Ayebulai 8 - Amazwi Yakwe Leza 2013

¹ Cikalamba cino tukulanda cakuti tukweti Simapepo Mukulu wino wikala kwi lunji lya cilimba cakwe Leza mwiyulu.

² Wene ali Simapepo Mukulu wino akatumikila mukasi mu Ncende ya Muzilo kuluta. Kuli kuti mwi tenti lya cumi lino limikwa nu Mwene, asi muntu foo.

³ Simapepo Mukulu wensi akasontwa kuti apeela mawila nga ni mpolelwa zya nyama kuli Leza. Caleka Simapepo witu Mukulu nawe alinzile akwate cimwi cakupeela.

⁴ Ndi cakuti wali pano nsi lyene wene atangaya simapepo awe, pano kwaya yasimapepo yano akapeela mawila yano Masunde ya Ciyuda yalanda, nanti angala

⁵ mulimo uno yasimapepo yakaomba wene ukukolanya nupya ulangililo wa vintu vya mwiyulu. Cili ndi vino cali mu manda yakwe Mose. Lino wene wali pipi nu kukuula Itaalu lya upangano, Leza wamunenyile ati, “Sininkizya ukuti umapanga vyonsi kulingana nu musango uno nakulanzile pa mwamba.”

⁶ Lelo Yesu wapelwa mulimo wa usimapepo uwaluta pa mulimo wakwe yasimapepo yalya a mpiti, pano ali muntu wakukundanya antu na Leza mu upangano upya uwazipa kuluta uwa mpiti, pano upangano upya mwaya malayo asuma kuluta.

⁷ Ndi cakuti kutali kuluvyanya kumwi mu upangano wankolelo ale lyene upangano wakwe ciili utangalondekwa.

⁸ Lelo Leza wazana mulandu mu antu yakwe, lino wavwanga wati, “Manda yakwiza lino nemo ndapanga upangano upya na amu luko lwakwe Izlaeli nga na amu luko lwakwe Yuda.

⁹ Utalaya wa upangano uno napanzile ni vikolwe vyao pa wanda uno nayatozile ni kasa lyane nu kuyatungulula kuyafumya mu Eguputo. Yene yatali acumi ku upangano uno nacisile nayo. Caleka ntasumvile mano kunoyali.

¹⁰ Lelo Mwene witu akuti, uu upangano uno ndacita na ina Izlaeli mu manda akwiza. Ndalemba masunde yane muli yakampingu yao nu mu myenzo yao. Ndaya Leza wao, nao yalaya antu yane.

¹¹ Kusi umwi uwa munoyali wino alasambilizya mwina mupalamano nanti kunena mwina wakwe ati, ‘Manya Leza.’ Pano yonsi kwene yalamanya kutandika pa munono kufika nu ku mukulu.

¹² Ndelela maifyo yao nupya ntaliusya viponge vyao.”

¹³ Lino Leza akulanda pa upangano upya, wene akusenula ukuti upangano wankolelo wakota. Pano cino icakota ala cacucuka nupya cili nu kusila zuwa.