Loma 16 - Amazwi Yakwe Leza 2013

Ulau kuli yacuza

¹ Nkweti visuma vya kulanda pali nkazizyo Febi, wino akatumikila Iuvi lyamu Kenkelea.

² Mumupokelele mwi zina lya Mwene, wakwe vino antu yakwe Leza yalinzile kupokelelwa. Mwazwini muli vyonsi vino angalonda kwazwiwa, pano wali a cuza wa antu aingi pamwi nani kwene.

³ Natuma ulau kuli Pulisila na Akwila, aomvi yanji mu kutumikila Yesu Klistu.

⁴ Yene yatasakamile umi wao pamulandu wane. Nkutaizya kunoyali, asi nene nenga, lelo na mauvi yonsi ya Akulukuwa.

⁵ Natuma ulau kwi uvi ilikapepela mu ng'anda yao. Natuma ulau kuli cuza wane Epanatusi, uwali ali muntu wakutandika kutaila muli Klistu mu muputule wa mpanga ya Asiya.

⁶ Natuma ulau kuli Maliya wino akatumikila cuze apamulandu winu.

⁷ Natuma ulau kuli Andolonika nga na Yuniasi, Ayuda yanji yano ali pamwi nani mu ng'anda yaminyololo. Yamanyikwa cuze mu atumwa, nupya yali ankolelo pali nene kuya aina Klistu.

⁸ Natuma ulau wane kuli Ampiliatosi cuza wane mukundwe mu Mwene.

⁹ Natuma ulau na kuli Ubanusi kwene muomvi pamwi naswe mu mulimo wakwe Klistu, nga na kuli Sitakisi mukundwe wane.

¹⁰ Natuma ulau kuli Apele wino wasininkiziwa kuya uwa cumi kuli Klistu. Natuma ulau ku amu ng'anda yakwe Alistobulusi,

¹¹ Ulau kuli Helodioni, Muyuda unji nga nu ku ina Klistu, aina yane amu ng'anda yakwe Nakisosi

¹² Natuma ulau wane na kuli Tulafaeni na Tulafosa, akatumikila Mwene, nga na kuli cuza wane mukundwe Pesisi, uwaomba mulimo ukulu cuze uwa Mwene.

¹³ Natuma ulau kuli Lufusi, muomvi wa kuzunguka mu kutumikila Mwene, nga na kuli nyina wino akansunga lyonsi wa mwana wakwe.

¹⁴ Natuma ulau kuli Asiklito, Fulegoni, Hemesi, Patlobasi Hemasi nga na ina itu yonsi a Klistu yano yali nao.

¹⁵ Natuma ulau kuli Filologasi na Julia, na kuli Neleusi na kaci wakwe, na kuli Olimpasi pamwi na antu yakwe Leza yonsi yano ali nao.

¹⁶ Mulamukane mu kutonsolana kwa wina. Mauvi yonsi yakwe Klistu yakumulamuka.

Utunguluzi wakusyalikizya

¹⁷ Nkumupapata mwe inane, mucenjele kuli yao akapatukanya iuvi nu kuvulunganya utailo wa antu pa kuntacita vintu vino mwensi mwasambiliziwe. Fuminiko kunoyali, muyasoloke.

¹⁸ Pano yao akacita vii yasyatumikila Klistu Mwene witu, lelo yakatumikila vilondwa vyao. Kupitila mu mazwi yao akusyenteka nga ni mvwango zyao zya kutasya mwi syente, yene yakasomba antu akaele yano atakuma ku vintu vii.

¹⁹ Antu yonsi yuvwa vino mwaya acumi kwi Landwe Lisuma nga pamulandu kwene uu, nemo ndi nu luzango pali mwemwe. Nkulonda muye a mano pali cino icili cisuma, lelo muye akaele mutakumako ku viipe.

²⁰ Na Leza ali ntulo ya mutende, alavungola Ciwa apisika ya ngazo zinu. Cikuku ca Mwene witu Yesu Klistu ciye namwe.

²¹ Timoti muomvi unji, watuma ulau wakwe kunomuli. Vivyo kwene na Lusio, Yasoni na Sosipata, Ayuda yanji, nao yatuma ulau wao.

²² Nani ne Telitasi, kalemba wakwe kalata wii, natuma ulau wa muli Klistu.

²³ Mwine ng'anda Gayusi, muno Iuvi likakongana, nawe kwene watuma ulau. Elasita, kasunga wa cipao camu musumba, nga nu mwina witu Kwatosi, nayo kwene yatuma ulau.

²⁴ Cikuku ca Mwene witu Yesu Klistu ciye namwe

Leza alumbanyiwe

²⁵ Ka twalumbanya Leza! Wene ali na maka yakumukomya mu utailo winu kulingana ni Landwe Lisuma lino nkakosola pamulandu wakwe Yesu Klistu nga nu kulingana nu kusokoloka kwa nkama ya cumi icali icifiswe kufuma ku mikulo yampiti na mpiti.

²⁶ Lelo ndakai cumi cico casokololwa apaswe muli vino yakasema yalemvile. Lyene Leza, uwa manda pe nawe wapela ilamulo kuti nkama imanyikwe ku nko zyonsi pakuti antu yonsi yataile nu kuyela.

²⁷ Ku Mwene Leza wenga sile, wino wenga uwaya uwa mano, kuye lulumbi muli Yesu Klistu, pe na pe. Ameni.