Efeso 4 - Amazwi Yakwe Leza 2013

¹ Caleka nemo, ne munyepwe pamulandu wa kutumikila Umwene, nkumupapata kuti wikazi nu umi winu viye kulingana nu mwata wa lwamo luno mwamilwe.

² Muye afuke nupya aicefye lyonsi. Mwaposya kuti mulange kutemwana kuli cila muntu.

³ Ezyini kuombesya na maka mu kuleka Mupasi wakwe Leza amulundanye myenzo. Mwacita cii mukwikala mu mutende.

⁴ Kwaya mwili onga nu Mupasi onga ndi vino kwaya upaalilo onga uno Leza wamwamileko.

⁵ Twakwata sile Mwene wenga, utailo onga, nga nu luwatizyo longa.

⁶ Kwaya Leza wenga Isi wa antu onsi. Wene waluta onsi, nupya akaomba kupitila munotuli swensi. Wene akaikala munotuli swensi.

⁷ Lelo kuli sweswe, Klistu wankanya mawila yakwe.

⁸ Cili ndi vino calembwa mu malembelo cati, “Lino wene wakwezile papelapela kwiyulu, wasenzile azya aingi nga nu kupeela mawila ku antu.”

⁹ Izwi lyakuti “Wakwezile” likasenula ukuti inkolelo Klistu wisile pano pansi.

¹⁰ Nupya cikusenula ukuti wino uwisile pano pansi ali umwi kwene wakwezile papelapela kwiyulu, kuti azule nu kukumana monsi.

¹¹ Wene uwapile mawila ku antu onsi. Wasolwile yamwi kuti yaye atumwa, yamwi kuti yaye akasema, yamwi akakosola, yamwi akacema nga na yamwi akasambilizya.

¹² Lyene antu yakwe yalasambilila kutumikila nga nu mwili wakwe Klistu nao ukomeleke.

¹³ Cii cilatwalilila kufika lino twalemana kupitila mu utailo nga nu mukumanyikisya Mwana wakwe Leza. Lyene tulaya afumaluke, ndi vino Klistu ali, nupya tulakolana na aliwe cuze.

¹⁴ Alino tutalaya wa ana anono mu micitile. Yene yakasombwa na masambilizyo ya antu asomvi. Masambilizyo yaa yakoline wa miza ino ikasunka maimbi kufuma pa cifulo conga kuya nu ku cuze,

¹⁵ Kulanda cumi lyonsi kungalenga ukutemwa, kutemwa kulinzile kwatwazwa kukula mu misango yonsi nu kulolana na Klistu, wino ali umutwe

¹⁶ wa mwili ukatungulula umwili onsi. Klistu uwalundanya mwili nga nu kuleka kuti cila cilundwa consi ca mwili caomba mu ufumaluke, alino nu kukula nu kukomeleka pamulandu wa kutemwa.

Kwikala umi upya muli Klistu

¹⁷ Mwi zina lya Mwene, nkumunena kuti mutacita vintu wa antu atataila, yano kwelenganya kwao ukwa uwelewele

¹⁸ nupya myenzo yao yaya mu mfinzi. Yene yasikuma mu umi uno Leza akapela, pano yakomya imyenzo yao nupya yene atuutu.

¹⁹ Yene yasyauvwa insonyi. Yene yaipela mu kucita vya ukakasi nga ni vintu vyonsi vya winyi kwaula kuikanya.

²⁰ Vii asi vino mwasambiliziwe pamulandu wakwe Klistu.

²¹ Mwemo muvwa vya pali aliwe. Acino wa alondezi yakwe, mwemo mwasambiliziwe cumi icaya muli Klistu.

²² Caleka tiini kucita micitile iipe iyampiti, ni miyele yakweyo yonsi ino ingamulovya.

²³ Myenzo inu nga na yakampingu inu viye vipya,

²⁴ nupya zwalini untu upya, uno waumvilwe mu mwata wakwe Leza. Lyene mulaya aololoke nupya amuzilo.

²⁵ Caleka mutatwalilila kutumpoka nupya! Cila muntu alinzile alanda cumi ku muze wino uwataila, pano swensi sweswe vilundwa vya mwili wakwe Klistu.

²⁶ Ndi mwasoka mutaleka kusoka kwinu kumutungulule ku kwifya. Nupya mutikala asoke kufika nu kukuwa kwi lanzi.

²⁷ Mutasila Ciwa umweko.

²⁸ Muntu wino wiyanga alinzile kuta kwiya, nga atandike kuomba kwaula usomvi kuti azanilemo uwikazi nga nu kwankanya kweneko apina.

²⁹ Mutaomvya mazwi akucisa. Lelo omvini mazwi asuma akwazwa, mazwi akakuula nu kupeela vikulondekwa, pakuti vino mukulanda viye vyakwazwa yao akumuvwa.

³⁰ Nupya mutaleka Mupasi Wamuzilo auvwe ulanda. Pano Mupasi Wamuzilo ali cimanyililo cakuti mwemwe yakwe Leza, cisininkizyo cakuti uwanda uliza lino Leza alamulenga kuya antungwa.

³¹ Acino tiini kupatana, kuya ni cipyu, nanti kusoka. Tiini kulemanila nanti kutukanana, nanti kwikilana kai mu musango uli onsi.

³² Mu cifulo cakwe vii, muye nu luse na mizu kuli cila muntu munomuli. Mwaelelana ndi vino Leza wamwelela kupitila muli Klistu.