Danieli 10 - Amazwi Yakwe Leza 2013

Cilolwa cakwe Danieli uku Luzi lwa Tigilisi

¹ Mu mwaka wakwe citatu wakuteeka kwakwe Kilusi umwene waku Pesya, uumbwilo wapilwe kuli Danieli (wino watemilwe izina lyakuti Belitesyazali). Ilandwe lyauko lyali lyacumi lelo lyali ilitale wakwe cimwi ukuvwa. Lyene lyalondolwilwe kuli Danieli mu cilolwa.

² Apa nsita ilya walanga ala nkulosya, imilungu itatu.

³ Ntalile cakulya nanti cimwi cisuma nanti inyama ili yonsi, nanti kumwa waini, nanti kusakula inyele mpaka lino imilungu ilya yapisile.

⁴ Pa wanda walenga amakumi yaili na yani uwa mwezi wakwe conga uwa mwaka ulya nemo naimi apa cituntu ca luzi lukulu lwa Taigilisi.

⁵ Insanzula amanso nga ndola umuntu umwi ala azwite insalu isuma itelepelele nga nu musipi wakwe zaabu.

⁶ Umwili wakwe ala ukuyengesa wa mawe ya belulo amutengo. Usyu wakwe wayengise wa kumyantula kwa nkuwa, nga na manso yakwe yalunkumanga wa moto. Amakasa yakwe yayengise wa mukuwa uswefiwe, nga ni zwi lyakwe lyuvwikike wa ciunda ci umba ilikulu.

⁷ Ne Danieli, nene nenga mpo naweni cilolwa cici. Antu yano twali nayo yataciweni, lelo yuvwile intete wakwe cimwi nga yutuka yaya yafisama.

⁸ Acino nasile nenga, ala nkulolekesya icilolwa cici cikulu. Munondi mutasile nanti amaka, nu usyu wane iupona cakuti kutali nanti wenga wakundooka.

⁹ Lyene lino nuvwile izwi lyakwe, impona pansi umu tulo utukulu, ala nu usyu wane ulozizye pa musili.

¹⁰ Lyene ikasa ilindema nu kunkatusya ala nkuzakaza mu makasa nu mu nteo.

¹¹ Umungeli anena ati, “We Danieli, Leza wakutemwa wakwe cimwi. Katuka nu kusumbako amano kuli vino namakunena. Nintumwa kunuli.” Pacisila lino mungeli wilya walanda cii, inkatuka ala ncili nkuzakaza.

¹² Lyene mungeli wilya anena ati, “We Danieli, utuvwa intete. Leza uvwa amapepo yako ukutandikila sile pa wanda uno wemo welenginye ukuicefya apakuti upelwe ukwiluka. Nani natiniza apa kwasukwa kwi pepo lyako.

¹³ Lyene mungeli kateeka waku Pesya andwisya apa manda amakumi yaili na onga. Lyene Mikaeli, wenga uwamu akalamba ya angeli, aiza ku kungazwilizya, pamulandu wakuti yansile nenga kuku ku Pesya.

¹⁴ Acino lyene natiniza kuti nkulondolwele ivilacitikila antu yako mu manda akwiza. Cilolwa ica manda akwiza.”

¹⁵ Lino mungeli wilya acili akundondolwela icintu cii, inkontama, nga inja wakwe ciulu.

¹⁶ Lyene mungeli wilya, uwalolike wa muntu, atambika ikasa lyakwe nu kunkumya apa milomo. Alino nani ntandika kuvwanga, imunena inti, “Musambazi, cilolwa cii caticintembola cakuti ntangata ukuzakaza.

¹⁷ Uzye nemo, ne muomvi wako, ningalandana nawe uli, we Mwene? Nemo nimpomponteka nupya munondi musi umupu.”

¹⁸ Nupya kwene umungeli wilya ankumya, nga nani inkoma ukuluta.

¹⁹ Wene avwanga ati, “We Danieli, Leza wakutemwa, acino utaleka icintu icili consi cikusakamike nanti kukoofya.” Lino wene wavwanzile cii, nemo inkomelekako nga mvwanga inti, “Musambazi, unene cino ukasi kuvwanga. Wemo watundenga ukuvwa ningo ukuluta.”

²⁰ Acino anena ati, “Uzye umanyile cino nizile kunuli? Nemo nasya nswilile ku kulwisya kateeka waku Pesya, nga lino ndapita, kateeka waku Gilisi aliiza.

²¹ Lelo inkolelo namatala nkunene ivyalembwa mu Lupapulo lwa Cumi. Kusi umwi uwakungazwa, suka sile Mikaeli, umungeli wino akalinda Izlaeli.