Ayebulai 4 - Amazwi Yakwe Leza 2013

¹ Ulayo wakwe Leza wakuti tulingila mu kupuza ucilipo. Lekini tucenjele kuti kutaya nanti umwi wino alaposiwa kwingila mu kupuza kuno Leza watulaya.

² Pano naswe kwene tuvwa Ilandwe Lisuma ndi vino yene yuvwile. Yene yuvwile landwe lelo litayacitile visuma vimwi, pamulandu wakuti lino yuvwile yatalipokelile nu utailo.

³ Lyene swe muno twataila tukaingila mu kupuza kuno Leza walavile. Cili wakwe vino wene wavwanzile ati, “Caleka nali musoke nu kulapa inti, ‘Yene yatalatala ingile mu mpanga ilya mu kupuza kuno nange njape!’” Wene wavwanzile vii nanti angala wamazile milimo yakwe ya kuumba insi.

⁴ Pano mu malembelo cavwangwa pamwi pamulandu wa wanda uwalenga cinimbali cati, “Leza wapuzile ku milimo yakwe yonsi pa wanda uwalenga cinimbali.”

⁵ Nupya cili cimwi kwene cavwangwa cati, “Yene yatalatala ingile mu mpanga ilya mu kupuza kuno nange njape.”

⁶ Nalikwene Leza wateyanya kuti antu yamwi yalingila mu kupuza kwakwe. Lelo auvwile Ilandwe Lisuma nkolelo yatingile pamulandu wakuntayela.

⁷ Uli mulandu uno Leza wasonta uwanda nauze uno ukaamwa ukuti “Ilelo.” Pacisila ca myaka iingi iyapisile, wavwanzile kupitila muli Davidi, vya wanda ndi vino calembwa mu malembelo yano yakuti, “Ndi muuvwa izwi lyakwe Leza, mutakomya myenzo.”

⁸ Ndi cakuti Yoswa wapile antu kupuza kuno Leza walavile, Leza atange alande pamulandu wa wanda nauze.

⁹ Lelo ndi vino cili, antu yakwe Leza yacikweti kupuza, ukuli wa kupuza kwakwe Leza pa wanda uwalenga cinimbali.

¹⁰ Pano wino wensi uwingila mu kupuza kwakwe Leza ala wapuza ku milimo yakwe yonsi, ndi vino Leza wapuzile ku milimo yakwe.

¹¹ Lekini lyene tucite consi cino tungacita kuti twingile mu kupuza kuku, pakuti kutaya umwi munotuli uwakuposiwa ndi vino cali kuli yaya pamulandu wa kuntataila kwao.

¹² Izwi lyakwe Leza ilya umi nupya likuomba. Lyene lyakalipa kuluta lupanga luno lwanyolwa konsi koili. Lyene likaputula nu kupenka monsi, kufika pano umi nu mupasi vyakomana, na muno yanamfyumfyu ni mimfyompo vyakomana lyene likapingula vilondwa, nu kwelenganya kwa mu mwenzo wa muntu.

¹³ Kusi cimwi cingafisama ku manso yakwe Leza. Vintu vyonsi mu uumbo onsi vili paswe nupya wene akavilola. Swensi kwene tulinzile kuilondolwela kunoli.

Yesu a Simapepo Mukulu

¹⁴ Lyene lekini tulemelele na maka ku utailo uno tukalanda. Pano tukweti Simapepo Mukulu nupya mucindame wino wapita kwiyulu kuli Leza. Wene a Yesu Mwana wakwe Leza.

¹⁵ Simapepo witu Mukulu asi umwi wino atange atuvwile luse pa utonte witu. Tukweti Simapepo Mukulu wino weziwe mu misango yonsi ndi vino naswe tukaeziwa, lelo wene atifizye.

¹⁶ Lyene lekini tutaile nu kupalamila ku cilimba ca wene cakwe Leza, kuno kuli cikuku. Tulapokelela mizu nu kuzana cikuku cakutwazwa lino twalonda kwazwiwa.