Ezekelo 3 - Amazwi Yakwe Leza 2013

¹ Alino lyene Leza anena ati, “We Mwana wa muntu, ale lya kalata wiyo umupombwe, nga alino uwapita uye umu kulanda na ina Izlaeli.”

² Fwandi nani ali pakwasamula akanwa, nga nawe wandisya kalata umupombwe.

³ Nupya anena nukuti, “We mwana wa muntu, lya kalata wii uwikute.” Nani ali pa kumulya, auvwika nu kulyompa kwati uuci.

⁴ Alino Leza anena ati, “We mwana wa muntu, pitanga lyene ukanene aina Izlaeli, ukayanene vyonsi vino nemo nkukunena.

⁵ Nemo nsikukutuma ku mutundu onga ukalanda ululimi luze luze sile ulutale ukuuvwa, lelo nkukutuma ku ina Izlaeli.

⁶ Ndi cakuti nakutuma ku antu ya mitundu yuze ikalamba ino ikalanda indimi izitale ukuuvwa, yene yangakuvwa.

⁷ Lelo aina Izlaeli yene awe, yasikuya yakakuvwe foo. Pano nani kwene yakana ukunguvwa. Yonsi pano yapela yaya atalame nupya aumalale.

⁸ Caleka nani nkukukonkomezya nupya uye umumalale ndi vino yaya.

⁹ Nkukukomya ukuluta ni iwe, ukuluta na kaliwe kakankala kakwe daimondi akakome wa nkomolo, ala antu yaya utakayoope foo, pano yaya uluko ulutalame.”

¹⁰ Nupya Leza atwalilila ati, “We mwana wa muntu, uwawaka amazwi yonsi yano nkukunena. Ukutike ningo na matwi yako.

¹¹ Nupya ku ina Izlaeli auzo mu uzya uye ukayanene vino ne Yawe Simwandalali nkukunena, nanti yace yakuvwe nanti yatace yakuvwe.”

¹² Mupasi ali pakunkatusya, na pacisila cane nuvwa impooma zya nkuta zikalamba wakwe cimwi ala zikuti, “Lumbanyini Yawe mucindami uwaya umwiyulu!”

¹³ Nga nuvwa ni ciunda ca viumbwa vyaumi kuno vikupumanya amaapa umu lwelele nga ni congo ca mipeto umu mbali ala cikuvwika wa cilundumusi.

¹⁴ Fwandi Umupasi wakwe Leza iunkatusya nu kunsenda, ala umwenzo wane ukunyongotoka wakwe cimwi, nupya nasosile na Yawe ala watampoka amaka.

¹⁵ Nasuka nafika nu ku azya aikalanga ku Telabibi ku Luzi lwa Kebali. Natenzi kweneko amanda cinimbali, lilyo ala ncili nkwalangana sile.

Yawe wasonta Ezekelo wakwe kalinda

¹⁶ Walanga amanda yayo cinimbali yapita, Yawe avwanga kunondi ati,

¹⁷ “We mwana wa muntu, nemo nakusonta ukuya kalinda wa ina Izlaeli. Wayanena vino nkucelwile.

¹⁸ Nemo ndi napingwila umuntu mwipe umwi ukufwa, nawe wakana ukumusokako kuti ate imicitile yakwe iipe, alole nu kwikala umu umi, ala umuntu wiyo umwipe alafwa pamulandu wa uyi wakwe. Lelo kwene nawe kwene ulakumpwilapo umulandu pa lwa mfwa yakwe.

¹⁹ Lelo ndi wasoka umuntu mwipe, lelo wene wakana ukuta uyi wakwe, lyene umuntu wiyo alafwa pamulandu wa uyi wakwe. Lelo wemo ule waipususya.

²⁰ “Umuntu umwi umusuma ndi watandika ukucita vimwi iviipe, alino nani namuteya iciteyo, ala nawe kwene alafwa ndi cakuti wemo utamucelwile kweneko. Umuntu wiyo alafwila pa uyi wakwe, nani ntaliusya ni visuma vino wene wacisile, lelo wemo ulakumpwilapo umulandu pa mfwa yakwe.

²¹ Lelo ndi waceula umuntu umwi umusuma pakuti ataifya, nawe wakuuvwa wata nu kucita iviipe, umuntu wiyo alaikalilila umu umi nawe kwene ulapusukako.”

Leza wanyepa ululimi lwakwe Ezekelo

²² Lino natenzi kuku, amaka yakwe Yawe yikila panondi wakwe cimwi, nga wene anena ati, “Katuka ulungame uku lunyika. Kuku kwene akuno tumaya tukalandane nawe.”

²³ Fwandi nani ali vino nakatwike nu kuya uku lunyika indola nu ucindami wakwe Yawe, kwati auwa kwene uno naweni uku nkumba ya luzi Kebali. Awe mukwai impona pansi ufupime.

²⁴ Lelo Mupasi wakwe Leza aiza munondi, ankatusya nu kunkatusya. Yawe ali pakunena ati, “Pitanga uku muzi, uye ukaiyalile umwako.

²⁵ Lyene kuku kwene, we mwana wa muntu, ulanyepwa umu myando. Ulanyepwa icakuti ulaposiwa nu kufumila pakasi ka antu.

²⁶ Ndalenga nu kuti ululimi lwako lukakatile uku camvu, umaya ciulu, icakuti utange uyasokeko nupya, pano yaya uluko lumwi ulutalame.

²⁷ Lino nemo ndalanda nawe nupya, ali lino ndasapula ululimi lwako, nga nawe ulayanena uti, ‘Yawe Simwandalali akuti, wiyo akauvwa kauvwe, na wino asilonda ukuvwa atuvwa, pano uluko lulo ulutalame.’ ”