Danieli 7 - Amazwi Yakwe Leza 2013

DANIELI WALONDOLOLA MUNO IVILOTO VYAKWE VIILE (7:1–12:13) Iciloto cakwe Danieli ca vinyama vini

¹ Mu mwaka uwakutandika uwa kuteeka kwakwe Belisyazali umwene waku Babiloni, ne Danieli nalosile iciloto nga naweni icilolwa usiku. Nalemvile iciloto cici.

² Vii ali vino ne Danieli naweni umu ciloto usiku: Imiza yapunganga ukufuma mu ntunga zyonsi zini ala ikuvundula yemba mukulu.

³ Ivinyama vini vikulu sana nupya ivipusane vifuma muli yemba.

⁴ Cakwe conga calolike wakwe cisama, lelo cakweti amaapa wakwe cipungu. Lino ncili lolekesya, amaapa yakweco yanyunsulwa. Alino cinyama cici yacikatusya apakuti cimilile wa muntu, nga yacipela nu mwenzo wa muntu.

⁵ Cakwe ciili calolike wa ciuli ala ciimi apa ngazo zyakweco zyacisila. Cene cavwasile imbazo zitatu apakasi ka mino, nga ni zwi livwanga kuno cili liti, “Katuka, ulye inyama ukulingana na pano ukulondela!”

⁶ Pacisila cakwe vii, lino ncili lolekesya, indola icinyama cuze. Cene calolike wa nangu, lelo apa nsizi yakweco pali amaapa yani, yano yakoline na maapa ya cunyi, nga cakweti ni mitwe ini nupya capilwe amaka ya kuteeka.

⁷ Lino ncili lolekesya, icinyama cakwe cini ciloleka. Cene cali icikome, cakoofya, icakuleta intete. Cali na mino yacela akulu cuze yano caomvizye pakulumola nu kulyatola vyasyala vyonsi. Cene citakoline ni vinyama vyuze vyasyala, pano cali ni mpembe ikumi.

⁸ Lino ncili lolekesya impembe zizi, indola kalupembe kanono ala kakufuma apakasi ka mpembe zyuze. Kene ikatinkula impembe zizi izyalipo zitatu. Kalupembe kaa kakweti amanso wa manso ya muntu nu mulomo uwalandanga vyakuitakizya.

Cilolwa cakwe wiyo uwaliko ku katalili

⁹ Lino ncili lolekesya, ivilimba vya wene iviteekwa apa ncende ilya. Alino wiyo uwaliko ku katalili aikala pa cilimba conga. Vyakuzwala vyakwe vyali mpee wa mula, nga ni nyele zyakwe zyali mpee wa mavumbu ya mfwele zitiswe. Cilimba cakwe ca wene catesilwe pa mipeto ya moto, nga calunkumanga nu moto.

¹⁰ Nu luzi lwa moto ala lukukonkoloka ukufuma apa nkolelo yakwe. Kwali kweneko na antu avule wakwe cimwi akumutumikila, nga ni mintapendwa ya antu aimi nkolelo yakwe. Alino kuputwilwa kwa milandu kutandika, nga ni mpapulo zikupulwa.

¹¹ Lyene ntwalilila kulola pamulandu wa mazwi akuitakizya yano ulupembe lulu lwalandanga. Ntwalilila kulola mpaka icinyama cici cikomwa, nga ni citumbi cakweco cisumbilwa mu cimbilimbili ca moto icononwa.

¹² Ivinyama vyuze ivipokololwa amaka, lelo vyazumiliziwe ukuya nu umi apa nsita imwi.

¹³ Lino naweni ivintu vii usiku mu cilolwa, naweni umwi uwalolike wa muntu. Wene ala akwika na makumbi amwiyulu. Alino aiza kuli wiyo uwaliko ku katalili nga yauze yamutwala kunoli.

¹⁴ Wene wapilwe amaka, ululumbi nu utesi, kuti misango yonsi ya antu, na antu amu nko zyonsi ni ndimi, yangamutumikila. Amaka yakwe autesi yalatwalilila amanda pe, nu wene wakwe utalasila.

Ivilolwa vyalondololwa

¹⁵ Ne Danieli naaziwe mu mwenzo, nupya ivilolwa vii vyansakamike wakwe cimwi.

¹⁶ Lyene naile kuli wenga muli yayo aimi papa nga imuzya kuti andondolwele muno vii vyonsi vyalola. Acino nawe andondolwela.

¹⁷ Anena ati, “Ivinyama vii vini a mawene yano yalakatuka umu nsi.

¹⁸ Lelo aswepe yakwe Leza Wapapelapela yalapokelela uwene na maka ya utesi nga yalausunga amanda pe.”

¹⁹ Lyene nalondesyanga ukumanya icumi nacuze icikumile icinyama cakwe cini, cino citakoline ni vinyama vyuze, cino cali cakoofya nupya caomvizye ingala zyakweco zya mukuwa na mino ya cela pakulumola vyuze vyasyala nu kuvilyatola.

²⁰ Nakasi ukumanya ni vikumile impembe ikumi izyali pa mutwe wa cinyama cici nga ni vikumile ulupembe luze ulwatumvile icisila, luno lwaponyizye zyuze. Lwene lwakweti amanso nu mulomo uwalandanga vyakuitakizya. Lwali ulwakoofya ukuluta zyuze zyasyala.

²¹ Lino ncili lola, ulupembe lulu lwalwisizye antu yakwe Leza nu kuyacimvya.

²² Lyene wiyo uwaliko ku katalili aiza nu kupingwila antu yakwe Leza Wapapelapela. Insita yatifika yakuti antu yakwe Leza yapokelele amaka ya utesi.

²³ Lyene andondolwela vii: “Icinyama cakwe cini uli wene wakwe cini uno ulayako umu nsi, nga wene utalakolana na mawene yauze asyala. Wene ulatamola insi yonsi nu kuilyatola.

²⁴ Impembe ikumi zizi a yamwene ikumi yano yalateeka uwene ulya. Lyene umwene muze alaloleka. Wene atalakolana na yamwene aliko inkolelo nupya wene alacimvya aene yalya yatatu.

²⁵ Wene alavwanga amazwi yamiponto kuli Leza Wapapelapela nu kuzunya aswepe yakwe. Wene alezya kusenula insita na masunde ya upefi, nga antu yakwe Leza yalaya mu makasa yakwe apa myaka itatu na citika.

²⁶ Lyene itengo lya mwiyulu lilapingula, limupoke na maka, nu kumonona pyu.

²⁷ Amaka nu ukulu wa mawene yonsi pano nsi ulapelwa ku antu yakwe Leza Wapapelapela. Amaka yao autesi yatalasila, nga na yakateeka yonsi pano nsi yalamutumikila nu kumuyela.”

²⁸ Kuu kuli kumalila kwa ulondolozi. Nuvwile intete cakuti nu usyu wane walolike usakamale, lelo ntanenyile umwi umulandu uu.