Danieli 2 - Amazwi Yakwe Leza 2013

Iciloto cakwe Nebukadineza

¹ Mu mwaka wakwe ciili uwakuteeka kwakwe, Nebukadineza walosile iciloto. Cene camusakamike wakwe cimwi cakuti waposiwe nu kukasula.

² Acino umwene atuma akuya aama amamanyamano, yakasapoola, alozi na yayo akasambilila vikumile intanda kuti yize yamunene iciloto cino walosile. Lino yene yiza yimilila inkolelo ku mwene,

³ nawe ali pakuyanena ati, “Nkweti ciloto icikunsakamika nga nkulonda imanye muno ciile.”

⁴ Lyene nayo yaasuka umwene mu Cialamaiki, “Si kalukuwala kunuli we mwene! Tunene iciloto cako, nga naswe tumakulotwela.”

⁵ Umwene nawe pali pakuyanena ati, “Nemo natimpingula ukuti mulinzile munene iciloto nga na muno ciile. Ndi cakuti mutangacita cico, ale lyene namamuputola mu vimpilinsya nu kusenula amang'anda inu yaye amatongwa.

⁶ Lelo ndi cakuti mwanena iciloto na muno ciile, lyene ndamulambula nu kumucindamika. Acino lyene, nenini iciloto nga namuno ciile.”

⁷ Nupya kwene nayo yaasuka umwene yati, “Ndi cakuti we mwene watunena iciloto, ale lyene tumakulondolwela.”

⁸ Lyene umwene aasuka ati, “Ntakutwisika ukuti mwemo mukwelenganya ukukwata akasita, pamulandu wakuti mwatimulola ukuti nemo natimpingula

⁹ ukuvunuka mwensi kwene mu musango uli onga kwene ndi cakuti mutanenyile iciloto. Mwemo mwatimumana akapi kuti munene ivintu vyakumpumbola nupya iviipe, ala mukupaalila ukuti limwi ivintu vimasenuka. Acino lyene munene iciloto cino ninalota, nga lyene nani nimamanya ukuti mungandondolwela muno ciile.”

¹⁰ Yampandamano yaya pali pakwasuka yati, “We musambazi, kusi nanti wenga apa mpanga ya pano pansi wino angakunena vino ukasi kumanya. Kusi umwene nanti wenga uwamaka, wino watala uzya yakasapoola, na mamanyamano, na alozi, icintu camusango ndi uu.

¹¹ Cintu cino we mwene ukuuzya ala icikome wakwe cimwi cakuti kusi umuntu nanti wenga angakulotwela suka sile yaleza, nga nayo yasiikala apakasi ka antu.”

¹² Apa kwasuka vivyo, cii calenzile umwene ukusoka wakwe cimwi cakuti apeela ni lamulo lya kukoma antu yonsi amano umu Babiloni.

¹³ Acino ilamulo lyapilwe lyakukoma yonsi pyu, ukwikapo na Danieli na yacuza yakwe kwene.

Leza walotwela Danieli iciloto namuno ciile

¹⁴ Lyene Danieli aya kuli Alioki, musika mukalamba wakwe yakalinda ya mwene, wiyo uwapilwe ilamulo lyakukoma antu yamano yonsi mu Babiloni. Nga Danieli atekela apakulandana na aliwe.

¹⁵ Amuuzya ati, “Uzye pacani cino umwene watapelela ilamulo ilikakate ndi lii?” Lyene Alioki pali pakulondolwela Danieli umulandu.

¹⁶ Zuwazuwa Danieli aya ku mwene ku kulenga kuti apelwe akasita, pakuti anganena umwene muno iciloto ciile.

¹⁷ Alino lyene Danieli aya ku ng'anda ukwakwe nga alondolwela yacuza yakwe umulandu uu, Hananiya, Misyaeli, na Azaliya.

¹⁸ Lyene Danieli ayakonkomezya kuti yapepe kuli Leza wa kwiyulu kuti aye na mizu kunoyali nu kumulenga kuti ayalondolwele inkama pakuti yatakomwa kumwi na yampandamano amu Babiloni.

¹⁹ Lyene usiku ulya uli umwi kwene inkama ilya yasokolwilwe kuli Danieli mu cilolwa, nga nawe alumbanya Leza wa kwiyulu

²⁰ avwanga ati, “Lumbanyini Leza amanda pe! Wene uwamano nupya waya na maka.

²¹ Wene akaangalila utusita ni viputulwa vya mwaka, akalasika antu apa wene nu kuyasisya penepo. Aliwe kwene akapeela amano ku antu yamano, nu kumanya kuli yayo akailuka.

²² Wene akasokolola ivintu ivizike nupya vya nkama. Wene amanyile ivyafiswa mu mfinzi, nu luswepo lwamuzinguluka monsi.

²³ Nkukutaizya nu kukulumbanya, we Leza wa vikolwe vyane. Wemo wampeela amano na maka. Watuasuuka ni pepo lyane nu kutulanga vyakuti tukanene umwene.”

Danieli walotwela nu kulondolwela umwene iciloto

²⁴ Lyene Danieli aya kuli Alioki, wino umwene wapile ilamulo lya kukoma antu amano yonsi amu Babiloni, nga amunena ati, “Utezya ukukoma antu amano amu Babiloni. Wemo untwale sile ku mwene, nga nani namaya nkamulondolwele iciloto.”

²⁵ Lilyo kwene Alioki atwala Danieli ku mwene nga anena umwene Nebukadineza ati, “We mwene, umu azya afuma ku Yuda, natinzana mwenemo umuntu wino angakunena muno iciloto ciile.”

²⁶ Umwene nawe auzya Danieli (wino izina lyakwe nalyuze a Belitesyazali) ati, “Uzye ungandotwela iciloto nu kundondolwela muno ciile?”

²⁷ Danieli aasuka ati, “Musambazi, kusi umulozi, nanti mumanyamano wenga, nanti akasapola, nanti mpandamano wino angakunena cico.

²⁸ Lelo kwaya Leza umwiyulu, wino akasokolola vya nkama. Wene watakulanga we mwene Nebukadineza ivilacitika mu manda akwiza. Lyene kankunene iciloto, icilolwa cino wakweti lino wakaswile.

²⁹ “Walanga lino we musambazi ucikaswile, walosile ivintu iviliza inkolelo. Nga Leza wino akasokolola inkama nawe akulanga ivilacitika.

³⁰ Lyene inkama ii yatisokololwa kunondi, asi pamulandu wakucenjela ukuluta ali wensi, lelo apakuti we musambazi ungamanya muno iciloto ciile nu kwiluka vino vizile mu mutwe wako.

³¹ “We musambazi, mu cilolwa cako waweni nga inkolelo paimi iciluwi icikulu wakwe cimwi, iciyengese, nupya cakoofya mukuloleka.

³² Umutwe wa ciluwi cico wapangilwe na zaabu muswefiwe. Icisao na makasa yakweco vyapangilwe na siluva. Umusana na yanamfyumfyu yakweco vyapangilwe nu mukuwa,

³³ na maulu yakweco yapangilwe ni cela, nga ni ngazo zyakweco zyapangilwe ni cela ni ivu.

³⁴ Walanga ucili lolekesya, iwe likulu lisozoka apa mwamba ukunuke ukwaula umwi kulilema, nga litamola ingazo zya cela ni ivu, zya ciluwi cici, ilizivungola.

³⁵ Lyene icela, iivu, umukuwa, siluva nga na zaabu navyo kwene vivungolwa apa nsita ili imwi kwene vikolana na cungu apa lwano apa nsita ya pamwela. Umuza nao iulula vyonsi vii ukwaula kusyapo nanti kamwi. Lelo iwe lyene likula mpaka liya umwamba uno walimvile insi yonsi.

³⁶ “Cii cili ciloto cino walosile, nga ndakai tumalotwela umwene iciloto.

³⁷ We musambazi, wewe uli mwene mukalamba pali yamwene yonsi. Leza wa mwiyulu wakulasika pa wene, wakupeela na maka nu ulamba nga nu lulumbi.

³⁸ Wene wika antu ni vinyama vya mpanga ni vyunyi vya mulwelele mu makasa yako. Konsi kuno vikaikala wewe uli kateeka wakwevyo vyonsi. Wewe uli mutwe ulya wakwe zaabu.

³⁹ “Apacisila cako kuliza uwene nauze, lelo utalaya ukulu wa wene wako. Alino kulalondelelapo uwene wakwe citatu, uwa mukuwa, uno ulateeka insi yonsi.

⁴⁰ Mukusyalikizya kulalondelapo uwene wakwe cini, ukome wa cela, pano icela cikatamola nu kuvungola ivintu vyonsi. Ndi vino icela cikatamola ivintu vyonsi, vivyo kwene cilatamola nu kuvungola amawene yankolelo yonsi.

⁴¹ Wali walola ukuti ingazo nu tukando imbali imwi vyali iivu ni mbali imwi vyali icela. Cii calola mukuti ulaya uwene wankanikane pakasi. Wene ulaya ukome wa cela. Pano icela cikatamola nu kuvungola ivintu vyonsi vyasyala.

⁴² Utukando nato imbali imwi twali icela ni mbali yuze twali iivu. Cii calola mukuti imbali imwi ya wene ilaya ikome nga ni mbali yuze nayo ilaya itonte.

⁴³ Waliwalola ukuti icela cuminkanyiziwe nivu. Cii calola mukuti yakateeka ya wene ulya yalezya ukulemenkanya inko mu kuzitwalizya, lelo yalaposiwa, ndi vivi kwene vino icela cinguminkanyiziwa sile nivu.

⁴⁴ “Umu nsita zyakwe yakateeka yalya, Leza wa kwiyulu alakatusya uwene uno utalatala wononwe. Wene utalatala ucimviwe, lelo ulonona amawene yauze yonsi nga lyene wikalilila amanda pe.

⁴⁵ Waliwalola vino iwe lyasozoka ukufuma pa mwamba ukunuke ukwaula kuti umwi alikumye nga navino lyalilyafwanta iciluwi capangilwa ni cela, nu mukuwa, ni ivu, na siluva, nga na zaabu. Leza Mukulu akukunena we musambazi ivilacitika mu manda akwiza. Ninkunena ukulingana na vivi kwene vino waliwalota, nga nu kukulondolwela iciloto cako muno calola.”

Umwene walambula Danieli

⁴⁶ Lyene umwene Nebukadineza apona pansi afupime nga apeela ilamulo kuti yapeele impolelwa na mawila kuli Danieli.

⁴⁷ Umwene avwanga ati, “Leza wako umukulu pali yaleza yonsi, umwene wakwe yamwene, nupya aliwe akaumbula inkama. Manyile cii pamulandu wakuti we Danieli watuumbula inkama.”

⁴⁸ Lyene umwene alasika Danieli icifulo cicindame wakwe cimwi, amupeela na mawila avule nupya. Wene aleka kuti ateeka mu muputule onsi wa mpanga ya Babiloni nu kumucita kangalila mukalamba wakwe yampandamano yonsi akwi sano.

⁴⁹ Ukuluta pali cico, Danieli alenga umwene kuti alasike Syadilaki, Mesyaki, na Abedinego pa wangalizi wa milimo imwi yamu muputule wa mpanga ya Babiloni. Lelo Danieli wene wasile akutumikila mu musolo wakwisano.