Ayebulai 12 - Amazwi Yakwe Leza 2013

Leza ali Tata

¹ Swemo tukweti iumba likulu lyakwe yakambone, lino litulizizye. Acino lekini tufume ku vintu vyonsi vino vikatuvulunganya, na maifyo yano akatupalama lili lili. Lekini tusimule nu mukozya mu lwilo lwa kucimvya luno lwikwa nkolelo itu.

² Lekini twike manso pali Yesu, wino utailo witu wimililapo kufuma kukutandika kufika nu ku mpela. Wene atanenwike pamulandu wa mfwa ya pa lupanda! Wene atelenginye cimwi pa kuzewana kwa mfwa ya pa lupanda, pamulandu wa luzango luno lwali nkolelo. Ndakai atenzi kwi kasa lilunji lya cilimba cakwe Leza.

³ Elenganyini pa vintu vino wene wapisilemo nu kuposya lino yakaifya yamupasile cuze! Acino mutatonta nu kunenuka.

⁴ Pano mukulwisya maifyo lelo mwemo mutacili mulwisye kufika ku musinku wa kukomwa.

⁵ Uzye mwati mwilila mazwi yakukomelezya yano Leza akalanda kunomuli wa ana? Wene akuti, “We mwanane, utasuula vino Mwene akukusunda, nupya utatompoka lino wene akukunenola.

⁶ Pano Mwene akakalipila umuntu wensi wino watemwa nu kusunda umuntu wensi wino wazumila wa mwana.”

⁷ Posyini muli vino mukucula, pano kuli kusundwa kufuma kuli So. Kusundwa kwinu kukalanga ukuti Leza akucita vii kunomuli wa ana yakwe. Uzye kwatala kwaya mwana wino isi asyasunda?

⁸ Ndi musyasundwa wakwe vino ana yakwe yonsi yakasundwa, ala cikusenula vino musi ana yakwe acumi. Lelo ale mwemwe ana amu uzelele.

⁹ Akwasi itu yakatusunda, nga naswe tukayacindika. Uzye lyene tutangalusya kutontela Tata uwaku mupasi nga tuye nu umi?

¹⁰ Akwasi itu, yatata yatusundanga pa nsita inono ndi vino cayazipile kucita. Lelo Leza akatusunda kuti vintu vituzipile pakuti tukakumeko ku muzilo wakwe.

¹¹ Lino tukasundwa cikaloleka kwati icintu cakutuletela ulanda, asi nsansa. Lelo pacisila, yao akasundwa mu musango ndi uwo yakaya nu umi uwa mutende nupya wakucita vyawololoke.

Mazwi ya utunguluzi nu kuceulwa

¹² Acino mukomye makasa inu atonte nupya mutaleka makokola inu yazakaza!

¹³ Twalililini kupita umu nzila zyololoke, pakuti ingazo izikasinta zitalemala lelo zipoziwe.

¹⁴ Ezyini kwikala mu mutende na antu onsi, nu kwikala umi wamuzilo. Pano kusi umwi wino alalola Mwene kwaula kwikala umi wamuzilo.

¹⁵ Cenjelini kuti mutafutatila cikuku cakwe Leza. Mutaleka umuntu umwi akolane wa cimuti cilule cino cikakula nu kuleta intazi zingi kwi sungwe lyaciko.

¹⁶ Mutaleka umuntu umwi aye cizelele nanti kusula vya mupasi ndi vino Esau wacisile, wino uwakazizye uyeli wakwe ni cakulya conga sile.

¹⁷ Mwati mumanya ukuti pacisila wene walondanga kupolelelwa ni isi. Lelo yamulesizye, pano atakweti nzila yakusenula vino wacisile nanti angala wapapasile nu kuponya minsozi.

¹⁸ Ku mwamba wa Sinai, uno uwakanga moto nupya uno mungakumya, akuno aina Izlaeli izile. Lelo mwemo mutiza kweneko, ukuli mfinzi, kufitulukila ni cipupu,

¹⁹ kulila kwa ntandala nu kuvwika kwi zwi. Pacisila cakuuvwa izwi, antu yapapata kuti yatuvwa izwi nalyuze,

²⁰ pano yene yataposizye pa kuuvwa ilamulo likuti, “Nanti inyama kwene ndi yakumya ku mwamba, yene ilinzile kutamwa na mawe suka ifwe.”

²¹ Calolike ica koofya cuze cakuti Mose avwanga ati, “Nkuuvwa intete nupya nkuzakaza!”

²² Lelo mwemo mwiza ku Mwamba wa Zioni nu ku musumba wakwe Leza uwa umi, Yelusalemu uwa kwiyulu, muno mwaya angeli mintapendwa.

²³ Mwati mwiza ku ukongano wa luzango wa ana mayeli yakwe Leza yano mazina yao yalembwa mwiyulu. Mwati mwiza kuli Leza kapingula wa antu onsi, nu ku mipasi ya antu asuma yano Leza walula kuya afumaluke.

²⁴ Mwati mwiza kuli Yesu wakukundanya antu na Leza mu upangano upya nga nu ku wazi wakwe wapongolwilwe nu kukanyiwa muno mwaya vintu visuma cuze vyalavilwe kuluta, ivyamu wazi wakwe Abeli.

²⁵ Caleka tekelini, nupya mutakana kuuvwa kuli wino akuvwanga. Yao akanyile kuuvwa kuli Leza lino wavwanzile kunoyali kupitila muli Mose, yatatuuzilwe. Uzye lyene swemo tungatuulwa uli ndi twakana kuyela wino akuvwanga kunotuli kufuma kwiyulu?

²⁶ Lino Leza wavwanzile iila lyakutandika, izwi lyakwe lyatensizye insi pa nsita ilya. Lelo ndakai akulaya ati, “Nupya kwene ntalatensya sile insi, lelo ndatensya ni yulu kwene.”

²⁷ Mazwi akuti, “Nupya kwene” yakulanga paswe ukuti vintu ivyaumbwa vilatensiwa nu kufumiziwapo, pakuti vintu vino vitangatensiwa visyale.

²⁸ Lekini tutaizye Leza ndakai, pano twapokelela uwene uno utangatensiwa. Lekini twataizya nu kupepa Leza umu nzila ino ingamuzanzya nu mucinzi ni coopo kunoli.

²⁹ Tulinzile kucita cii, pano cumi kwene Leza umoto uno ukaonona.