2 Samueli 22 - Amazwi Yakwe Leza 2013

Ulwimbo lwa ucimvyo lwakwe Davidi

¹ Lino Yawe watuula Davidi kuli Saulo na anisi yakwe yauze, Davidi aimbila Yawe ulwimbo luu:

² Yawe awino akancingilila, wene ali linga lyane ilyamaka.

³ Leza wane ali ucingililo wane, nga kusi icinganzanza lino indi nawe. Wene akancingilila wa cisyangu. Wene akampokolola nu kunsunga ningo. Wene akatuula wane, akancingilila nu kuntuula ku antu yalwete.

⁴ Nkapepa kuli Yawe, nga nawe akantuula ku anisi yane. Lumbanyini Yawe!

⁵ Imfwa yanzingulwike konsi wa maimbi, uwononesi iumpuma wa maimbi yamaka.

⁶ Imfwa yanunsile panondi, nga ilindi iliya wa citeyo kunondi.

⁷ Umu ntazi zyane napefile kuli Yawe. Napefile kuli Leza wane kuti angazwe. Umu ng'anda yakwe ikulu wene anguvwa, atezya nu ku nkuta yane kuti angazwe.

⁸ Lyene insi izakaza nu kusunkana. Umufula wa lwelele iutenta, nu kuzungana pamulandu wakuti Leza wasosile!

⁹ Icunsi icifutumuka ukufuma mu mpuno zyakwe, icimbilimbili ca ononyi na makala ati yaloka ivifumfumuka ukufuma mu mulomo wakwe.

¹⁰ Wene alepula iyulu pakasi nga aika pansi, ni kumbi ilitifi ale lili pa ngazo zyakwe.

¹¹ Wene akwela pali yakelubi nga apupuka umu lwilo. Wene apita ale akwezile pa mapa yacimuza.

¹² Umwisikulu aivimba ni mfinzi, amakumbi atifi amvula ale yamuzingulwike.

¹³ Amakala yatiyaloka iyatumuka ukufuma ku nkuwa ikumyantula ku nkolelo yakwe.

¹⁴ Lyene Yawe avwanga wa kupangalansya ukufuma umwiyulu, nga ni zwi lyakwe Leza Wamaka yonsi ilyuvwika.

¹⁵ Wene afiika imivwi yakwe mpaka asalanganya anisi yakwe, ku kumyansya kwa nkuwa wene ayazinga mpaka iyutuka.

¹⁶ Apansi pali yemba ipaloleka, nu mufula wa nsi wasime pa nsita ino Yawe wakalipila anisi yakwe nu kuyazotokela umu ukali.

¹⁷ Ukufuma apapela Yawe atambalika ikasa lyakwe nga andema pano pansi. Wene amfumya pa maziya.

¹⁸ Antuula ku anisi yane, na kuli yonsi yano yampata, yao ancizizye amaka.

¹⁹ Lino nali umu ntazi, yene yanzanzile, lelo Yawe wancingilile.

²⁰ Wene wangazwilizye amfuntusya ku uzanzo. Wantuuzile pano wazangile munondi.

²¹ Yawe akandambula pano nkacita ivisuma. Wene akampolelela pano nene wakaele.

²² Nkayela isunde lyakwe Yawe. Ntafutatila Leza wane.

²³ Nkawaka amasunde yakwe yonsi. Nkayela amalamulo yakwe.

²⁴ Wene amanyile ukuti nsi nu mulandu, nu kuti naisunga ku kwifya.

²⁵ Acino wene akandambula pamulandu wakuti nkacita ivisuma. Nupya amanyile ukuti nene wakaele.

²⁶ We Yawe wewe wacumi kuli yao acumi kunuli, nupya wewe musuma sana kuli yao afumaluke.

²⁷ Wewe wamuzilo ku aziliziwe, lelo ukafulula antu yaukakasi.

²⁸ Wemo ukatuula yao afuke, lelo ukapulumula antu yacilumba.

²⁹ We Yawe wewe luswepo lwane. Wemo ukamfumizya imfinzi.

³⁰ Ukampeela amaka akuzanza anisi yane, na maka akucimvya amalinga yao.

³¹ Si lolini vino ivicitwa vyakwe Leza wii vyafumaluka, na vino amazwi yakwe akutailwa! Wene akoline wa cisyangu, kuli yao yonsi akalonda ukucingililwa na aliwe.

³² Yawe wenga sile ali Leza. Leza wenga sile ali linga litu.

³³ Leza wi cili cakuzinamo icane icamaka. Wene akalalika ivipando vyonsi umu nzila yane.

³⁴ Wene akampa ulwilo wakwe mpombo. Akansunga ningo umu myamba.

³⁵ Wene akansambilizya ukulwa ulwi pakuti ningaomvya ulapwa uno watiuzumbwa ningo.

³⁶ We Yawe ukancingilila nu kuntuula. Nacindama pano ukangazwa.

³⁷ Wemo wansunga kuti yatandema, nupya ntatala napona.

³⁸ Nkacocovya anisi yane nu kuyacimvya. Nsitala inta suka sile injakome.

³⁹ Nkayasyunola, nga yatangakatuka nupya. Yene yakalambalala pansi ala natinjacimvya.

⁴⁰ Wemo ukampeela amaka akulwa ulwi, nga umpeela nu ucimvyo pa anisi yane.

⁴¹ Wemo ukalenga kuti anisi yane yangutuke. Nkakoma yao ampata.

⁴² Yene yakalonda ukwazwiliziwa, lelo kusi umwi akayazwa. Yakapepa kuli Leza lelo wene asiyasuka.

⁴³ Nemo nkayavungola, nga iyaya wa lukungu. Nemo nkayalyatola wa ntipa zyamu miseo.

⁴⁴ Wemo wantuuzile ku antu yacisanguka nu kulenga kuti intwalilile ukuteeka inko, antu yano utamanyile ndakai nkayateeka.

⁴⁵ Ainamasi yakamfukamila. Lino yanguvwa iyayela.

⁴⁶ Yene yakatovoka. Yene yakaiza yala yakuzakaza ku ntete ukufuma ku misumba yao iyamalinga.

⁴⁷ Yawe uwaumi! Lumbanyini wiyo akampokolola! Landini ukulu wakwe Leza wamaka wino akantuula!

⁴⁸ Wene akampeela ucimvyo pa anisi yane nu kucimvya inko zino nkateeka

⁴⁹ nu kuntuula ku anisi yane. We Yawe ukampeela ucimvyo pa anisi yane nu kuncingilila ku antu yalwete.

⁵⁰ Icaleka nkakulumbanya umu antu amu nko. Nkakulumbanya umu nyimbo.

⁵¹ Leza akapeela ukucimvya ukukulu ku mwene wino wasonta. Wene akalanga ukutemwa ukwa pe. Kuli Davidi na amu mupanda wakwe amanda pe.