Amosi 9 - Amazwi Yakwe Leza 2013

Upinguzi wakwe Yawe pali yakapepa ya tuluwi

¹ Naweni Yawe ala aimi apipi na kavuwa. Wene wavwanzile ati, “Kunulini incesi zya Ng'anda ikulu yakwe Yawe, kuti umufula wakweyo utente. Muziongolwele pa mitwe ya antu. Yayo asyala ndayakoma umu nkondo. Kusi umwi wino alaleuka. Kusi umwi wino aluutuka.

² Ndi cakuti yangimba pansi mpaka yafike ku cifulo ca afwe, ikasa lyane lilayalema kuko kwene. Ndi cakuti yangakwela ukwiyulu kupela, ndayisya ukufuma kweneko.

³ Ndi cakuti yangafisama papela ya mwamba wa Kalimeli, ndayalondalonda mpaka njaleme. Ndi cakuti yangafisama pansi pali yemba mukulu, ndapeela ilamulo ku cilyanyi camwenemo kuti ciyalume.

⁴ Ndi cakuti anisi yao yayasenda umu uzya, kuku kwene ndapeela ilamulo lyakuti yayakome umu nkondo. Ndayacevya mpaka njaletele imikosi nupya ntalayazwa awe.

⁵ “Mwene, Yawe Wamaka yonsi, akakumya insi nga nayo itenta, nga yonsi aikala mwenemo iyalila. Insi yonsi ikatuka nu kupona wa luzi lwa Nailo.

⁶ Yawe aliwe waikuulila isano umwakwikala ukwiyulu, nupya wapanga ulwelele ungati umufula wa mpanga ya pano pansi. Wene akaama amanzi amuli yemba nu kuyapongolwela pa mpanga ya pano pansi. Wiyo kwene izina lyakwe a Yawe.

⁷ “Uzye mwe ina Izlaeli mutakoline na ina Kusyi? Avino Yawe wavwanga. Uzye asi nene nafumizye aina Izlaeli ku Eguputo? Uzye asi nene nafumizye aina Filisti ku Kafitoli na ina Asilya ku Kili?

⁸ “Cumi kwene, ne Yawe Simwandalali, nkulolekesya apa wene ulya umuzile amaifyo. Ndonona uwene uo apa mpanga ya pansi. Lelo ntalalovya ang'anda yakwe Yakobo. Avino Yawe wavwanga.

⁹ “Pano ndapeela ilamulo, alino ndapukanya aina Izlaeli ku na ku pakasi ka mitundu yonsi ya antu ndi vino yakapukanya imbezu mu lunyungo, nga kutalaya akaliwe konga akalaponela pansi.

¹⁰ Yakaifya yonsi amu antu yane yalakomwa umu nkondo, yayo yonsi yano yakati, ‘Uzanzo utalatuponela nanti ukutupalamila.’

Ukuweziwapo kwa wene wa Izlaeli

¹¹ Yawe akuti, “Mu wanda ulya ndawezezyapo uwene wakwe Davidi, uno ukoline wa citalang'anda, nu kuzifya iviumba vyakweo, mpaka uye vino wali. Ndaukuululula nu kuuwezezya mu mwata uno wayelile mwenemo.

¹² Acino pa nsita kwene ilya aina Izlaeli asyalapo yalacimvya ivyasyala vyamu Edomu, kumwi ni nko zyonsi zino zyamanyike ukwi zina lyane.” Avino Yawe wavwanga, wino alacita vintu vino walanda.

¹³ Yawe wavwanga wati, “Insita iliiza lino ingano zilakula ulwilo, ukuluta vino zingazombolwa zuwa. Amatingi nayo yalakula ulwilo, ukuluta vino waini angapangwa. Imyamba ilaatona waini umulyompe, numu tulundu mulakonkoloka waini.

¹⁴ “Ndawezya antu yane aina Izlaeli ku mpanga yao. Yalakuululula imisumba ino yononeka nu kwikala mwenemo. Yalalima vyalo vyamatingi nu kumwa waini wakwevyo. Yalalima imiyanda nu kulya ivyakulya vyakweyo.

¹⁵ Ndalema antu yane wa miti umu mpanga ino nayapile, nga kutalaya uwakuyafumya mwenemo, umu mpanga kwene iyo ino ndayapeela.” Avino Yawe, Leza winu wavwanga.