Loma 3 - Amazwi Yakwe Leza 2013

¹ Uzye lyene Ayuda yaluta Akulukuwa? Nanti uzye muzano cii uwaya mu kusilamulwa?

² Endi, umu nzila zingi, mwaya muzano wakuya Muyuda! Ca nkolelo, mazwi yakwe Leza yavwanzilwe ku Ayuda.

³ Nanti angala yamwi munoyali yatali akutailwa, uzye kuntaya akutailwa ukungalanga ukuti Leza nawe ataya uwakutailwa?

⁴ Mucumi citangaya! Lelo Leza wene akalanda vya cumi. Nanti angala antu yonsi yaya antumpu. Cili wakwe vino calembwa mu malembelo cati, “We Leza, leka antu yamanye ukuti vino ukalanda ivya cumi, nu kuti ukayasinda ndi yakulolwesya mulandu.”

⁵ Ndi twacita viipe ala cikulanga ukuti Leza wene mololoke, uzye lyene tungati uli? Uzye tungati Leza asyalungika lilyo lino akatuvunuka? Nkulanda ndi vino antu yakalanda

⁶ Awe citangaya! Ndi Leza asi mololoke, uzye lyene angapingula uli amu nsi?

⁷ Lelo ndi cumi cakwe Leza calumbanyiwa pa kutumpoka kwane, uzye pacani cino ningavunukwa wakwe kaifya?

⁸ Uzye lyene pacani tutangavwanga tuti, “Katwacita viipe pakuti visuma viloleke?” Avino na antu yamwi yakansausya pa kutumpoka ukuti nani avino nkalanda! Yene yalavunukwa wakwe vino cingayalinga.

Kutaya muntu Mololoke

⁹ Uzye lyene caya uli? Uzye swe Ayuda twaluta antu yauze? Awe cisi vivyo! Twati tulondolola mpiti ukuti Ayuda pamwi na Akulukuwa yonsi kwene yatekwa uzya na maifyo.

¹⁰ Ndi vino malembelo yakati, “Kusi umuntu nanti wenga mololoke!

¹¹ Kusi umuntu nanti wenga akauvwikisya, nanti akalonda Leza.

¹² Antu yonsi yafutatila Leza. Antu yonsi aponge, kusi umuntu nanti wenga akacita visuma, awe kusi nanti wenga.

¹³ Milomo yao yakolana wi lindi lili casi. Indimi zyao zikavwanga ivyaufi pa milomo yao pakafuma ulembe ngati uwakwe cipili.

¹⁴ Mu milomo yao mwazula intipu zipisye.

¹⁵ Yene yakampuka kucisa nu kukoma auze.

¹⁶ Konsi kuno yapita, yakasya uononyi nu ulanda.

¹⁷ Yatamanya kwikala mu mutende.

¹⁸ Yene yasyaoopa nanti a Leza kwene.”

¹⁹ Lelo swemo twamanya ukuti vyonsi ivyaya mu Masunde vyakuma antu kwene yao apilwe Masunde, pakuti kutaya umuntu nanti wenga uwakuipela insambu, nga na pakuti amu nsi yamanye vino Leza alayapingula.

²⁰ Pano kusi umuntu nanti wenga wino angaya mololoke pa manso yakwe Leza pa kuyela sile Masunde. Mulimo wa Masunde ukulanga vino umuntu wifya.

Vino Leza akatucita kuya aololoke

²¹ Ndakai Leza watasokolola inzila yakwe yakucitilamo antu yaye aololoke pa manso yakwe kwaula Masunde.

²² Leza akacita antu kuya aololoke pa manso yakwe kupitila mu utailo wao muli Yesu Klistu. Leza akacita vivyo ku muntu wensi wataila muli Yesu Klistu, pano Leza ataya na kasoozi.

²³ Pano antu yonsi iifya, nupya yali kutali na Leza wino akatuula.

²⁴ Lelo pamulandu wa wila wa cikuku cakwe Leza, wene akayalenga kuya aololoke kupitila muli Klistu Yesu wino akayalenga kuya antungwa.

²⁵ Leza wamutumile Klistu kuya impolelwa kuti mu mfwa yakwe amuno maifyo ya antu yangelelwa pa kutaila munoli. Leza wacisile vii pa kulanga ukuti wene mololoke. Mpiti Leza watekanga umwenzo nu kusulako ku maifyo yano antu yacitanga.

²⁶ Lelo Leza wimika Yesu pakuti alange kuti wene mololoke. Avino Leza umwine akailanga vino wene mololoke nu kucita muntu wensi kuya mololoke uwataila muli Yesu.

²⁷ Uzye lyene tungailumba pacani? Pasi! Uzye lyene ale apamulandu cii? Uzye apamulandu wakuti tukayela Masunde? Awe! Lelo apamulandu wakuti twataila.

²⁸ Pano twasininkizya ukuti Leza akacita umuntu kuya mololoke pa manso yakwe kupitila sile mu utailo, lelo asi pamulandu wa kuyela sile Masunde.

²⁹ Nanti uzye Leza a Leza wa Ayuda sile? Uzye na Akulukuwa kwene asi a Leza wao? Cumi kwene a Leza wao.

³⁰ Leza a wenga, nupya alacita Ayuda kuya aololoke pa manso yakwe kupitila mu utailo wao. Na Akulukuwa nao kwene alayacita kuya aololoke pa manso yakwe kupitila mu utailo wao.

³¹ Uzye lyene tungati pa utailo kwene uu twafutatila Masunde? Awe, cisi vivyo! Mu cifulo cakwe cii, tukakomelezya kuyela Masunde.