Danieli 5 - Amazwi Yakwe Leza 2013

Ivilembo pa lung'umba

¹ Usiku umwi umwene Belisyazali aama yacilolo ku cimulo cikulu, nga yamwa waini pali pamwi.

² Lino yacili yakumwa Belisyazali apeela ilamulo kuti yalete ingako ni ngeso zyakwe zaabu na siluva vino isi Nebukadineza wafumizye umu Ng'anda ikulu yakwe Leza ku Yelusalemu. Umwene watumile kuti yamuletele apakuti aliwe, ni vilolo vyakwe, aci yakwe na aci yakwe apa mbali yangamwelamo.

³ Lilyo kwene yamuletela ingako ni ngeso zyakwe zaabu, nga yonsi kwene yamwelamo waini,

⁴ nu kulumbanya tuleza utwapangilwa na zaabu, siluva, umukuwa, ni cela, imiti na mawe.

⁵ Umukupumikizya ikuloleka ikasa lya muntu nga ilitandika ukulemba apa lung'umba lutakase lwamwi sano, apipi na pano uluswepo lwayengesanga ukuluta. Nga umwene alola ikasa lili lino likulemba.

⁶ Alino wene afinya pa manso nupya intete zimulema wakwe cimwi cakuti atandika kuzakaza umu nteo.

⁷ Lyene umwene apunda kuti umwi amwamile amamanyamano, na yao akasambilila vikumile intanda, na yao akauzya ku mipasi. Nayo lino yiza, umwene ayanena ati, “Ali wensi wino angawelenga ivilembo vii nu kundondolwela muno viile alazwikwa umwingila usuma wa ene, na kamunyololo kakwe zaabu umu nsingo, nga alalasikwa apa cifulo cakwe kateeka wakwe citatu umu wene wane.”

⁸ Yampandamano amu wene yiza inkolelo, lelo yonsi kwene yaposiwa kuwelenga nanti kulondolwela umwene ivilembo vivi muno viile.

⁹ Acino umwene Belisyazali aaziwa wakwe cimwi nu usyu wakwe iupona ukuluta, nga ni vilolo vyakwe vitamanyile ivyakucita.

¹⁰ Namwene pali pakuvwa icongo cino umwene na yacilolo yakwe yapanzile nga aingila mu ng'anda ya maliila. Avwanga ati, “Iye we Mwene, si kalukuwala! Si angala utaaziwa nu kukungumala.

¹¹ Mu wene wako muli umuntu wino akweti umupasi wakwe yaleza amuzilo. Mu manda yakwe so wene wazanyilwe ukuti umulamoke nupya umucenjele nu wa mano wakwe yaleza yaya. We Mwene Nebukadineza, so, wamulasike ukuya umukalamba wa mamanyamano, na yakasapoola, na yao akasambilila vikumile intanda na yao akauzya ku mipasi.

¹² Umuntu wii Danieli, wino umwene waamanga ukuti Belitesyazali, wakweti amano nu umanyililo nga nu kwiluka ukwakuzunguka, nga nu kulondolola iviloto, nu kwilula amapinda nu kumala intazi zikome. Acino tuma akuya aama Danieli nga nawe amaiza akunene muno vii vyonsi viile.”

Danieli walondolola ivilembo

¹³ Acino Danieli yamuleta ku mwene, nga umwene amuuzya ati, “Uzye wewe uli Danieli, wenga uwamu azya yano tata, umwene waleta ukufuma ku Yuda?

¹⁴ Nuvwa ukuti umupasi wakwe yaleza amuzilo uli munuli nga nu kuti wemo walamoka, wakwata umanyililo nga na mano akuzunguka.

¹⁵ Antu yamano na mamanyamano yalesilwe inkolelo yane ku kwiza welenga ivilembo vii nu kundondolwela muno viile, lelo yaposiwe kucita cico.

¹⁶ Lyene nemo nuvwa ukuti wemo ungaumbula ivyafiswa nu kulondolola inkama. Acino ndu ngawelenga ivilembo vii nu kunena muno viile, ale lyene umazwikwa imingila iyenzulukile yaku wene, na kamunyololo kakwe zaabu umu nsingo aka kukucindamikilako, nga ulaya kateeka wakwe citatu mu wene wane.”

¹⁷ Danieli nawe aasuka umwene ati, “We mwene uisungile sile vyawila wako nanti uvipeele ku muntu muze. Musambazi nemo namakuwelengela vilembelo nu kukunena muno viile.

¹⁸ “Iye mwene, ala Leza wapapelapela walasike so Nebukadineza pa cilimba ca wene, aya umwene mukulu amupeela na amaka nu lulumbi nu usambazi.

¹⁹ Wene wali umukulu cakuti antu amu nko zyonsi, ni misango yonsi ni ndimi yamoopanga nu kuzakaza. Ndi wene walonda kukoma ali wensi, ala amamukoma. Ndi walonda kuti umwi atakomwa, ala cimaya vivyo kwene. Wene wacindamikanga nanti kusausya ali wensi wino akasi.

²⁰ Lelo pamulandu wakuti wene wali ni cilumba, atalama, aya umunkalwe, ali cino yamufumizye apa wene nga yamupoka nu mucinzi wa cifulo cakwe.

²¹ Yamufumizye pakasi ka antu, nga aelenganya wa nyama. Wikalanga pamwi na yacoolwa, nu kulya isote wa ng'ombe, nga nu kulala apa swe ukwaula cimwi cakucingilila umwili ku lumi. Umu kusyalikizya asuka azumila ukuti Leza Wapapelapela aliwe waya na maka apa mawene ya antu yonsi nupya angapeela uwene ku muntu ali wensi wino akasi.

²² “Lelo wemo, we mwanakwe, utaicefya awe, nanti angala wamanyile cii.

²³ Wemo wasangukile Umwene wa mwiyulu. Wapile ilamulo kuti yakuletele ingako ni ngeso ukufuma mu Ng'anda ikulu yakwe Leza. Alino wewe, na yacilolo yako, na aci yako, na aci yako apa mbali yamwelile waini mu viya vii nu kulumbanya tuleza utwapangilwa na siluva na zaabu, nu mukuwa, ni cela, ni mbao nga na mawe, vivyo ivitangalola nanti ukuvwa. Lelo utacindike Leza wino wafumbata umi wako umwi kasa lyakwe kumwi na vyonsi vino ukacita.

²⁴ Uli mulandu uno Leza watatuma ikasa kukwiza lemba amazwi yaa.

²⁵ “Yaa ali mazwi alemvilwe: “MENE, MENE, TEKELI, PALISINI

²⁶ “Amazwi yaa yalola mukuti, Mene: Leza wapenda amanda ya utesi wako nu kuyaleta uku mpela.

²⁷ Tekeli: Wapimwa pa sikelo nu kuzanwa ukuti wangumpala wakwe cimwi.

²⁸ Pelesi: Wene wako watiwankanikana nu kupelwa ku ina Mede na ina Pesya.”

²⁹ Lilyo kwene Belisyazali apeela ilamulo ku yaomvi yakwe kuti yazwike Danieli umwingila wa yene uyenzulukile nga na kamunyololo kakwe zaabu umu nsingo aka kumucindamikila kweneko. Nga amucita ukuya kateeka wakwe citatu umu wene wakwe.

³⁰ Usiku kwene ulya Belisyazali, umwene waku Babiloni, akomwa.

³¹ Nga Dalyusi umwina Mede, wino apa nsita ilya wali ni myaka yakuvyalwa amakumi mutanda, apoka cilimba ca wene.