa wanda walenga yatatu ndamalila kuomba.’

³³ Lelo uwilelo na mutondo, nu wanda walondelela, ndinzile ntwalilile nu ulendo wane. Pano citaine kuti kasema akomwe kuze suka mu Yelusalemu.

³⁴ “Mwe antu amu Yelusalemu, Yelusalemu! Mwakoma yakasema nu kutama na mawe inkombe zino Leza watuma kunomuli. Amaila yanga yano nalondanga kumufukatila, wakwe vino nyinankoko akafukatila ana mu maapa yakwe, lelo mutanzumilizya!

³⁵ Acino Ng'anda inu ikulu yakwe Leza ilasyala citotela. Cumi namunena vino mutalandola, kufika pa nsita ino mulavwanga muti, ‘Walongo awiyo akwiza mwi zina lya Mwene.’”