2 Samueli 6 - Amazwi Yakwe Leza 2013

Mbokosi ya Upangano yaletwa ku Yelusalemu

¹ Davidi nupya kwene aama nu kukonganika aonsi ampomvu amazimbi amakumi yatatu asolwilwe ukufuma mu ina Izlaeli.

² Wene pamwi na antu yakwe yonsi iyatenuka ukufuma ku Baali waku Yuda ku kusenda Mbokosi ya Upangano yakwe Leza, ino ikaamilwa ukwi zina lyakwe Yawe Wamaka yonsi, wino ali apakasi kakwe yakelubi yano ali pa Mbokosi kwene iyo.

³ Iyasamula Mbokosi ya Upangano yakwe Leza umu ng'anda yakwe Abinadabu ino yali pa kalundu nga iyaikwezya mwi celeta lipya. Uza na Aiyo, ana aonsi yakwe Abinadabu, ala yakutungulula icikocikala cipya.

⁴ Iyacitungulula ala iyakwezyapo ni Mbokosi ya Upangano yakwe Leza, nga Aiyo nawe ala akupita pa nkolelo ya cikocikala.

⁵ Davidi nawe pali pamwi na ina Izlaeli yonsi ala yakuzevya apapezile amaka yao yonsi kuti yacindike Yawe. Ala yakulizya yababatoni, na yabanjo, nu tungoma, ni minsokwe, ni viwaya.

⁶ Lyene lino yafika pa lwano lwa kupuulila lwakwe Nakoni, yamasaye iyapumika, nga Uza nawe pali pakulemelela Mbokosi ya Upangano yakwe Leza.

⁷ Lilyo kwene Yawe asokela Uza pamulandu wakuti wene atapiile umucinzi kunoli. Icaleka amukoma, nga Uza afwa papa kwene umu mbali ya Mbokosi ya Upangano yakwe Leza.

⁸ Lyene Davidi nawe auvwa icipyu pamulandu wakuti Yawe wasokela Uza nu kumukoma. Nga ukufuma lili kwene incende ilya ikaamwa ukuti Pelezi Uza.

⁹ Davidi auvwa intete izyapali Yawe umu wanda ulya nga avwanga ati, “Uzye ningasenda uli Mbokosi ya Upangano yakwe Yawe?”

¹⁰ Wene welenginye ukuntasenda Mbokosi ya Upangano yakwe Yawe ku Yelusalemu. Nga lelo apaluka nu kuitwala ku ng'anda yakwe Obedi Edomu umukaya uwamu musumba wa Gati.

¹¹ Mbokosi ya Upangano yakwe Yawe yatenzi kuku imyezi itatu, nga Yawe apolelela Obedi Edomu na amu ng'anda yakwe yonsi.

¹² Lyene lino umwene Davidi uvwa ukuti Yawe watapolelela Obedi Edomu na amu ng'anda yakwe pamulandu wakusunga Mbokosi ya Upangano yakwe Leza, akatuka aya aifumya ku ng'anda yakwe Obedi Edomu nga aitwala ku Yelusalemu ala akuzevya wakwe cimwi.

¹³ Lino asenzile Mbokosi ya Upangano yakwe Yawe yatampula sile intampulo mutanda, Davidi ayanena ukuti yatale yimilile apa nsita ino wene akupeela impolelwa, cipambasi nu mwana wa ng'ombe umwine.

¹⁴ Davidi wazwite cakuzwala ca efodi icapangilwa ku nsalu itelepelele umu musana, nga acina apapezile amazya yakwe yonsi kuti acindike Yawe.

¹⁵ Acino wene pali pamwi na ina Izlaeli yonsi iyasenda Mbokosi ya Upangano yakwe Yawe iyatumbela ukuya ku Yelusalemu ala yakupunda ni nsansa iyalizya ni ntandala.

¹⁶ Lino Mbokosi ya Upangano yakwe Yawe ikwingiziwa mu Musumba wakwe Davidi, Mikala umwana umwanaci wakwe Saulo ale akusungamila pa nzota. Lyene alola kuno umwene Davidi akucina nu kutoloka pa manso yakwe Yawe. Lyene amusuula umu mwenzo wakwe.

¹⁷ Alino iyasuka yingizya Mbokosi ya Upangano yakwe Yawe, nga iyayika umu ncende yakweyo umukasi ki taalu lino Davidi wimike. Alino Davidi apeela impolelwa zya mawila yakoca ni zyautandano pa manso yakwe Yawe.

¹⁸ Pacisila lino wamala ukupeela amawila yakoca na autandano, apolelela antu umwi zina lyakwe Yawe Wamaka yonsi

¹⁹ Lyene aankanya antu yonsi ivyakulya. Cila muntu wensi umu Izlaeli amupeela umukate pamwi ni cifwa ca nyama iyoce ukwika penepo na kacikamangwa ka viseekwa vya matingi.

²⁰ Lino Davidi wawelulwike ukwakwe ku kupolelela amu mupanda wakwe, Mikala umwana umwanaci wakwe Saulo aiza ku kumukomenkanya nga amunena ati, “Iye mwe vino umwene waku Izlaeli wali wailanga ilelo! Umwene wali wailanga wa muntu umuwelewele pa manso ya anaci aomvi akaombela aomvi yakwe!”

²¹ Davidi anena Mikala ati, “Nemo nacinanga kuti incindike Yawe, uwasiile so na aluko lwakwe lonsi, lelo ansolola kuti inje intunguluzi ya antu yakwe aina Izlaeli. Nga nani namatwalilila ukucina kuti incindike Yawe,

²² nupya namaipupanya nu kuluta. Wemo ungelenganya ukuti nemo insi cimwi, lelo anaci yaya yamancindikanga wakwe cimwi.”

²³ Mikala, umwana umwanaci wakwe Saulo wasusile wafwa sile ukwaula ku kwatapo umwana.