Loma 15 - Amazwi Yakwe Leza 2013

Mutaizanzya lelo mwazanzya auzo

¹ Swe muno twakoma mu utailo twaazwilizya yano atali yakome pakuti yaposya mu macuzi yao. Tutacita vyakutuzanzya sweisikulu.

² Lelo cila muntu aezya kuzanzya mwina atali akome pakuti akomelezye utailo wakwe.

³ Pano Klistu nawe kwene ataizanzyanga umwisikulu. Lelo cili ndi vino calembwa mu malembelo cati, “Antu amutuka ala nani kwene yantuka.”

⁴ Vyonsi ivyalembwa mu malembelo vyalemvilwe ukutusambilizya, pakuti tuye nu upaalilo kupitila mu kutekeziwa nu kukomeleziwa kuno malembelo yakutupela.

⁵ Leza, wino akatupeela maka akuteeka myenzo nu kukomeleka, amwazwe mwikale ni lango lyonga lino mukulondela mwata wakwe Klistu Yesu.

⁶ Lyene mwensi pamwi mwalumbanya Leza, Isi wa Mwene witu Yesu Klistu.

Akulukuwa nayo yuvwako Ilandwe Lisuma

⁷ Mwazengelana mwensi ndi vino Klistu wamuzengile, pakuti Leza alumbanyiwe.

⁸ Pano nkumunena vino Klistu watumikilanga Ayuda pa kulanga ukuti Leza uwa cumi pa kufikilizya vino walavile vikolwe vyao,

⁹ alino na kuti Akulukuwa nao kwene yalumbanya Leza pa kuyayela mizu. Ndi vino calembwa mu malembelo cati, “Acino ndakulumbanya pakasi ka Akulukuwa Ndaimba nyimbo zyakukulumbanya.”

¹⁰ Nupya calembwa mu malembelo pamulandu wa Akulukuwa cati, “Mwe Akulukuwa zangini pamwi na antu yakwe Leza.”

¹¹ Nupya calembwa mu malembelo cati, “Lumbanyini Mwene mwe Akulukuwa mwensi. Mulumbanyini mwe antu onsi.”

¹² Nupya kasema Ezaya akuti, “Umwi, cizikulula cakwe Yese aliiza. Wene aliiza mu kuteeka Akulukuwa, nga nao yalika upaalilo wao munoli.”

¹³ Mwene Leza ali ntulo ya upaalilo, aleke muzange muye nu mutende cuze kupitila mu utailo winu munoli, pakuti upaalilo winu utwalilile kukula mu maka yakwe Mupasi Wamuzilo.

Mulandu uno Paulo walemvile nu kupama

¹⁴ Inane nemwisikulu nkusininkizya ndi vino mwensi mwemwe yasuma cuze, nu kuti mukweti kumanya konsi, nga na maka akusambilizyanya.

¹⁵ Lelo muli kalata wii napama pa kulemba pa milandu imwi ino nati imwiusya. Napama pamulandu wi syuko lino Leza wampela,

¹⁶ lyakuya muomvi wakwe Yesu Klistu uwa kuombela Akulukuwa. Nkatumikila wakwe simapepo pa kukosola Ilandwe Lisuma kufuma kuli Leza, pakuti Akulukuwa yangaya wa mpolelwa iyapokelelwa kuli Leza, apalamikwa kunoli mu maka yakwe Mupasi Wamuzilo.

¹⁷ Mukuilundanya na Yesu Klistu, lyene nemo ningaya ni cilumba cakutumikila Leza.

¹⁸ Ndapama nu kulanda sile pali vino Mwene Yesu Klistu wacita kupitila munondi pa kutungulula Akulukuwa mu kuyela Leza. Wene wacita cii mu mazwi nga nu mu micitile,

¹⁹ mu maka ya vinjelengwe ni vizungusyo, nga nu mu maka yakwe Mupasi Wamuzilo. Acino mukupita ulendo kufuma ku Yelusalemu kufika ku Ililikumu, nasalanganya Ilandwe Lisuma lya pali Yesu Klistu.

²⁰ Kulondesya kwane lyonsi ukwakuti nkosole Ilandwe Lisuma mu vifulo vino Klistu atuvwika, pakuti ntakuula pa mufula uno umwi wimba mpiti.

²¹ Wakwe vino calembwa mu malembelo cati, “Yano onsi atanenyilwe vya pali aliwe, yalalola, nga na yao atuvwa vya pali aliwe yaluvwikisya.”

Paulo wapanga kuya ku Loma

²² Acino pamulandu kwene uu nalesiwa maila aingi kwiza kunomuli.

²³ Lelo ndakai pano natimala kutumikila mu miputule ya mpanga ino, nga na pamulandu wakuti pa myaka iingi nalondesyanga kuti nize mulole,

²⁴ nkupaalila kucita cii pali ndakai. Ningatemwa kuti nize mulole twikale namwe pa nsita imwi lino ndapita kuya ku Sipeni, pakuti muce mungazwilizye ulendo wa kufikako.

²⁵ Ndakai, nanti cingaya vivyo, nkuya ku Yelusalemu ku kutumikila antu yakwe Leza.

²⁶ Pano mauvi aku Makedoniya nu ku Akaya mukuitemelwa yasola ukusangula uwila wakwazwa antu yakwe Leza, apina amu Yelusalemu.

²⁷ Ku kwali kusola kwao. Lelo ukwankanya impiya zyao ku Ayuda cali wa kulipa inkongole, pano Ayuda yalanga yankanyako Akulukuwa kupolelelwa kwao kwa mu mwenzo.

²⁸ Lino ndamala mulimo wa kuyapela lupiya lonsi luno yasangwile, ndiza kwiza mutandalila, nga pacisila inje ku Sipeni.

²⁹ Lino ndiza kunomuli, manyile vino ndiza mu kuvulilwa kwa upolelelo wakwe Klistu.

³⁰ Nkumupapata inane, mu Mwene witu Yesu Klistu nu mu kutemwa kuno Mupasi Wamuzilo akapela, ukuti muilundanye mu kupepa na maka pamwi nani kuli Leza pamulandu wane.

³¹ Pepini pakuti ntaponela mu makasa yakwe yao atataila amu Yudeya nga na pakuti kutumikila kwane mu Yelusalemu kungapokelelwa na antu yakwe Leza aya mwenemo.

³² Acino lyene Leza ndi akasi ndiza kunomuli nu luzango cuze, nga ndatemwa pa kumutandalila nupya.

³³ Leza ali ntulo ya mutende, aye namwe mwensi. Ameni.