Filipi 3 - Amazwi Yakwe Leza 2013

Wololoke uwa mpomvu

¹ Mukumalila inane, muye nu luzango mu Mwene. Ntasakamile ndi namulembela nupya vintu vino namulembile nkolelo. Endi, cingamuzipila kuti ncite vii.

² Cenjelini na antu ankalwe wakwe yasimbwa. Kuli kuti yakacita ya viipe aonsi akakonkowezya kuceka nkanda ku mili.

³ Swemo tusi wakwe alio, pano twasilamulwa mucumi, tukapepa Leza kupitila mu maka yakwe Mupasi Wamuzilo nga nu kuitumika muli Klistu Yesu. Swemo tusyataila vino yakacita ku mili.

⁴ Ndala nalondanga nani kwene nga nataile vya untunze, lelo ndi pali umwi akwelenganya ukuti wataila vya untunze nemo nalutapo.

⁵ Nemo nasilamwilwe lino nali na manda cinani (8) akuvyalwa, nupya nafuma mu luko lwa Izlaeli mu mutundu wakwe Benjamini. Mukuvyalwa, nene Muyebulai. Wa Mufaliseo, nemo nayelanga Masunde yakwe Mose ndi vino yaya. Lom 11:1

⁶ Nali nu muzonda cakuti nazunyanga iuvi. Nacitanga vyonsi vyawololoke vino Masunde yalanda, mu kucita vivyo ntatazile mfume mwanzila.

⁷ Lelo vintu vyonsi ningapenda kuya vyasilesile, pamulandu wakwe Klistu.

⁸ Kusi cintu cingaya nu muzano kuluta kumanya Klistu Yesu Mwene wane. Pamulandu wakwe Klistu nemo nasumba vyonsi kuya wa vikona, kuti muzano wane uye a Klistu

⁹ nu kuilundanya cuze kunoli. Ndakai ntakweti wololoke ukaiza pa kuyela Masunde. Lelo wololoke uno nkweti ukaiza kupitila mu kuya nu utailo muli Klistu, uno ukafuma kuli Leza nupya wimikwa pa utailo.

¹⁰ Cino nkulonda ukumanya Klistu na maka yano amulenzile kuzyukuka kufuma ku afwe. Nkulonda kukuma ku macuzi yakwe nga nu kufwa ndi vino wene wafwile.

¹¹ Mu kupaalila kuu nani nkize nkazyukuke kufuma ku afwe.

Kusimwilila cikongwani

¹² Cumi nemo ntali mfikilizye cikongwani cino Leza wampela, nupya nsi mufumaluke. Nkusimula nu kwezya kuti ince mpelwe cilambu ca ucimvyo cino Klistu wanteyanyizizya mpiti pa kundonka.

¹³ Mwe yacuza, nemo ntakwelenganya ukuti nafikilizya cikongwani mpiti. Lelo cintu conga cino nkacita ukwilila vya cisila nga nu kwika mwenzo onsi ku vya nkolelo.

¹⁴ Caleka nkasimwila ulunga ni cikongwani kuti ince mpelwe cilambu kwiyulu, icili ulwamo lwakwe Leza muli Klistu Yesu.

¹⁵ Swensi kwene swe muno twakula ku vya mupasi tulinzile kukwata kwelenganya kuu. Lelo ndi yamwi munomuli yakweti kwelenganya kuze, Leza alalenga kuti cii cimanyikwe paswe kunomuli.

¹⁶ Nanti cingaya vivyo, lekini swemo twaya nkolelo kulingana nu utantiko uno twalondela kufika na ndakai.

¹⁷ Mutwalilile kukolanya vino nkacita, inane. Mwike mano pali yao alondela cilangililo cisuma cino twamulanga.

¹⁸ Ilingi nkamunena ukuti antu aingi yakwikala wakwe yao asicindika imfwa yakwe Klistu pa lupanda. Na ndakai kwene nkulila minsozi pa kuswilizya kumunena

¹⁹ ukuti antu yaa yalasumbwa kuzimo! Yene yakapepa inda zyao nu kuitumika pa vintu vino yalinzile ukuuvwa insonyi. Yene yakaelenganya sile pa vintu vya muno nsi.

²⁰ Lelo sweswe ikazi ya mwiyulu nupya tukulolela Katuula witu Mwene Yesu Klistu.

²¹ Wene alasenula mili itu itonte iyakufwa kuti ikolane nu mwili wakwe uwalulumbi. Wene alacita cii pa kuomvya maka yano wakwata akucimvya vintu vyonsi.