Amosi 3 - Amazwi Yakwe Leza 2013

Yakambone akusinila aina Izlaeli

¹ Mwe uvwini amazwi yano Yawe wavwanzile, amazwi akumukalipila mwe ina Izlaeli. Kuli kuti uluko lonsi luno wafumizye mu mpanga ya Eguputo. Wene wavwanzile ati,

² “Nemo namusolwile mwemwe mwenga mpo pakasi ka mitundu yonsi iya pano nsi. Lyene ndamuvunuka apamulandu wa maifyo inu yonsi.”

Imilimo yakwe yakasema

³ Uzye antu yaili yangapitila pali pamwi ukwaula kuzumilizyanya?

⁴ Uzye cisama angaluluma mu mutengo ndi cakuti atazanyile cakuti aleme? Uzye mwana cisama angaluluma mu cimpinda ndi cakuti pasi cino alemile?

⁵ Uzye icunyi cingatamwa umwi liya ndi cakuti musi lyambi? Nanti uzye ulukose lungavwampuka ndi kamwi katatensizyeko?

⁶ Uzye lino intandala yalila mu musumba, antu yasizakaza uku ntete? Uzye umukosi ndi wapona mu musumba, asi kuti Yawe uwacita cico?

⁷ Cumi kwene Yawe asicita icintu nanti cimwi ukwaula kuumbula uteyanyo wakwe, kuli yakasema aomvi yakwe.

⁸ Cisama ndi waluluma, uzye aweni atanguvwa intete? Yawe Simwandalali ndi wavwanga, uzye aweni angalesya ukukosola amazwi yakwe?

Ukuvunukwa kwa ina Samaliya

⁹ “Upundilile ku antu akaikala umu malinga aku Asyidodi, nu ku antu akaikala mu malinga aku Eguputo. Uyanene kuti yakongane ku myamba iyazinguluka Samaliya, alino mulole icimvulunganya icili kweneko, ni vyaukakasi nu lufyengo ivikucitikila aikazi ya mwenemo.

¹⁰ “Yene yatamanya ukucita vyaololoke yayo akazuuzya ivisampwe vino yapokolola mu kwiya.” Avino Yawe wavwanga.

¹¹ Caleka Yawe Simwandalali wavwanga wati, “Anisi yalalizizya impanga ilya, nu kuongolola amalinga yakweyo, nu kupokolola vyonsi ivyaya mwenemo.”

¹² Yawe wavwanga wati, “Ndi vino kacema akalombola imyendo iili sile, nanti ikutwi lya mfwele iyatiliika kuli cisama, vili vino aina Izlaeli yanono sile yalatuulwa, yayo aikala ku Samaliya pa vilimba vyao vyakupemwililako na pa miceka yao mu Damasiko.

¹³ Uvwiini nu kupeela umulandu ku amu mupanda wakwe Yakobo, kuli kulanda kwakwe Yawe, Leza Wamaka yonsi.

¹⁴ Pa wanda uno ndavunuka aina Izlaeli pamulandu wa uyi wao, ndatamola utuvuwa twaku Betele, nga ni mpembe zyatuko zilavunolwa nu kupona pansi.

¹⁵ Indatamola amang'anda inu ansita zya pamwela, kumwi na mang'anda ansita zya cisiku. Amang'anda ayemviwa na mino ya nzovu yalononwa, ni vimang'anda vyonsi vikulu vilatamolwa.” Avino Yawe wavwanga.