Ayebulai 3 - Amazwi Yakwe Leza 2013

¹ Mwe inane aina Klistu, mwe muno Leza waama, nkuti mwaelenganya pali Yesu. Leza wamutumile kuti aye Simapepo Mukulu nu mutumwa wa utailo uno tukulanda.

² Wene wali uwakutailwa kuli Leza, wino wamusolwile kuti aombe mulimo uu, wakwe vino Mose wali uwakutailwa mu mulimo wakwe uwamu ng'anda yakwe Leza.

³ Muntu wino akakuula ng'anda akapokelela mucinzi kuluta mucinzi wa ng'anda kwene iyo. Mu musango uli onga Yesu alinzile kupelwa mucinzi ukulu kuluta uno wapelwa kuli Mose.

⁴ Endi, cila ng'anda ikakuulwa nu muntu umwi, nga Leza aliwe uwakuula vintu vyonsi.

⁵ Mose wali muomvi uwakutailwa mu ng'anda yakwe Leza nupya wene wavwanzile vintu vino Leza alavwanga mu manda akwiza.

⁶ Lelo Klistu u Mwana uwakutailwa wino akaangalila ng'anda yakwe Leza. Sweswe tuli ng'anda yakwe, ndi twalemasya kuposya nu kutaila muli vino tukapaalila.

Kupuza kwa antu yakwe Leza

⁷ Caleka, ndi vino Mupasi Wamuzilo akuti, “Ilelo ndi muvwa izwi lyakwe Leza,

⁸ mutakomya imyenzo inu ndi vino vikolwe vinu vyacisile lino vyakatukile Leza, ndi vino vyali mu lwanga mu wanda ulya, lino vyezyanga Leza.

⁹ Leza ati, kuku akuno yanjezizye nu kulola vino ne Leza ningacita nanti angala yaweni vino nacisile mu myaka makumi yani.

¹⁰ Caleka nali musoke ku mukulo uwa, nga mvwanga inti, ‘Pe kwene yakaponga mu myenzo yao yakakana pe kumanya inzila zyane.’

¹¹ Nali musoke nu kulapa inti, ‘Yene yatalatala ingile mu mpanga ilya mu kupuza kuno nange njapele!’”

¹² Mwe inane, cenjelini kuti umwi uwa munomuli ataya nu mwenzo uwiipe uwa kuntataila, nu kufutatila Leza wa umi.

¹³ Lelo mwakomelezyanya amanda onsi lino insita iciliko ino mazwi yakwe Leza akati, “Ilelo” yatusoka pakuti kutaya umwi wino, iifyo lingamukomya mwenzo.

¹⁴ Pano tukaya yacuza yakwe Klistu ndi cakuti twalemelela ku upaalilo witu kufika nu ku mpelelekezyo, uwo uno twakweti pa kutandika.

¹⁵ Vii avino malembelo yalanda yati, “Ilelo ndi muvwa izwi lyakwe Leza, mutakomya imyenzo inu ndi vino vikolwe vinu vyacisile lino vyakatukile Leza.”

¹⁶ Uzye antu cii yano yuvwile izwi lyakwe Leza nu kumusangukila? Ayaya onsi yano Mose watungulwile kufuma mu Eguputo.

¹⁷ Uzye aweni yano Leza wasokile pa myaka makumi yani? Ayaya kwene aifizye, yano afwilile mu lwanga.

¹⁸ Lino Leza walafile ati, “Yene yatalatala ingile mu mpanga ilya mu kupuza kuno nange njapele,” uzye wene walandanga pali yaweni? Wene walandanga pali yao amusangukile.

¹⁹ Lyene twalola vino yene yaposiwe kwingila mu kupuza kuku pano yatakweti utailo.