Aina Levi 26 - Amazwi Yakwe Leza 2013

Upolelelo wa kuyela

¹ Yawe avwanga ati, “Mutaipangila tuluwi, nanti kwimika viumbwa vya unkolanya nanti kwimika incesi zya mawe, nanti kuiwazila vintu vii kuti mwavipepa. Nene indi Yawe Leza winu.

² Mwasunga amanda yane ya Masabata nu kucindika cifulo cane camuzilo. Nene indi Yawe.

³ “Ndi mwalondela amasunde nu kuyela malamulo yane,

⁴ nkaamupeela imvula pa nsita yakweyo pakuti musili wamezya ivilimwa ni miti ya vyalo vinu yaseeka viseekwa.

⁵ Mukaatwalilila ukuzombola ivilimwa mpaka kufika ni nsita ya kukolonganika viseekwa. Nupya mukaatwalilila kukolonganika iviseekwa mpaka kufika ni nsita ya kukomela. Mukaalya mwikuta nu kwikala mu mpanga inu mutende.

⁶ “Nkalenga kuti mu mpanga inu muye mutende, nupya mukaalala utulo kwaula koopa nanti umwi. Indi nu kuzinga ivilyanyi vyamu mpanga inu. Nupya mu mpanga inu musiiya inkondo.

⁷ Mukaacimvya anisi inu.

⁸ Antu yasano a munomuli yali nu kukwata maka ya kucimvya antu umwanda onga. Nupya antu umwanda onga yali nu kukwata amaka yakucimvya antu mazimbi ikumi.

⁹ Nkaamupolelela nu kulenga kuti muvyale ana avule cuze. Nkaasunga cipangano cane cino nacisile kunomuli.

¹⁰ Uzombozi winu ukaaya uvule cuze cakuti mukaakwata ivyakulya mwaka onsi. Lelo nalyo kwene mukaasumba sile kuulu uwamu nkoma zinu kuti musyale ncende ya vyakulya vicice.

¹¹ Nkaiikala namwe mwi Taalu lyane lya Ukongano, nupya ntalatala mufutatile.

¹² Nkaaya namwe. Nene Leza winu namwe mwemwe antu yane.

¹³ Nene indi Yawe Leza winu wino wamufumizye mu mpanga ya Eguputo, pakuti nupya mutaya azya. Nalenzile kuti muzule ikoli lino mwazwite nu kuleka kuti mwapita mutongomwile insingo.”

Uvunuko wa pamulandu wa kuntayela

¹⁴ Yawe avwanga ati, “Ndi mutakuyela malamulo yane, ndalenga kuti muvunukwe.

¹⁵ Ndi mwakana ukuyela amasunde na malamulo yane, nu kutama icipangano cino nacisile kunomuli,

¹⁶ ndalenga kuti muvunukwe. Nkaalenga kuti uzanzo upone panomuli ni ndwala zyaula kupoziwa, ni ndwala zyakulenga kuti mupafule nga nu kulenga kuti umi winu ucepe. Mukaalima nu kukomela imbezu zinu. Lelo musizombola nanti cimwi, pamulandu wakuti anisi inu yakaamucimvya nu kulya ivyakulya vinu.

¹⁷ Nkaamufutatila pakuti anisi inu yamucimvye. Nupya yano amupata yakaamuteeka. Muli nu kuya ni ntete cakuti mukaautuka nalino kusi umwi akumuzinganya.

¹⁸ “Nanti pacisila cakwe vii vyonsi, ndi mutakunjela, ndungilizya uvunuko winu maila cinimbali pamulandu wa kuntayela kwinu.

¹⁹ Ndonona vilumba vya kuitumvya kwinu. Kutalaya imvula, ni mpanga inu ilaya iyumalale. Nupya musili winu ulaya ukome wakwe cilwala.

²⁰ Kuombesya kwinu konsi kutalamutumbwila nanti cimwi, pamulandu wakuti impanga inu italamezya ivilimwa nga ni miti nayo italaseeka viseekwa.

²¹ “Ndi mwatwalilila kunkana nupya mwakana ukunjela, ndungilizya nupya uvunuko winu maila cinimbali.

²² Indi nukulenga ivilyanyi vikali kwiza pakasi kinu. Lyene ivilyanyi vivyo vilume ana inu nga vyonone ni viteekwa vinu, nu kumusya impendwa inono sile, cakuti miseo isyale sile.

²³ “Ndi pacisila ca kuvunukwa kuu mucili mukukana kuvwa kunondi, mwatwalilila ukunsula,

²⁴ Lyene indi nu kwalukila panomuli nu kumuvunuka cuze, maila cinimbali ukuluta pa kuvunuka kwankolelo.

²⁵ Ndalenga inkondo ukuya panomuli pa kumuvunuka pamulandu wa kutama upangano witu. Nupya ndi mwakongana mu misumba inu ku kuzina, indi nu kulenga indwala izisipoziwa kupona munomuli. Lyene muli nu kupatikiziwa ukucimba ku anisi inu.

²⁶ Ndalenga kuti cipowe cipone panomuli, cakuti anaci ikumi yalapanga imikate muli uvuni wenga sile pa usu onsi uno yakweti. Nupya yalamwankanya imikate inono, cakuti lino mwalya yonsi, kusi kwikuta.

²⁷ “Ndi pacisila cakwe cii mucili mukutwalilila ukunsula nu kukana ukunjela,

²⁸ lyene mu ukali wane ndamwalukila nu kumuvunuka cuze maila cinimbali ukuluta kuvunuka kwankolelo.

²⁹ Icipowe mu mpanga inu cilakula cuze cakuti mulaalya ana inu.

³⁰ Ndonona incende zinu zino mukapepela penepo pa twamba, nomoole nu tuvuwa twinu tuno mukaocelapo ubani. Ndasumbila ivyala vinu pa tuluwi twinu twaula umi. Nupya ndapatana namwe. Mu ukali wane

³¹ ndalenga imisumba inu ukuya matongwa, nu konona ivifulo vinu vya kupepelapo, nga ntalazumilizya amawila inu amununko usuma.

³² Ndonona impanga inu yonsi pyu cakuti anisi inu yano yalikalamo cilayapezya amano pamulandu wa ononyi.

³³ Ndalenga inkondo ukuya panomuli kuti musalangane mu mpanga zya inamasi. Mpanga inu ilasyala iyaulamo antu, nupya imisumba inu ilasyala matongwa.

³⁴ Lyene impanga ilaipakizya imyaka ya upuzo lino mu mpanga iyo musi antu, Mwemo ale mukwikala mu mpanga ya anisi inu. Mu nsita kwene iyo impanga ilikala sile, ale ikuipakizya imyaka ya upuzo lino mwemo muli mu mpanga zya anisi inu.

³⁵ Insita yonsi iyo ino mu mpanga mutalaya antu, impanga ilapuza kupuza kuno itatazile ipuze pa myaka yonsi ino mwemo mwikalangamo.

³⁶ “Ndalenga mwemuno mulaya mukikale mu mpanga zya anisi inu ukuya ni ntete cakuti ndi muvwa muza uulula inswaswa cilamulenga kuti muutuke. Mulautuka kwati yakumuzinga mu nkondo. Nupya mulapona pansi lino pasi mwanisi pipi na panomuli.

³⁷ Mulapumana mweisikulu lino pasi nanti umwi akumuzinganya. Nupya mutalaya na maka ya kulwisya anisi inu.

³⁸ Mwensi pyu mulafwa nu kuzikwa mu mpanga zya anisi inu.

³⁹ Na mwe yanono mwemuno mulasyala mu mpanga zya anisi inu mulalowela mumo kwene pamulandu wa maifyo inu na maifyo ya vikolwe vinu.

⁴⁰ “Lelo amu mupanda winu yalailongwela maifyo yao na maifyo ya vikolwe vyao vino vyankanyile nu kunsangukila,

⁴¹ nupya vino ivyalenzile kuti imvyalukile nu kuvisalanganya mu mpanga zya anisi yaviko. Ku mpelelekezyo, lino amu mupanda winu yalaicefya nu kulipila imilandu ya pa maifyo yao na pali ucisanguka wao,

⁴² ndafikilizya cipangano cane cino nacisile kuli Yakobo, Isaki, na Abulaamu. Nupya ntalilila vino nalavile ukupeela impanga kunomuli.

⁴³ Lelo antu yatale yafume mu mpanga yao iyo pakuti itale isyale iyailyokezya iyeneco, imyaka ya upuzo. Nupya antu yalinzile ukuzumila kuvunukwa pamulandu wa kukana malamulo na masunde yane.

⁴⁴ Lelo nanti cingaya vivyo, lino antu yalya yacili mu mpanga zya anisi yao ntalayatazyela nanti kuyonona yonsi nu kutama cipangano cane cino nacisile kunoyali. Pano Nene indi Yawe Leza wao.

⁴⁵ Ndafikilizya cipangano cane cino nacisile ku vikolwe vyao, lino nalanzile imitundu yonsi maka yane pa kufumya antu yane mu mpanga ya Eguputo, pakuti Ne Yawe ningaya Leza wao.”

⁴⁶ Yaa yonsi, ali malamulo yano Yawe wisile pakasi kakwe na ina Izlaeli pa Mwamba wa Sinai kupitila muli Mose.