Ayebulai 10 - Amazwi Yakwe Leza 2013

¹ Masunde yakwe Mose yalanga umusango uzimantukile uwa vintu visuma vikwiza. Yene yali sile unkolanya wa vintu vikwiza. Acino nanti mpolelwa zyapeelwanga cila wanda na cila mwaka, lelo Masunde yakwe Mose yaposiwa ku maka ya mpolelwa kulenga antu yaye afumaluke.

² Ndi cakuti antu apepanga Leza mu cumi yaswefiwe ku maifyo yao, lyene yene yatange yasakamikwe pa maifyo yao nupya, nga nu kupeela kwa mpolelwa kungasila.

³ Lelo ndi vino cali, impolelwa zyaombanga ukwiusya antu maifyo yao cila mwaka.

⁴ Pano wazi wakwe yacipambasi ya ng'ombe nu wa mbuzi vitangafumya maifyo.

⁵ Pamulandu kwene uu, lino Klistu wali pipi nu kwiza muno nsi, wavwanzile ati, “We Leza, usyakulonda impolelwa na mawila, lelo watunteyanyizizya mwili.

⁶ Wemo usyazangila mu nyama zino zikaociwa pa kavuwa, nanti mu mpolelwa zya kufumya maifyo.

⁷ Lyene nani mvwanga inti, ‘Apanondi niza we Leza, kuti ncite kulonda kwako, ndivino calembwa pali nene mu lupapulo lwa Masunde yakwe Mose.’”

⁸ Nkolelo wavwanzile ati, “Wemo usyalonda nupya usyazangila mu kupelwa impolelwa na mawila, nanti mu nyama zino zikaociwa pa kavuwa, nga ni mpolelwa zya kufumya maifyo.” Wene wavwanzile cii nanti angala impolelwa zii zyonsi zikapelwa kulingana na vino Masunde yakwe Mose yakasambilizya.

⁹ Alino avwanga ati; “Apanondi, kuti ncite kulonda kwako we Leza.” Caleka Leza wasisya kuomvya kwa mpolelwa zyampiti nu kupyanikizyapo impolelwa yakwe Klistu.

¹⁰ Pamulandu wakuti Yesu Klistu wacisile vino Leza walondanga kuti wene acite, swemo swensi kwene twaswefiwa kupitila mu mpolelwa ino umwisikulu waipile lyonga nupya calimwi.

¹¹ Simapepo wensi Muyuda akaomba milimo yakwe cila wanda nu kupeela impolelwa zili zimwi maila aingi. Lelo impolelwa zii zitangafumya maifyo.

¹² Lelo Klistu wapile impolelwa yonga yakufumya maifyo, ni mpolelwa ii ikaomba manda pe. Lyene waile aikala kwi kasa lilunji lyakwe Leza.

¹³ Kuku akuno ndakai wene akulolela kufika lino Leza alamucimvizya anisi yakwe kuti yaye wacilimba ca ngazo zyakwe.

¹⁴ Mu mpolelwa yonga kwene amuno wene walenga ukuti antu yano aswefiwa kufuma ku maifyo yaye afumaluke manda pe.

¹⁵ Mupasi Wamuzilo nawe kwene watupeela umboni wakwe. Nkolelo wene akuti,

¹⁶ “Uu uli upangano uno ndacita nao mu manda akwiza. Ndika masunde yane mu myenzo yao nu kuyalemba mu melenganyo yao.”

¹⁷ Alino avwanga ati, “Ntaliusya maifyo ni nkota zyao nupya.”

¹⁸ Caleka lino vii vyelelwa, mpolelwa yakufumya maifyo isyakulondekwa.

Lekini tupalamile kuli Leza

¹⁹ Inane, swemo lyene tukweti untungwa umalilike uwakwingila mu Ncende Yamuzilo Kuluta, pano Yesu watufwilile.

²⁰ Wene watuyulila inzila ipya kupitila mu cisalu ca kucinga, kuli kuti kupitila mu mwili wakwe.

²¹ Tukweti Simapepo Mukulu wino akaangalila ng'anda yakwe Leza.

²² Caleka lekini tupalamile kuli Leza nu mwenzo uwa cumi nu utailo uwa mpomvu. Lekini tusunge myenzo itu iye iswepe, ni myelenganyizizye itu nayo iye ya untungwa kufuma ku viipe, ni mili itu ifulwe na manzi aswepe.

²³ Lekini tulemasye kulanda pa upaalilo witu kwaula kutonta, pano tukutaila ukuti Leza alafikilizya ulayo wakwe.

²⁴ Lekini twasakamala nu kwazwana nu kutemwa kucita visuma.

²⁵ Tutata kukongana pamwi kulingana nu mwata witu, ndi vino yamwi yakucita. Lelo lekini twakomelezyanya nu kuluta, pano mwati mulola ukuti Wanda wa Mwene ukupalama pipi.

²⁶ Pano ndi tukwifya ku mufulo nalino cumi cati cimanyikwa kunotuli lyene kutangaya impolelwa yakufumya maifyo itu.

²⁷ Icingasyala kweneko ukulolela nu koopa upinguzi uno ukwiza nga nu moto uwipisye uno ulonona antu, yano akana Leza.

²⁸ Muntu wensi wino asyakuyela Masunde yakwe Mose ndi yamusinila kuli yakambone yaili nanti kuluta, ala wene amapingulwa kukomwa kwaula luse.

²⁹ Uzye lyene citalalusya ku muntu wino akusula Mwana wakwe Leza? Nu ku muntu wino akalola wazi wa upangano wakwe Leza kwati cintu casilesile uno wamuswefya ku ui? Nu ku muntu wino akatuka Mupasi wino akuleta cikuku? Elenganyini kwipisya kwa kuvunukwa kuno wene alavunukwa!

³⁰ Pano twamanya wino uwavwanzile ati, “Ndalandula nu kumuswilizizya” nu wavwanzile ati, “Mwene alapingula antu yakwe.”

³¹ Kufumbatwa mu makasa yakwe Leza wa umi cintu cimwi ca koofya cuze.

³² Iusyini vintu ivya mucitikile ku mpiti. Mu manda yaya, pacisila lino luswepo lwakwe Leza lwayengesile panomuli, mwemo mwacuziwe mu vintu vingi lelo mutacimviwe mukulwisya kwinu.

³³ Nsita zimwi antu yamutusile pa lwalala nu kumucuzya. Nsita zimwi mwali aiteyanye kuilundanya kuli yao acuziwanga mu musango ndi uu.

³⁴ Mwemo mwakumileko ku kucula pamwi na anyepwe. Nalino yamuposile vyuma vinu vyonsi, mwemo mwacipokelile ni nsansa, pano mwamanyile ukuti mucikweti cuma cisuma cuze cino cikaikalilila manda pe.

³⁵ Lekini kuposya kwinu kutanenuka, pano kulamuletela cilambu cikulu.

³⁶ Mulinzile kuteeka myenzo, kuti mucite kulonda kwakwe Leza nu kupokelela cino walaya.

³⁷ Pano, cili ndi vino calembwa mu malembelo cati, “Kwasyala kasita kanono sile, na wino akwiza wasya aiize, wene atalalengela.

³⁸ Lelo antu yane, aololoke, yalaya nu umi pa utailo wao. Lelo ndi umwi uvwa intete wamfutatila, nemo ntalazangila muli aliwe.”

³⁹ Swemo tusi antu yano akamufutatila nu kulowa. Lelo tukweti utailo ukuti twatuulwa.