Loma 10 - Amazwi Yakwe Leza 2013

¹ Inane kulonda kwa mwenzo wane ni pepo lyane kuli Leza, pa ina Izlaeli onsi, ilya kuti yatuulwe.

² Pano nene kambone wao pali vino yaipelesya kuli Leza. Lelo yatamanya ningo vino kuipelesya kwao kulinzile kuye.

³ Pano yatamanya inzila ino Leza akacitilamo antu kuya aololoke pa manso yakwe. Lelo mu cifulo cakwe cico, yene yezya kuya aololoke umu nzila yao aisikulu. Nupya yatazumila nzila yakwe Leza ino akacitilamo antu kuya aololoke pa manso yakwe.

⁴ Klistu ali kufikilizya kumalilike kwa Masunde yakwe Mose, pakuti wensi uwataila munoli, Leza akamucita kuya mololoke pa manso yakwe.

Muntu ali wensi angatuulwa

⁵ Pamulandu wakuya aololoke pa manso yakwe Leza, Mose walemvile ati, “Muntu akayela Masunde wene alaya nu umi mu kuyela Masunde.”

⁶ Lelo vino calembwa mu malembelo pamulandu wakuya aololoke pa manso yakwe Leza, kupitila mu utailo aivi, “Utayuzya mu mwenzo uti, uzye aweni alakwela kwiyulu?” Kuli kuti ku kunena Klistu kuti aike.

⁷ “Nanti ukuti, uzye aweni angaya ku cifulo ca afwe?” Kuli kuti ku kukatusya Klistu kufuma ku afwe.

⁸ Lelo malembelo yakati, “Mazwi yakwe Leza yasi kutali nawe, lelo ukaya vwanga nupya yali mu mwenzo wako.” Yaa ali mazwi ya utailo yano tukakosola.

⁹ Pano ndi walanda pa kanwa kako ukuti Yesu Klistu u Mwene, nu kutaila mu mwenzo wako vino Leza wamuzyukwile kufuma ku afwe, lyene ulatuulwa.

¹⁰ Pano tukataila mu mwenzo nu kutaka utailo witu. Lyene Leza akatucita kuya aololoke pa manso yakwe, atutuula.

¹¹ Pano calembwa mu malembelo cati, “Wino wensi uwamutaila wene atalacitwa insonyi.”

¹² Pano pasi kasoozi pa Muyuda nu Mukulukuwa. Pano Leza wene Mwene wa antu onsi, nupya akapolelela antu yonsi yao akamulenga kuti ayazwe.

¹³ Ndi vino calembwa mu malembelo cati, “Muntu akalenga ku Mwene kuti amwazwe wene alatuulwa.”

¹⁴ Uzye lyene yangamulenga uli kuti ayazwe ndi yatamutaile? Uzye yangamutaila uli ndi yatuvwa ilandwe lya pali aliwe? Uzye yanguvwa uli ilandwe lya pali aliwe ndi kusi wakuti akosole?

¹⁵ Uzye yangakosolelwa uli ndi umwi atatumilwe? Ndi vino calembwa mu malembelo cati, “Lolini vino cazipa kulola ingazo zyakwe yao akwiza ku kukosola Ilandwe Lisuma!”

¹⁶ Lelo asi onsi azumila Ilandwe Lisuma. Na Ezaya kwene umwisikulu wavwanzile ati, “Mwene, uzye aweni uwataila vino twakosozile?”

¹⁷ Acino umuntu akataila pa kuvwa Ilandwe, nga ni landwe nalyo likauvwika pa kukosola vya pali Klistu.

¹⁸ Lelo uzye nimati aina Izlaeli yatuvwile? Awe! Mucumi yene yuvwile. Cili ndi vino calembwa mu malembelo cati, “Ilandwe lino yakosozile lyuvwika konsi muno nsi Mazwi yano yakosozile yasalangine kufika nu ku mpela ya nsi.”

¹⁹ Uzye nupya nimati aina Izlaeli yatamanyikisye? Mose uwaswike iuzyo lii, lino walanzile ukuti Leza wavwanzile ati, “Ndacita aina Izlaeli kuya nu uzuwa pa antu amu luko ulwasilesile. Nupya ndayalenga kuti yasokele mutundu wa antu awelewele.”

²⁰ Nupya Ezaya wavwanzile nu kupama lino wavwanzile ukuti, Leza wavwanzile ati, “Nazanyilwe na antu yano atandonzile. Nalolike ku antu yano atamvulanga.”

²¹ Lelo pamulandu wa ina Izlaeli Leza wavwanzile ati, “Uwanda onsi nakonzolwile makasa yane kuti nzengele antu atalame nupya akansangukila.”