Efeso 1 - Amazwi Yakwe Leza 2013

¹ Kalata kufuma kuli ne Paulo, ne muno nasolwa kuti nje mutumwa wakwe Klistu Yesu. Ku antu yakwe Leza yonsi yao akaikala mu Efeso nupya alondezi ataila muli Klistu.

² Cikuku nu mutende kufuma kuli Leza Tata nu Mwene witu Yesu Klistu viye kunomuli.

Leza akaleta upolelelo ku antu muli Klistu

³ Lekini tutaizye Leza nupya Isi wa Mwene witu Yesu Klistu! Pano muli Klistu amuno wene watupolelela pa kutupela upolelelo onsi uwa mupasi kufuma mwiyulu.

⁴ Na lino insi itali kuti iumbwe, Leza wene watusolwile mpiti kuti tuye akwakwe muli Klistu, pakuti tuye amuzilo nupya aula mulandu kunoli. Pamulandu wa kutemwa kwakwe

⁵ Leza wasolola mpiti kutucita ana yakwe kupitila muli Klistu. Cii camuzanzizye umwisikulu mwi pange lyakwe.

⁶ Lekini tulumbanye Leza pa cikuku cakwe ca lulumbi, na pa wila uno watupeela mu Mwana wakwe mukundwe!

⁷ Pano Klistu wakomilwe pakuti wazi wakwe uye impolelwa yakutulenga kuya antungwa, cii cikusenula vino ndakai maifyo itu yelelwa. Klistu wacisile cii pamulandu wakuti Leza wali ni

⁸ cikuku civule kunotuli. Mano nga nu kumanyikisya kwakwe Leza, vyaya vikulu cuze,

⁹ nga kupitila muli vino Klistu wacita, Leza watulanga mapange yakwe ankama.

¹⁰ Lyene lino insita ilafika, Leza alacita vyonsi vino wapanga kucita, nga Klistu nawe alakonganika pamwi vintu vyonsi ivya mwiyulu na pano nsi.

¹¹ Vintu vyonsi vikacitwa kulingana na vino Leza wateyanya. Wene watusolwile kuti tuye antu yakwe muli Klistu. Wene wacisile cii pamulandu wi pange lyakwe, lino limikwa pali vino wasolwile kufuma nu ku utandiko.

¹² Wene wacisile cii, pakuti swe muno twali ankolelo kupaalila muli Klistu tulumbanye lulumbi lwakwe.

¹³ Yesu wamuletile cumi, cino cili Ilandwe Lisuma lya pamulandu wakwe vino mungatuulwa ndi mwataila. Caleka mwatamwa ni nsimbi yakwe Leza pa kumupeela Mupasi Wamuzilo wino walavile kunomuli kuti alange vino mwemwe yakwakwe.

¹⁴ Mupasi Wamuzilo ali cisininkizyo cakuti tulapokelela vintu vino Leza walaya antu yakwe, nupya cii cikusininkizya kunotuli ukuti Leza alapeela untungwa ufumaluke kuli yao akwakwe. Lekini tulumbanye lulumbi lwakwe!

Paulo wayapepela

¹⁵ Caleka nani kwene kufuma lino nuvwile vya pa utailo uno mukweti mu Mwene witu Yesu nga nu kutemwa kuno mwakwata pa antu yakwe Leza onsi,

¹⁶ ntatala nata kutaizya Leza pamulandu winu. Nemo nkaiusya kumupepela nga

¹⁷ nu kuuzya Leza wa Mwene witu Yesu Klistu, Tata uwa lulumbi, kuti amupeele Mupasi Wamuzilo. Wiyo alalenga kuti mwemo muye na mano nupya alasokolola Leza kunomuli, pakuti namwe mungamumanyikisya.

¹⁸ Nkulenga kuti Leza akozya luswepo mu myenzo inu na kuti mumanyikisye upaalilo uno wamwamilako nga nu kumanya ukama wa lulumbi lwa kupyana vintu vino Leza walaya antu yakwe,

¹⁹ nga na kuti mumanye na maka yakwe aataikulila yano akaomba munotuli swe ya utailo. Maka ya ulamba ali yamwi

²⁰ na yano Leza waomvizye lino wazyukwile Klistu kufuma ku afwe nga amwika kwi kasa lyakwe lilunji mwiyulu.

²¹ Kuku akuno Klistu waya a kateeka papela yakwe yakateeka onsi, intunguluzi zyonsi, maka nga na pa mazina yauze yonsi a utesi wa mukulo uu nu mu mukulo uuliza.

²² Leza wika vintu vyonsi pisika lya maka yakwe Klistu, nga pamulandu wa kuzipilwa kwi uvi, wene wamucita kuya Mwene pali vyonsi.

²³ Iuvi lili mwili wakwe Klistu umwazula aliwe wino akazuuzya vyonsi mu ufumaluke.