Amosi 4 - Amazwi Yakwe Leza 2013

¹ Uvwini amazwi yaa, mwe anaci aku Samaliya, mwemuno mukulu kwina wakwe yamutusa ya ng'ombe zyaku Basyani, mwemuno mukazunya apina nu kucuzya yayo aulilwa. Mwemo mwikalila sile ukupingula yawinu ala mukuti, “Tupelini ivyakuzusya uku nsingo.”

² Yawe Simwandalali mu muzilo wakwe ulya, walapa ati, “Cumi nkumunena ukuti insita iliza lino antu yalamukweta na maswelo wa nswi. Yalamuswela na maswelo wenga wenga mpaka nu wakusyalikizya.

³ Mulalompokela wenga wenga umu nzota zya malinga, alino lyene yalamusumbila lwaku Mwamba wa Halimoni.” Avino Yawe wavwanga.

Aina Izlaeli yaposiwa ukusambilila cimwi

⁴ “Yangini ku ncende yamuzilo ku Betele, mutandike nu kwifya kweneko. Yangini ku Giligali mulundulule nu kwifya. Letini amawila inu yonsi a cikumi cila manda yatatu.

⁵ Mupele umukate winu pakuti mutaizye Leza. Muitakizye apa mawila inu akuitemelwa, nu kuyuvwa pa mawila kwene yayo, pasi pano avino mwe ina Izlaeli mwatemwa ukucita. Avino Yawe wavwanga.

⁶ Anene nemuno namuponyezizye ivipowe mu misumba inu yonsi. Anene naponyizye inzala konsi kuno mwikalanga. Lelo lyonsi kwene mutatontile nu kuwela kunondi. Avino Yawe wavwanga.

⁷ “Anene kwene nemuno nanyefile imvula lino kwalile kwasyala sile imyezi itatu kuti muzombole. Anene kwene nemuno naleetanga imvula apa musumba umwi, nu kulesya imvula ukutonya pa musumba uze. Indeka ukuti imvula itonye pa calo cimwi, lelo pa calo cuze pene foo, mpaka ipuuma paya na solokoto.

⁸ Caleka antu amu misumba iili nanti itatu ndi yakatuka ukuya ku musumba umwi, kuti yakamwe amanzi, ulusala lwao lutaputukanga awe. Lelo nalyo kwene mwemo mutawezile kunondi. Avino Yawe wavwanga.

⁹ “Anene nalenzile kuti imbezu zinu zyonsi zyume uku ndwala nga nu kuvuvuma, mu miyanda inu nga nu muvyalo vinu vyonsi vya matingi. Makanta ononyile imisamvu kumwi ni miolivi inu kwene. Lelo mwemo mutawezile kunondi. Avino Yawe wavwanga.

¹⁰ “Namuponyezizye impungo ya ndwala wakwe ilya ino naponyezizye aina Eguputo. Nakomisizye alumendo inu umu nkondo, natungulwile ni mfwalasi zinu uku anisi inu. Namununsyanga ni fungo lya vyala ilyafumanga mu nkambi ya asilika. Lelo mutawezile kunondi. Avino Yawe wavwanga.

¹¹ “Nononyile yamwi amuno muli wakwe vino nononyile antu amu misumba ya Sodoma na Gomola. Mwemuno mwapuswike mwali wa visonsololwa vya moto. Lelo mutawezile kunondi. Avino Yawe wavwanga.

¹² “Acino mwemo mwe ina Izlaeli ndamuvunuka. Pamulandu wakuti ndamucita cimwi mwe ina Izlaeli, mulinzile mwaiteyanya uku komenkanya Leza winu.”

¹³ Wiyo kwene wino akapanga imyamba, nu kupanga icipunga, nu kuumbula ukwelenganya kwakwe ku muntu, aliwe kwene akasenula umusanya iuya usiku, aliwe kwene akapita pa kansonsi ka panonsi. Izina lyakwe a Yawe Wamaka yonsi!