Ayebulai 11 - Amazwi Yakwe Leza 2013

¹ Utailo ukapeela maka akuntatwisika vintu vino tukupaalila, nupya ukasininkizya vintu vino tusyalola.

² Pa utailo wao apano Leza wavwangile antu yampiti visuma.

³ Mu utailo amuno twamanya ukuti uumbo onsi waumvilwe kwi zwi lyakwe Leza, cakuti vikaloleka vyacisilwe kufuma mu vintu vino vitangaloleka.

⁴ Mu utailo amuno Abeli wapile impolelwa isuma kuli Leza kuluta ino Kaini wapile. Mu utailo amuno Leza wavwangile Abeli visuma ukuti wene umololoke, pano Leza umwisikulu uwamucitile umboni pakupokelela uwila wakwe. Mu utailo wakwe Abeli acili akuvwanga nanti angala wene wafwa.

⁵ Utailo uwalenzile kuti Enoki atafwa lelo asendwe kwiyulu. Kusi umwi uwamuzanyile, pano Leza wamusenzile kupeela. Malembelo yakalanda ukuti lino Enoki atali asendwe kupeela wene wazanzizye Leza.

⁶ Kusi umwi angazanzya Leza kwaula kukwata utailo. Pano wino wensi akaiza kuli Leza alinzile ataile ukuti Leza akuno waya nupya akalambula yao akamulondalonda.

⁷ Utailo uwalenzile kuti Nowa auvwe kusokwa kwakwe Leza pa vintu vino vyali nu kwiza, vino atatazile alola. Wene wayelile Leza nu kupanga cange muno aliwe na amu ng'anda yakwe yatuuzilwe. Cii calenzile kuti antu amu nsi yavunukwe, nga Nowa nawe apokelele uwila wa wololoke uno ukapelwa kuli yao ataila.

⁸ Utailo uwalenzile kuti Abulaamu ayele Leza lino wamwamile kuti afume kumwao, aye ku mpanga ino Leza wamulavile kumupeela. Wene wasile mpanga ya kumwao kwaula kumanya kuno wayanga.

⁹ Mu utailo wene wikalanga wa mwinamasi mu mpanga ino Leza wamulavile. Wene wikalanga mu mataalu ndi vino Isaki na Yakobo ikalanga, yao apokelile ulayo uli onga kufuma kuli Leza.

¹⁰ Pano Abulaamu walolelanga musumba ukulu uno kelenganya na kakuula wakweo a Leza, nga nu mufula wakweo uwa manda pe.

¹¹ Utailo uwalenzile kuti Sala apelwe maka akusenda indilwa nanti angala wali mukoloci. Wene welenginye vino wino uwamulavile wene uwakutailwa kukufikilizya malayo.

¹² Caleka mu muntu wii wenga, uwali kwati wafwa mpiti, mwizile mufuma amu mupanda wakwe. Nu wingi wakweyo wali wa ntanda zya mwiyulu nupya wa musensenga uwamu nkumba yakwe yemba uno utangapendwa.

¹³ Mu utailo amuno yaa yonsi yafwilile. Yene yatapokelile vintu vino Leza wayalavile. Lelo yavilolile kutali nu kuvizengela. Nupya yazumile paswe vino yali wa enyi nupya ainamasi muno nsi.

¹⁴ Yao akalanda vintu ndi vii, yakalangilila paswe ukuti yene yakulondalonda mpanga iyakwao.

¹⁵ Yene ndi yalukanga mpanga ino yasile, nga yali na mapange akuswililamo.

¹⁶ Lelo yalondesyanga mpanga isuma kuluta, mpanga ya kwiyulu. Acino Leza asi ni nsonyi zyakuti yamwama ukuti a Leza wao, pano wayateyanyizizya musumba.

¹⁷ Utailo uwalenzile kuti Abulaamu apeele Isaki mwana wakwe kuya impolelwa. Cii cacitike lino Leza wezizye Abulaamu. Abulaamu awino Leza walavile, lelo wene waiteinye kupeela mwana wakwe wenga sile aye impolelwa.

¹⁸ Leza wamunenyile ati, “Muli Isaki umulafuma amu mupanda wako yano nakulavile.”

¹⁹ Abulaamu welenginye ukuti Leza ali na maka akuleka kuti afwe yaye nu umi. Endi, tumalanda mukukolanya ukuti wene wapokelile Isaki kwati nalimwi wazyukuka kufuma ku afwe.

²⁰ Utailo uwalenzile kuti Isaki apolelele Yakobo na Esau, ayalaye ni vintu vya manda akwiza.

²¹ Utailo uwalenzile kuti Yakobo apolelele cila mwana pa ana yonsi yakwe Yosefu, pa nsita ino wene wali pipi nu kufwa. Wene wasintilile pa nsonzo yakwe, apepa.

²² Utailo uwalenzile kuti Yosefu alande pamulandu wa kufuma kwa ina Izlaeli mu Eguputo, pa nsita ino wali pipi nu kufwa, nga ayasila ulondolozi pali vino vyali nu kucitwa ku mwili wakwe.

²³ Utailo uwalenzile kuti akwasi yakwe Mose yamufise myezi itatu pacisila lino watavyalwa. Yene yaweni ukuti umwana muyembe nga yatuvwile intete zya kuntayela ilamulo lyakwe kateeka.

²⁴ Utailo uwalenzile kuti Mose lino wakula akane ukwamwa mwizikulu wakwe Falao kateeka.

²⁵ Mose camuzipile ukucula pamwi na antu yakwe Leza kuluta kuilyokezya mu kwifya pa nsita inono.

²⁶ Wene welenginye ukuti kusulwa pamulandu wakwe Mesiya kwacindama kuluta vyuma vyonsi vyamu Eguputo, pano wene walolekesyanga pa cilambu cilapelwa mu manda akwiza.

²⁷ Utailo uwalenzile kuti Mose afume mu Eguputo kwaula koopa ukali wakwe kateeka. Wene wakanyile kuswilila pano cali kwati waweni Leza wino asyaloleka.

²⁸ Utailo uwalenzile kuti Mose acite Ucilo nu kupeela ilamulo ku antu lyakukanya uwazi pa mema kuti mungeli wino wali nu kukoma mayeli atakoma mayeli ya ina Izlaeli.

²⁹ Utailo uwalenzile kuti aina Izlaeli yalambe Yemba Muyenzu kwati apa musili ume. Lelo aina Eguputo lino yezizye kucita cili conga, yene yamwela.

³⁰ Utailo uwalenzile viumba vi linga lya musumba wa Yeliko vipone pansi pacisila lino aina Izlaeli yauzingulwike manda cinimbali.

³¹ Utailo uwalenzile kuti Laabu cizelele atakomwa pamwi na yao atayelanga Leza, pano wene wazengile ningo inengu zya ina Izlaeli.

³² Uzye vyuze vino ningalanda vyani? Nati nulilwa insita yakulanda pali Gidyoni, Balaki, Samusoni, Yefita, Davidi, Samueli na yakasema.

³³ Mu utailo amuno yene yalwisizye nu kucimvya impanga zyuze. Yene yacisile visuma nga yapokelela vino Leza wayalavile. Yene yayazile milomo yakwe yacisama,

³⁴ yazimizye moto uwipisye nu kutuulwa ku kukomwa ku lupanga. Nanti angala yali atonte yene yapilwe maka nga yaya akome. Mu nkondo yali na maka cuze, nupya yacimvizye vita vya inamasi.

³⁵ Pakuya nu utailo anaci yamwi yapokelile akazi kao yano azyukwike kufuma ku afwe. Yauze nao yayacuzizye cuze suka yafwa, kwaula kuzumila kuti yasapulwe yaye antungwa. Yene yacisile cii kuti lino yalazyukuka yace yaye nu umi usuma.

³⁶ Yamwi yayasowike nu kuyanyambola, yauze nao yanyefilwe mu minyololo nu kuyatwala ku ng'anda yaminyololo.

³⁷ Yamwi yatamilwe na mawe, yamwi nao mili yao yaputwilwe pakasi na mukalalu, nga yamwi nao yakomwa ku lupanga. Yene yapitananga ala yazwite vizwalo vyapanzilwe ku mpapa zya mfwele nanti zya mbuzi. Yali apina, yazunyiwe nu kucuziwa cuze.

³⁸ Mpalume zi, kunoyali insi itayalingine kwikalamo! Yene yapitananga wa mbutusi mu lwanga nu mu myamba, ala yakufisama mu macele nu mu mimba.

³⁹ Yaa yonsi yalumbuka cuze pa utailo uno yakweti. Lelo yene yatapokelile vino Leza wayalavile,

⁴⁰ pano Leza mukuteyanya kwakwe watukwatila visuma kuluta. Ipange lyakwe lyali lyakuti yene yatangaya afumaluke suka twaya nao.