Danieli 11 - Amazwi Yakwe Leza 2013

¹ “Mu mwaka wakutandika wakuteeka kwakwe Dalyusi uwaku Mede, nemo intoola ulusansa lwane ukumutungilila nu kumucingilila.

² Lyene vino namakunena ivyacumi.” Umungeli wilya avwanga ati, “Yamwene nayauze yatatu yalateeka umu Pesya, nga lyene wakwe cini alaya umukama ukuluta yonsi asyala. Apa nsita ino wene alaya na maka, alatunkola antu kuti yalwisye uwene wa Gilisi.

Uwene wa Eguputo nu wa Silya

³ “Lyene kulaloleka umwene wamaka. Wene alateeka uwene ukulu nu kucita consi cino akasi.

⁴ Lelo apacisila cakuloleka kwakwe, uwene wakwe ulapalukana nga wankanikane pani. Yamwene asi yamu mupanda wakwe yalateeka mu cifulo cakwe, lelo yatalaya na maka ndi yano wene wakweti.

⁵ “Umwene waku Eguputo alaya na maka, lelo wenga wamuli yamusika ya vita vyakwe alaya na maka ukuluta aliwe nga alateeka uwene ukulu kuluta.

⁶ Apacisila ca myaka imwi, umwene waku Eguputo alalemana nu mwene waku Silya nu kumupomela umwana wakwe umwanaci. Lelo kulemana kwao kutalatwalilila awe. Wene, nu muci wakwe, nu mwana wakwe, kumwi na aomvi yano yamusukilile, yonsi kwene yalakomwa.

⁷ “Apacisila, wenga uwamu akazi kakwe alaya umwene. Wene alalwisya ivita vya mwene waku Silya, nu kwingilila mu musumba wao wa malinga, yayacimvye.

⁸ Wene alaswilizya ku Eguputo amaunkolanya yao yakwe tuleza twao nga na vyakwe zaabu na siluva ivyapilwe kuli tuleza tutu. Lyene alatala asye umwene waku katutu apacisila ca myaka imwi.

⁹ Lyene umwene waku katutu alazanza impanga ya Eguputo, lelo yalamucocovya mpaka aswilile cisila.

¹⁰ “Ana yakwe aonsi yalaiteyanya ku kulwa inkondo nu kukolonganika impuka ya vita ikulu. Umwana wenga pali yayo alafuma watauwa wa mukuku nga alwisye umusumba wa anisi uwa malinga.

¹¹ “Mu ukali wakwe umwene waku Eguputo alaya ku kulwisya umwene waku Silya nu kulema impuka yakwe ikulu ya vita.

¹² Wene alaya ni cilumba apa kucimvya kwakwe nu kukoma asilika avule, lelo atalatwalilila ukucimvya, awe.

¹³ “Umwene waku Silya alaswililamo nga alakonganika impuka ikulu ya vita ukuluta ino wakweti inkolelo. Apacisila ca myaka imwi, wene alawela ni mpuka ikulu ya vita ino ilaipangasya ningo.

¹⁴ Lyene antu avule yalasangukila umwene waku Eguputo. Nga antu yamaka yamwi antu yako kwene yalacita usangu pamulandu wa cilolwa cino yene yaweni, lelo yalacimviwa.

¹⁵ Acino umwene waku Silya alazanza umusumba ulya wa malinga nu kuupoka. Asilika yamu Eguputo yatalatwalilila ukulwa. Nanti asilika yao yanyela yatalaya na maka akulwa.

¹⁶ Umuzanzi waku Silya alayacita consi cino akasi, ukwaula kuti yamulesye. Wene alikala mu mpanga yalaiwa nga ilaya mu maka yakwe sutu.

¹⁷ “Umwene waku Silya alaya ni lango lya kuweluluka, ala akuomvya impuka yakwe yonsi ya vita. Lyene apakuti angonona uwene wa mwanisi wakwe, wene alalemana pamwi na aliwe nu kumupomela umwanakwe umwanaci. Lelo ilango lyakwe litalafikiliziwa.

¹⁸ Pacisila cakwe vii, wene alazanza amawene amu nkumba yakwe yemba nu kucimvya avule muli yayo. Lelo intunguluzi imwi iya inamasi ilamucimvya nu kumala icilumba cakwe. Umucumi wene alamuswilizizya icilumba cakwe.

¹⁹ Pacisila cakwe cii, umwene wilya alaseleukila ku misumba ya malinga yaku mpanga yakumwao lelo yalamucimvya, nga na iyo ilaya ili mpela yakwe.

²⁰ “Impyanyi yakwe ilatuma umusanguzi apakuti umu lusangu amuno akavuzye ivyuma vyamu wene wakwe. Lelo mu myaka sile inono umwene wilya alakomwa lelo asi pa swe nanti umu nkondo.”

Umwene umwipe waku Silya

²¹ Umungeli atwalilila ukulondolola ati, “Umwene wino alalondelelapo uwaku Silya alaya umwipe wiyo atakwata ni nsambu zyakuya umwene. Wene aliza mu kwiukizya nu kupoka uwene ulya mu ucenjezi.

²² Ali wensi wino alamusangukila, nanti angaya a Simapepo Mukulu wakwe Leza, wene yalamukoma nu kumulovya.

²³ Apacisila ca kuzumilizyanya na aliwe, wene alacita ucenjenzi, nga alaya na maka nanti angala alateeka sile antu incepelwa.

²⁴ Wene alazanza umuputule wa mpanga imwi umu kwiukizya nupya alacita ivintu vino kusi nanti wenga umu vikolwe vyakwe uwatazile acita. Lyene alankanya visampwe ni vyuma kuli yayo akamulondela. Nupya alumana akapi na yamwi kuti alwisye imisumba ya malinga, lelo atalaya ni nsita ikalamba yakucita cico.

²⁵ “Wene alapama nu kukatusya impuka ya vita ikulu kuti akalwisye umwene waku Eguputo, wino alaiteyanyizizya ivita vyakwe vya maka ku kumulwisya. Lelo umwene waku Eguputo yalamusomba nga alaposiwa kucita cico.

²⁶ Yampandamano yakwe yalamonona. Asilika yakwe avule yalakomwa, nga ni mpuka yakwe ya vita ilakomwa yonsi pyu.

²⁷ Lyene yamwene yalya yaili yalikala nu kulya icakulya pamwi, lelo amalango yao yalaya aipe, nupya yalasombana. Yene yatalakwata cino yakulonda, pamulandu wakuti insita yakweco itatala yafika.

²⁸ Umwene waku Silya alaswilila kumwao ale asenzile ni visampwe vyonsi, lelo umwenzo wakwe ulaya ku konona upefi wa antu yakwe Leza. Wene alacita ndi vino akasi nga lyene aswilile ku mpanga yakumwao.

²⁹ “Apa nsita yasontwa wene alazanza Eguputo nupya, lelo insita ilya citalaya vino cali apankolelo.

³⁰ Ivita vyaku Loma viliza mu vyombo nu kumulwisya, nga intete zilamulema. “Lyene alasenuka nu kuswilila ku kuzanza upefi wa antu yakwe Leza. Wene alalondela umpandamano wakwe yayo akana upefi ulya.

³¹ Asilika yakwe yamwi yalakowezya Ng'anda ikulu yakwe Leza. Yalaleka antu yate kupeela impolelwa zya cila wanda nga yimike ni Cawinyi ca Ononyi.

³² Umu usomvi amuno umwene wilya alakoopola yayo afutatila mpiti upefi wao, lelo yayo akalondela Leza yalamukanya.

³³ “Intunguluzi zya antu zyamano zilapandana amano na antu yauze avule. Lelo pa kasita kanono yamwi muli alio yalakomwa umu nkondo nanti ukuyoca mpaka yafwe, nga na yamwi yalayiila ivintu nu kuyasumbila mu ng'anda ya minyololo.

³⁴ Lino ukukomwa kucili kukutwalilila, antu yakwe Leza yalaazwiliziwa panono, nanti angala aingi ailundanya kuno yali yalacita cico pamulandu sile wakwe ukaitemwe.

³⁵ Yamwi mu ntunguluzi zizi zyamano yalakomwa, lelo pamulandu wakwe cii antu yalasangululwa. Cintu cii cilatwalilila mpaka ukufika nu kumpelelekezyo, umu nsita ino Leza wasonta.

Umwene wino akaituumika umwisikulu

³⁶ “Umwene waku Silya alacita ndi vino akasi. Wene alaitakizya ukuti umukulu kuluta Leza ali wensi, nupya alusile Leza Wapapelapela. Wene alacita cico ukufika lino Leza alamuvunuka. Leza alacita ndi mumu kwene muno wetetwile ukucita.

³⁷ Umwene wilya atalasumba amano kuli yaleza ya vikolwe vyakwe, nga na kuli leza wino anaci yatemwa. Umucumi wene atalasumba amano kuli yaleza yonsi, pamulandu wakuti alelenganya ukuti wene umukulu ukuluta leza ali wensi pali yayo.

³⁸ Umucifulo cakwe cico, wene alacindika leza wino akacingilila imisumba yamalinga. Alapeela amawila yakwe zaabu, siluva, na amawe yamutengo, nga nu kupeela vya mawila vyuze vikankala kuli leza wino ivikolwe vyakwe vitatazile vipepe.

³⁹ Apakuti acingilile imisumba yakwe ya malinga, wene alaomvya antu akapepa leza wa inamasi. Wene alacindamika yao amuzumila kuya intunguluzi, nu kuyalasika ivifulo vya papela umu wene wakwe, nga nu kuyalambula impanga.

⁴⁰ “Lino insita yakusyalikizya ya mwene waku Silya ilafika, umwene waku Eguputo alamuzanza, nga umwene waku Silya nawe alaipokolola ku maka yakwe yonsi, ale akuomvya amaceleta, imfwalasi, nga ni vimawato ivivule. Wene alazanza impanga izivule, nu kusalalamo ungati a mulamba wa mukuku.

⁴¹ Alazanza ni mpanga kwene iyalaiwa nu kukoma antu imintapendwa, lelo antu amu mpanga ya Edomu, ni ya Moabu, nga ni ncende yasyalapo umu mpanga ya Amoni yalapuuka.

⁴² Wene alazanza zizi zyonsi. Lelo atalapanya Eguputo.

⁴³ Alasenda ivyuma vifiswe vyamu Eguputo vyakwe zaabu na siluva nga ni vintu vyuze vikankala. Wene alacimvya aina Libya na ina Kusyi.

⁴⁴ Lelo amazwi yaluvwika ukufuma ku ufumondaka nu ku katutu nga yalamuletela ingofyo, nupya alakatuka umu cipyu ku kuyalwisya nu kulovya antu avule.

⁴⁵ Wene alasimpa na mataalu yakwe aku wene apakasi kakwe yemba nu mwamba apa kuulwa Ng'anda ikulu yakwe Leza. Lelo wene alafwa, nga kutalaya umwi kuku uwakumwazwilizya.”