Kolose 4 - Amazwi Yakwe Leza 2013

¹ Mwe yasambazi, mutaya nu lufyengo ku yaomvi inu nupya muye acumi kunoyali. Mutailila ukuti namwe kwene mukweti musambazi mwiyulu.

² Mukonkowezye kupepa. Nalino mukupepa, pempulini nu kutaizya Leza.

³ Pa nsita ili imwi kwene naswe kwene mwatupepelako, pakuti Leza atupeele kasita kasuma aka kukosola ilandwe lyakwe ilya nkama yakwe Klistu. Pano uli mulandu uno nemo ndakai nayalilwa mu ng'anda yaminyololo.

⁴ Caleka mpepelini, kuti lyene ningalanda ndi vino ndinzile kulanda pakuti cuvwike ningo.

⁵ Muye na mano mu mikalile inu lino muli pakasi ka antu atataila, nu kuomvya insita inu ningo.

⁶ Mvwango zinu zilinzile kuya zisuma nupya zyakuzanzya antu, nupya mulinzile kumanya musango uno mungaasukilamo umuntu ali wensi.

Kulamuka kwakusyalikizya

⁷ Tikikasi, mwina witu mukundwe nupya muomvi wa cumi mukutumikila Mwene pamwi naswe, wene alamunena vyonsi vya pamulandu wane.

⁸ Uli mulandu uno nkumutuma kunomuli, kuti amukomelezye pa kumunena pamulandu wa wikazi witu vino uli.

⁹ Wene aliza kuko pali pamwi na Onesimasi mwina witu mukundwe nupya uwa cumi, uwa mwi umba linu. Yene yalamunena vintu vyonsi vino vikucitika kuno.

¹⁰ Alisitako ali pamwi nani mu ng'anda yaminyololo. Wene watuma ulau kunomuli, vivyo kwene na Mako, muvyala wakwe Banaba. (Mwemo mwapokelela utunguluzi pali vino mungapokelela Mako ndi cakuti angiza kunomuli.)

¹¹ Yoswa, wino akaamwa Yusito, nawe kwene watuma ulau. Antu yaa yatatu ali Ayuda sile ataila, yano tukaomba nao mu kuombela Wene wakwe Leza. Yene yakangazwa pakalamba cuze.

¹² Epafula cilundwa cuze ca mwi umba linu, nupya muomvi wakwe Klistu Yesu, nawe kwene wamulamuka. Wene akamupepela lyonsi na maka, ala akulenga Leza kuti aleke muye akomeleke wa ina Klistu atumpuluke nupya afumaluke mukuyela kulonda kwakwe Leza.

¹³ Pano namuyela ukambone kuombesya kuno wakweti pamulandu winu nga na pamulandu wa antu amu Lodesiya nga na amu Hielapolisi.

¹⁴ Luka sing'anga witu mukundwe, nga na Demasi yamulamuka.

¹⁵ Mutulawile aina itu amu Lodesiya pamwi nu mwina witu Nimfa nga ni uvi lino likakongana mu ng'anda yakwe.

¹⁶ Pacisila ca kuwelenga kalata wii kwi uvi linu, musininkizye ukuti wawelengwa nu kwi uvi lyaku Lodesiya. Namwe mukawelenge kalata wino nalemvile kwi uvi lyaku Lodesiya.

¹⁷ Munene Akipusi muti, “Sininkizya ukuti waomba mulimo uno walasikwa mukutumikila Mwene.”

¹⁸ Ni kasa lyane nemwisikulu nalemba cii. Ulau kufuma kuli ne Paulo. Mutailila ukuti nemo indi mu ng'anda yaminyololo! Cikuku cakwe Leza ciye namwe.