Aina Levi 27 - Amazwi Yakwe Leza 2013

Masunde yapa mawila apelwa kuli Yawe

¹ Yawe apeela amazwi autunguluzi kuli Mose

² kuti anene aina Izlaeli ukuti umuntu ndi walapa ukuti wapeela umuntu muze kuli Yawe, lelo pacisila cakwe cico akulonda kumukulula, vino angalipa pa kumukulula aivi.

³ Pa muntu umonsi ukufuma pa wa myaka amakumi yaili kufika pa wa myaka amakumi mutanda yakuvyalwa, alinzile ukulipa yasiluva amakumi yasano ukulingana ni cipimo ca ku Ng'anda ikulu yakwe Leza.

⁴ Muntu wiyo ndi umwanaci, alinzile ukulipa yasiluva amakumi yatatu.

⁵ Pa muntu wa kufuma pa myaka isano nu kufika pa myaka amakumi yaili yakuvyalwa, ndu monsi alinzile ukulipa yasiluva amakumi yaili, alino umwanaci wene alinzile ukulipa yasiluva ikumi lyonga.

⁶ Pa mwana umonsi ukufuma pa mwezi onga kufika pa myaka isano, ndu monsi alinzile ukulipa yasiluva yasano, alino umwanaci wene alinzile ukulipa yasiluva yatatu.

⁷ Pa muntu umonsi wiyo akweti imyaka amakumi mutanda nanti ukuluta, alinzile kulipa yasiluva ikumi na yasano. Alino umwanaci wene alinzile ukulipa yasiluva ikumi lyonga.

⁸ Ndi cakuti umuntu wiyo wino walafile mupina atangalipa pa mutengo waku ng'anda yakwe Leza, wene alinzile ukuleta kuli simapepo umuntu wino walavile ukupeela kuli Yawe. Lyene simapepo alinzile ukupima mutengo unono kulingana na maka ya muntu akulipa.

⁹ Ndu wila uno umuntu walafile ukupeela inyama ino ingapokelelwa wa wila kuli Yawe, ale lyene uwila onsi wapelwa kuli Yawe waziliziwa.

¹⁰ Muntu uwalafile mulapo atangapyanikizyepo inyama yuze. Ndi angapyanikizyapo, ale lyene inyama zyoili zimaya izyakwe Yawe.

¹¹ Lelo ndu wila uno umuntu walafile uwa nyama ikowele, ino itangapokelelwa kuli Yawe, umuntu wiyo alinzile atwale inyama iyo kuli simapepo.

¹² Simapepo amaika mutengo wakweyo kulingana nu kuzipa nanti nu kwipa kwaiko.

¹³ Ndu mweneco akasi kukulula inyama iyo, lyene alinzile ukulipa mutengo wakweyo nga alundepo conga camuli visano pa mutengo uwo.

¹⁴ Lino umwi wapeela ng'anda yakwe kuli Yawe, simapepo alinzile kwika mutengo kulingana nu kuzipa nanti kwipa kwaiko, nga uwo kwene umaya uli mutengo.

¹⁵ Muntu ndi wapeezile ng'anda iyo kuli Yawe, lyene akasi kuti akulule ng'anda iyo, alinzile ukulipa mutengo wakweyo nga alundepo conga ca muli visano pa mutengo uwo. Lyene ng'anda ilaya iyakwakwe.

¹⁶ Muntu ndi wapeela ciputulwa cimwi ca mpanga yakwe kuli Yawe, lyene mutengo ulinzile kwikwa ukulingana ni cipimo ca mbezu izingakomelwamo, pa cipimo ca mpiya zyakwe siluva ikumi zingakala baale ukulingana makilogalamu amakumi yaili.

¹⁷ Muntu ndi wapeela impanga yakwe zuwazuwa lino Mwaka wa Ukuluzi wasila, lyene alinzile ukulipa kulingana nu mutengo onsi.

¹⁸ Lelo ndi wapeela impanga iyo pa nsita imwi ukuluta pali ii, lyene simapepo alinzile ukupima mutengo wa mpiya kulingana ni myaka yatisyala kufika mu Mwaka wa Ukuluzi. Alino lyene mutengo ulinzile kucefiwako.

¹⁹ Muntu ndi wapeezile impanga iyo kuli Yawe, lyene akasi kuti akulule impanga iyo, alinzile ukulipa mutengo wakweyo nga alundepo conga ca muli visano pa mutengo uwo. Lyene impanga ilaya iyakwakwe.

²⁰ Muntu wiyo ndi wakazya impanga iyo kuli umwi kwaula kuti nkolelo akazye impanga iyo kuli Yawe, ale lyene asi ni nsambu ya kukulula impanga iyo.

²¹ Pa mwaka uze ukwiza uwa ukuluzi impanga iyo ilaya iyakwe Yawe, pe. Ilaya iyakwe simapepo.

²² Muntu ndi wapeela kuli Yawe impanga ino watakala, ino isi iya luko lwakwe,

²³ lyene yasimapepo yalinzile yike mutengo wakweyo mpaka nu Mwaka wa Ukuluzi walondelela. Lyene umuntu wiyo alinzile ukulipa mutengo uwo mu wanda kwene uwo. Impiya iyo iyakwe Yawe.

²⁴ Mu Mwaka wa Ukuluzi icalo cilinzile ciswiliziwe ku mweneco wakutandika nanti ku amu mupanda wakwe.

²⁵ Mitengo yakwe vyonsi ilinzile kwikwa kulingana ni cipimilo caku Ng'anda ikulu yakwe Leza

²⁶ Iyeli lya nyama ilyakwe Yawe. Acino kusi umwi angalipeela kunoli ukuya uwila wa kuitemelwa. Usi mulandu ingaya a masaye, imfwele nanti imbuzi, lyene ilyakwe Yawe.

²⁷ Lelo iyeli lya nyama yamifitalila lilinzile kukululwa pa mutengo wakweyo uno wikwa, nu kulundapo conga ca muli visano pa mutengo uwo.

²⁸ Kusi umwi angakazya nanti kukulula icintu cino atapeela kuli Yawe kwaula vimwi vikulondekwa ukucita, ciye umuntu, inyama nanti impanga. Cintu cico icakwe Yawe amanda pe.

²⁹ Kusi umuntu nanti wenga uwapeelwa ku kononwa kwaula vimwi vikulondekwa ukucita, wino angakululwa. Wene alinzile akomwe.

³⁰ Conga pa vintu ikumi muli vyonsi vino impanga ikamezya, usi mulandu cingaya imbezu nanti viseekwa, cene icakwe Yawe.

³¹ Ndi umuntu akasi kukulula icili consi pali vivyo kuti cimuwelele, lyene alinzile ukulipa mutengo uno wazumiliziwa, aungilizyepo na conga pa vintu visano pa mutengo wakweco.

³² Yonga pa nyama zyamu viteekwa ikumi iyakwe Yawe. Lino inyama zizyo zikupendwa, cila nyama yalenga ikumi iyakwe Yawe.

³³ Mwineco wa nyama zizyo atalinzile kuzitantika pakuti izisi ningo zisololwe. Nupya atangapyanikizyepo inyama yuze. Ndi wacita vivyo ale lyene inyama zizyo zyoili zilaya izyakwe Yawe nupya zitangakululwa.

³⁴ Yaa, ali malamulo yano Yawe wapeezile Mose pa Mwamba wa Sinai kuti anene aina Izlaeli.