Loma 14 - Amazwi Yakwe Leza 2013

Mutapingula auzo aina Klistu

¹ Mwazengela umuntu wino utailo wakwe usi ukome, lelo mutapazyanya nawe pali vino umwisikulu akaelenganya.

² Muntu umwi akaelenganya vino angalya cilyo cili consi, lelo umuntu muze wino atali akome mu utailo akalya sile musalu.

³ Muntu akalya cili consi atalinzile kusula wino akasola vyakulya, vivyo kwene na akalya musalu atapingula akalya cili consi pano avino Leza wamuzengela.

⁴ Uzye wewe weni uwakupingula muomvi wa muntu umwi? Musambazi wakwe aliwe alinzile kulola ndi akuomba ningo nanti akuposiwa. Wene alaomba ningo, pano Mwene waya na maka akuti aleke aombe ningo.

⁵ Muntu umwi akaelenganya ukuti uwanda umwi wacindama kuluta manda yauze, lino muze nawe akaelenganya ukuti manda onsi alingane. Cila muntu alinzile asininkizye cipuma mu mwenzo wakwe.

⁶ Wino wensi akacindikisya uwanda umwi, wene akacita cii mu kucindikilamo Mwene. Na wino wensi akalya cilyo cili consi wene akacita cii mukucindikilamo Mwene, pano akataizya Leza pa cilyo. Na wino wensi akakana kulya vintu vimwi, wene akacita cii mukucindikilamo Mwene nga nu kutaizya Leza.

⁷ Pano pasi umwi uwa munotuli angaikalila umumi umwisikulu nupya pasi umwi angaifwila umwisikulu.

⁸ Ndi twikala aumi, ale apamulandu wa Mwene. Acino nanti tuye aumi, nanti tufwe, sweswe antu ya Mwene, nga icili conga ndi twafwa.

⁹ Pamulandu kwene uu Klistu wafwile nu kuzyukuka kufuma ku mfwa, kuti aye Mwene wa afwe na aumi.

¹⁰ Uzye wemo we muno ukalya sile musalu, pacani ukupingula munyonko akalya cilyo cili consi? Nawe we muno ukalya cilyo cili consi, uzye pacani ukasausya munyonko? Swensi kwene tulimilila pa manso yakwe Leza kuti atupingule.

¹¹ Pano calembwa mu malembelo cati, “Mwene akuti, Cumi pano nene Leza wa umi cila muntu alamfukamila, nupya alailandila ukuti nene Leza.”

¹² Acino wensi uwa munotuli alailongwela vyonsi kuli Leza.

Utaleka Munyonko Apone

¹³ Caleka lyene tute kupingulana. Lelo mu cifulo cakwe cii, tulinzile kuntacita cingalenga munyonko aponele mu kwifya.

¹⁴ Mu kuilundanya nu Mwene Yesu Klistu, nasininkizya vino Leza wacita vyakulya vyonsi kuya visanguluke. Lelo ndi ukwelenganya ukuti vyakulya vimwi ivikowele, ale lyene kunuli ivikowele.

¹⁵ Ndi ukucisa auzo pamulandu na vino ukalya, ale usyakucita cii mu lukundo. Acino mutaleka indya inu yonone umuntu wino Klistu wafwilile!

¹⁶ Mutaleka antu yamwi yalanda viipe pa vintu vino mukati visuma.

¹⁷ Mu Wene wakwe Leza cintu cikulu asi kulya nanti kumwa, lelo kucita vyawololoke, mutende nu luzango, vino vikapelwa na Mupasi Wamuzilo.

¹⁸ Umwi ndi akutumikila Klistu mu musango uu, ale lyene amazanzya Leza, na antu nayo yamamucindika.

¹⁹ Caleka tulinzile kwezya kwikala mutende nu kwazwana kukwata utailo ukome.

²⁰ Mutaleka indya inu yonone mulimo wakwe Leza. Vyakulya vyonsi vilinzile kuliwa, lelo caya ukuluvyanya lino mwalenga auzo ukwifya pamulandu wa vyakulya vino mukalya.

²¹ Cintu cisuma kucita ukuntalya inyama nu kuntamwa waini, nga nu kuntacita cili consi cingalenga munyonko ukwifya.

²² Leka vino wataila pali cii, viye sile pakasi kako na Leza. Walongo umuntu wino asyailola kuya uwa mulandu lino akucita cimwi cino waipingula ukuti icisuma!

²³ Lelo ndi akutwisika pali vino akalya, ale ali nu mulandu pano micitile yakwe isi pa utailo. Na consi cisi pa utailo ala iifyo.