2 Samueli 23 - Amazwi Yakwe Leza 2013

Amazwi akusyalikizya yakwe Davidi

¹ Yaa ali mazwi akusyalikizya yakwe Davidi: Luu ululi lwimbo lwakwe Davidi, umwana wakwe Yese, amazwi ya muntu wino Leza wakwezya apapela, wino Leza wakwe Yakobo wasolola, kasika wa nyimbo zisuma zyakwe Izlaeli.

² Umupasi wakwe Yawe wavwangila munondi, nu lulimi lwane ilulanda amazwi yakwe.

³ Leza wa ina Izlaeli avwanga, Ciliwe camu Izlaeli icinena citi, “Wino akaateka antu yakwe mu ulungami, wino akateeka umu coopo cakwe Leza,

⁴ wene akoline wa micalalazi yi lanzi akatondo lino kusi amakumbi, ilanzi lino likalenga isote ukukula ningo, pacisila lino imvula yatonya.”

⁵ Avino Leza wane alapolelela amu mupanda wane, pamulandu wakuti wene watacita upangano uwa manda pe nani uno utalavunwa ulayo uno utalasenulwa. Icili cintu cino nkulonda. Cico cilaya ucimvyo wane, icumi kwene Leza alafikilizya cico.

⁶ Lelo antu asyacindika Leza yakoline ni myunga ino yasumbwa. Kusi umwi angezya ukuivuta ku minwe.

⁷ Wino wensi akwipula imyunga alinzile ukuomvya iciombelo ca cela nanti umusako wi sumo. Yene ilociwa mpaka isyale itwi.

Asilika alumbuke yakwe Davidi

⁸ Yaa ali mazina yakwe yacuza yakwe Davidi aonsi ya maka. Uwankolelo a Yosyebu Basyebeti, umwina Takemoni, uwali ali mukulu wakwe yotatu. Wene waomvizye isumo lyakwe apakulwisya antu imyanda cinani, yano wakomile yonsi pyu umu ulwi onga

⁹ Wakwe ciili uwa maka a Eleaza umwana umonsi wakwe Dodo, uwamu luko lwakwe Aoi. Uwanda umwi wene pamwi na Davidi iyaama aina Filisti ku ulwi, yao akongine ku Pasi Damimu.

¹⁰ Lelo wene azyansya nga alwisya aina Filisti mpaka ikasa lyakwe ilitonta nga ilikoma ilifumbatisya ulupanga cakuti lutangapona. Uwanda uwa Yawe acimvya apakalamba. Ivita pali pakuswilila ukwali Eleaza, lelo ku kutoola ivyanzo vyonsi pyu ku afwe.

¹¹ Wakwe citatu uwa maka a Syama umwana wakwe Agee, uwaku Halali. Aina Filisti iyakongana ku Leyi, ukwali icalo cakwe mutumpe. Ivita vya ina Izlaeli ivyutuka aina Filisti,

¹² lelo Syama azyansya umu calo cici, acicingilila, nga akoma aina Filisti. Uwanda ulya Yawe acimvya apakalamba.

¹³ Mu manda ya uzombozi, antu asololwe amakumi yatatu iyatentemukila ukwali Davidi ukwi cele lwaku Adulamu, lino impuka ya ina Filisti yacisile insakwe umu Cifoloma ca Lefaimu.

¹⁴ Pa nsita ilya Davidi wali mu musumba wi linga, nga na kamba ka ina Filisti kali ku Betelemu.

¹⁵ Davidi auvwa ulusala lwa manzi nga avwanga ati, “Iye, si cange cizipe umwi andetele amanzi akumwa ukufuma mu cifula icaya lwapa mpongolo ya musumba wa Betelemu!”

¹⁶ Acino antu yalya yatatu amaka iyafuma mu milongo ya ina Filisti, iyaya iyasemba amanzi umu cifula cici icaya lwapa mpongolo ya musumba wa Betelemu nga iyatwalila Davidi. Lelo wene akana ukumwa. Apongolwela amanzi yaya inkolelo yakwe Yawe.

¹⁷ Avwanga ati, “Cipelele ukutali na kunondi, we Yawe, kuti nemo ncite icintu icamusango uu! Uzye citakoline nu kumwa uwazi wa antu yano iyapusuka kwempe lino yali yaya ku kusemba amanzi kwene yaa?” Acino Davidi atamwile amanzi yaya. Vi ivyacisile antu yaya yatatu amaka.

¹⁸ Abisyai umwina wakwe Yoabu, umwana umonsi wakwe Zeluya wali umukalamba wa vita makumi yatatu. Wene wakomile antu imyanda itatu ukwi sumo lyakwe pa ulwi onga. Lyene alumbuka wa antu yalya yatatu.

¹⁹ Wene walumbwike wakwe cimwi pakasi ka antu yalya makumi yatatu. Wizile aya musika wao mukalamba uwa vita, nga atapendilwe ukuyana na yaya yatatu.

²⁰ Benaya umwana umonsi wakwe Yeoyada wali icita iciposye, nupya wafumile ku Kabizeele. Wene wacisile ivintu vya maka. Wakomile antu yaili, inkonkotela zya vita vyaku Moabu. Na pa wanda umwi lino kwatonyanga ivintu vimwi ivitiswe wa mula, wene waile aingila umu ciwina cali pipi ni cifula ca manzi, akoma cisama.

²¹ Wakomile nu mwina Eguputo, uwali ilamba ilyali ni sumo mu minwe. Lelo wene ala ali sile ni ntuwa mu minwe. Benaya aya amulwisya amupokolola ni sumo, alino amukomela kweneko.

²² Vii ivili vintu vyamaka vino Benaya umwana umonsi wakwe Yeoyada wacisile, alumbuka pa antu amakumi yatatu yalya amaka.

²³ Wene alumbuka sana pa vita vivi amakumi yatatu vyamaka. Lelo atayine na yalya yatatu. Davidi amulasika uwangalizi pali yakalinda yakwe.

²⁴ Asaeli umwina wakwe Yoabu wali awenga uwamu vita vivi amakumi yatatu: Elianani umwana umonsi wakwe Dodo, uwaku Betelemu.

²⁵ Na Syama umwina Halodi, na Elika umwina Halodi.

²⁶ Na Helezi umwina Paliti, na Ila umwana umonsi wakwe Ikesyi, waku Tekoa.

²⁷ Na Abiezeli uwaku Anatoti, na Mebunai uwaku Husya.

²⁸ Na Zalimoni umwina Aoi, na Maalai umwina Netofa.

²⁹ Na Heledi umwana umonsi wakwe Baana uwaku Netofa, na Itai umwana umonsi wakwe Libai uwaku Gibeya umu mpanga yakwe Benjamini.

³⁰ Na Benaya umwina Pilatoni, na Hidai uwaku Cifoloma caku Gaasyi.

³¹ Na Abi Aliboni umwina Alibati, na Azimaveti umwina Baliumi.

³² Na Elyaba umwina Syaaliboni, na ana aonsi yakwe Yasyeni, na Yonatani

³³ umwana umonsi wakwe Syama umwina Halali, na Aiyamu umwana umonsi wakwe Syalali umwina Halali.

³⁴ Na Elifeleti umwana umonsi wakwe Aasibai umwina Maaka, na Elyamu umwana umonsi wakwe Aitofeli umwina Gilo.

³⁵ Na Hezilo umwina Kalimeli, na Paalai umwina Alibi.

³⁶ Na Igali umwana umonsi wakwe Natani uwaku Zoba, Bani umwina Gadi.

³⁷ Na Zeleki umwina Amoni, na Naalai umwina Beeloti, umusenda mpamba wakwe Yoabu umwana wakwe Zeluya.

³⁸ Na Ila uwaku Itili, na Galebu uwaku Itili.

³⁹ Na Uliya umwina Hiti. Yonsi pamwi yali amakumi yatatu na cinimbali.