Danieli 4 - Amazwi Yakwe Leza 2013

Ciloto cakwe ciili cakwe Nebukadineza

¹ Umwene Nebukadineza watumile imbila ii ku antu amu nko zyonsi, ni misango yonsi ya antu, ni ndimi zyonsi umu nsi ati, “Nalaula!

² Caticinzanzya kuti munene ivinjelengwe ni vizungusyo vino Leza Wapapelapela wancitila.

³ Ala ivizungusyo vino Leza watulanga ivikulu! Ala ivinjelengwe vino wene akacita ivyamaka! Leza ali mwene wa manda pe. Wene amateekanga insita zyonsi.

⁴ “Nemo ne Nebukadineza natenzi umwi sano lyane, ala nkuilyokezya ulongo.

⁵ Lelo nizile ndota iciloto cakundetela intete nga lino naizi ndola ni vilolwa vyakungoofya.

⁶ Acino napiile ilamulo kuti yandetele antu yamano yonsi amu Babiloni pakuti yanene muno iciloto ciile.

⁷ Lyene amamanyamano, na yakasapoola, na yao akasambilila vikumile intanda, na yao akauzya ku mipasi yayaleta kunondi, nga nani njanena iciloto cane, lelo yene yaposiwe ukundondolwela muno ciile.

⁸ Mukusyalikizya Danieli aiza. (Wene yamutemile izina nalyuze lyakuti Belitesyazali, izina lyakwe leza wane.) Umupasi wakwe yaleza uli munoli. Caleka nani munena ciloto cino nalosile inti,

⁹ We Belitesyazali, mukalamba wa mamanyamano, manyile ukuti umupasi wakwe yaleza amuzilo uli munuli nu kuti wemo wamanya vyankama vyonsi. Acino imunena iciloto cane nu kuti andondolwele muno ciile.

¹⁰ “Nani imunena inti, walanga njizi, nakweti icilolwa ca cimuti icikulu wakwe cimwi icali pakasi ka nsi.

¹¹ Cimuti cici icikula, calukukula mpaka cifika nu mwiyulu nga nu muntu wensi umu nsi acilola.

¹² Amafwa yakweco yali ayembe nupya casesile iviseekwa vivule sana vino antu yonsi umu nsi yangakumana ukulya. Inyama zya mpanga zyapuzilanga mu cisao cakweo, ni vyunyi vyapanganga vinsanzo mu misambo yakweco, nga nu musango onsi wa viumbwa walyanga iviseekwa vyakweco.

¹³ “Lino ncili elenganya pa cilolwa cici, indola mungeli akufuma umwiyulu, ala akuwaka nu kucevya.

¹⁴ Alino alaizya ni zwi likulu ati, ‘Sinda icimuti nu kusankola imisambo yakweco. Ucipulule na mafwa nu kusansanta iviseekwa vyakweco. Zinga inyama zino zikuuwa mwenemo kumwi ni vyunyi ivili mu misambo yakweco.

¹⁵ Lelo usye icisinte cakweco mu musili, ale icinyepelelwe nu musipi wa cela nu mukuwa ukuzinguluka. Ucisye mumu kwene mu mpanga umwi sote. “ ‘Lyene leka ulumi lukunge umuntu wii, nupya leka aikale pamwi ni nyama ni vimelwa.

¹⁶ Pa myaka cinimbali wene atalakwata kampingu wa muntu, lelo alaelenganya wa nyama.

¹⁷ Kuu kuli kupingula kwa angeli awakanga nu kucevya. Acino lyene, lekini antu yonsi konsikonsi yamanye ukuti Leza wapapelapela wakwata amaka apa mawene yonsi ya antu cakuti angapeela uwene kuli wensi wino akasi. Wene angapeela uwene nu ku muntu musulwe kwene.’

¹⁸ “Cii, cili ciloto cino ne Nebukadineza nalosile. Lyene, we Belitesyazali, unene muno ciile. Pano kusi nanti wenga muli yampandamano amu wene wane wino ataposiwe ukunena muno iciloto ciile. Lelo wemo ungacita cico, pamulandu wakuti umupasi wakwe yaleza yamuzilo uli munuli.”

Danieli walondolola muno ciloto ciile

¹⁹ Lyene Danieli, wino izina lyakwe nalyuze a Belitesyazali, cimamusakamika wakwe cimwi cakuti aposiwa kuvwanga cili consi. Caleka umwene avwanga ati, “Belitesyazali, utaleka iciloto na muno ciile vikusakamike wakwe cimwi.” Belitesyazali aasuka umwene ati, “Musambazi, si cangecizipe ciloto cii na muno ciile ale vikumile anisi yako, lelo vitakuma wewe.

²⁰ Cimuti cino waweni, citalimpisye wakwe cimwi cakuti cifika nu mwiyulu, umuntu wensi umu nsi waciweni.

²¹ Amafwa yakweco yali ayembe, nga naco cakweti iviseekwa vivule vino vingakumana wensi umu nsi ukulya. Inyama zya mpanga zyuwanga mu cisao cakweco, ni vyunyi vyapanzile vinsanzo vyakwevyo mu misambo yakweco.

²² “Musambazi, wewe uli cimuti cici, citali nupya camaka. Wemo watuya umukulu wakwe cimwi cakuti ukulu wako wafika nu mwiyulu, na maka yako autesi yafika nu ku mpanga zyakutali umu nsi yonsi.

²³ Walanga we musambazi ucili lolekesya, umungeli wizile ukufuma mwi yulu nga avwanga ati, ‘Sinda icimuti nu kuconona, lelo usye icisinte cakweo mu musili. Ucinyepelele nu musipi wa cela nu mukuwa ukuzinguluka, nga ucisye mumu kwene umwi sote. Lyene leka ulumi lukunge umuntu wii, nupya leka aikale pamwi ni nyama imyaka cinimbali.’

²⁴ “Lyene, we musambazi, muu, amuno iciloto ciile, nupya Leza Wapapelapela watalamula icilakucitikila.

²⁵ Wemo yalakufumya apakasi ka antu nupya ulikala pamwi ni nyama. Pa myaka cinimbali ulalya isote wa ng'ombe ni mbuzi apanzi, kuko kuno ulumi lulakukunga. Lyene alino ulazumila ukuti Leza wapapelapela aliwe akateeka amawene yonsi a antu nupya angalasika ali wensi wino akasi pa cilimba ca wene.

²⁶ Umungeli wilya wapile ilamulo lyakuti icisinte ca cimuti yacisye mu musili. Cii calola mukuti nupya kwene wemo ulaya umwene lilyo lino ulazumila ukuti Leza aliwe akateeka insi yonsi.

²⁷ Acino lyene, we musambazi, londela umpandamano wane. Ta ukwifya, wacita visuma, nupya ya nu luse ku antu akucuziwa. Ndi wacita vivyo, lyene ulatwalilila kuya nu longo.”

²⁸ Vii vyonsi vyacitikile umwene Nebukadineza.

²⁹ Papisile sile imyezi ikumi na iili, nga lino umwene akulyatokela apipaala li sano lyakwe mu Babiloni,

³⁰ avwanga ati, “Silolini vino Babiloni waya umukulu! Nene nakuuzile umusumba uu ukulu kuti uye uwakwane wakwikalamo na kuti ndange amaka nu ulamba wane, ululumbi nu usambazi wane.”

³¹ Lino atali amamule akanwa nu kulanda amazwi yaa, izwi lyuvwika ukufuma umwiyulu liti, we mwene Nebukadineza, uvwa vino nkulanda! Ndakai amaka yako awene yapokololwa kunuli.

³² Wemo yalakufumya apakasi ka antu nupya ulikala pamwi ni nyama zya mpanga. Pa myaka cinimbali ulalya isote wa ng'ombe ni mbuzi apanzi. Lyene alino ulazumila ukuti Leza wapapelapela aliwe akateeka amawene yonsi a antu nupya angalasika ali wensi wino akasi pa cilimba ca wene.

³³ “Lilyo kwene ivyavwanzilwe pali Nebukadineza vifikiliziwa. Yamufumya apakasi ka antu nga atandika ukulya isote wa ng'ombe. Ulumi ilumukunga, ni nyele zyakwe zikula nu kutalimpa wa mavumbu yakwe cipungu nga ni ngala zyakwe zitalimpa wa ngala zya vyunyi.

Nebukadineza walumbanya Leza

³⁴ “Lino imyaka cinimbali yapita, ne Nebukadineza ntumpula manso umwiyulu, nga amano yane yawela. Alino nani ndumbanya Leza Wapapelapela. Impeela umucinzi nu lulumbi kuli wiyo uwaumi pee na pee. “Wene amateekanga umuyayaya, nu wene wakwe ulikalilila amanda pe.

³⁵ Wene akalola antu amu nsi ukuti asilesile. Angeli umwiyulu nga na antu umu nsi yali mu makasa yakwe. Kusi umwi angalesya ukulonda kwakwe, nanti amuzye ati, ‘Uzye cani cino wacita?’

³⁶ “Lino amano yane yawezile, ali lino nu mucinzi, nu usambazi wane, nga nu lulumbi lwa wene wane vyapilwe nupya kwene kunondi. Yampandamano yane kumwi ni vilolo vyane yanzengile, nga na maka yane autesi yapilwe nupya kunondi nu mucinzi ukalamba kuluta uno napiilwe inkolelo.

³⁷ “Lyene, ne Nebukadineza, nkulumbanya nu kucindika nu kupeela ululumbi ku Mwene wa mwiyulu, pamulandu wakuti vyonsi vino wene akacita ivisuma nupya ivya ulungi. Nupya wene angacefya yayo acilumba.”