2 Samueli 2 - Amazwi Yakwe Leza 2013

Davidi yamulasika pa cilimba ca wene waku Yuda

¹ Pacisila ca nsita imwi, Davidi auzya Yawe ati, “Uzye nje inkateeke umusumba onga pa misumba ya mpanga yakwe Yuda?” Yawe nawe aasuka ati, “Ee, yanga.” Davidi nawe auzya ati, “Uzye ungaya umusumba cii?” Yawe nawe aasuka ati, “Umusumba wa Hebuloni.”

² Acino Davidi aya ku Hebuloni. Asenda na aci yakwe yoili kwene, Ainoamu uwafumile ku Yezileele, na Abigelo uwatwitwe ku muyazi Nabali, nupya uwafumile ku Kalimeli.

³ Asenda na antu yakwe aonsi kumwi na akazi kao, nga yikala mu misumba iyazingulwike Hebuloni.

⁴ Lyene aonsi amu Yuda yiiza ku Hebuloni nga iyapongolwela Davidi mafuta, iyamwika pa cilimba ca wene wakwe Yuda. Lino Davidi uvwa ukuti aikazi amu Yabesyi mu musumba wa Gileadi yazika Saulo,

⁵ atuma inkombe zimwi ku antu yayo aku Yabesyi Gileadi na mazwi akuti, “Si Yawe amupolelele pa kulanga icuvwilo ku mwene winu pa kumuzika.

⁶ Si Yawe ndakai aye uwa luse nu wakutailwa kunuli. Nani kwene namacitanga ivisuma, pamulandu wakuti watucita icintu cii.

⁷ Kwatini amaka nu kuzyansya! Saulo umwene winu watafwa, nga antu yakwe Yuda yatiyampaka amafuta akunjika pa cilimba ca wene kuti inje umwene wao.”

Isyibosyeti walasikwa uwene wa Izlaeli

⁸ Pa nsita kwene ilya, Abineli umwana umonsi wakwe Neli, uwali musika mukalamba uwa vita vyakwe Saulo, asenda Isyibosyeti umwana wakwe Saulo, nga amuleta ku Maanaimu.

⁹ Lyene amulasika uwene nga aya umwene wa Gileadi, Asyuli na Yezileele, nga nu wa mpanga yonsi yakwe Efulemu na yakwe Benjamini ni ya ina Izlaeli yonsi.

¹⁰ Isyibosyeti umwana umonsi wakwe Saulo wali ni myaka amakumi yani lino yamulasike pa wene wa Izlaeli, nga wateesile imyaka iili. Lelo nanti cali vivyo amu mutundu wakwe Yuda yalondela Davidi.

¹¹ Utali wa nsita ino Davidi wateesile umutundu wakwe Yuda umu Hebuloni cali imyaka cinimbali ni myezi mutanda.

Aina Izlaeli yalwa na ina Yuda

¹² Abineli umwana umonsi wakwe Neli, pali pamwi na aomvi yakwe Isyibosyeti umwana umonsi wakwe Saulo, iyafuma ku Maanaimu iyaya ku musumba wa Gibyoni.

¹³ Yoabu wino nyina wali a Zeluya, pamwi na aomvi yauze yakwe Davidi iyayakomenkanya pa ciziya caku Gibyoni. Ali vino lyene yonsi iyikala pansi, iumba lyonga kuno mbalama ni umba lyuze ku mbalama yuze.

¹⁴ Abineli pali pakunena Yoabu ati, “Leka tusolole aonsi yamwi ukufuma muli cila umba kuti yalwe wa vita.” Yoabu nawe amuzumilizya ati, “Icisuma.”

¹⁵ Acino aonsi ikumi na yaili ukufuma mu mutundu wakwe Isyibosyeti, umwana umonsi wakwe Saulo, nu mu mutundu wakwe Benjamini, iyalwisya aonsi ikumi na yaili ukufuma mu antu yakwe Davidi.

¹⁶ Cila muntu avuta umutwe wa muntu wino yamalwa nawe, nga amutota ni sumo lwa mumbazo, cakuti yonsi kwene amakumi yaili na yani iyapona pansi, iyafwa pali pamwi. Acino incende ilya mu Gibyoni ikaamwa ukuti Helekati Hazulimu.

¹⁷ Lyene kwakatwike inkondo ikakate. Abineli na ina Izlaeli iyayacimvya ku antu yakwe Davidi.

¹⁸ Ana yatatu aonsi yakwe Zeluya yaa akuno yali: Yoabu, Abisyai, na Asaeli. Asaeli uwakweti ulwilo wakwe mpombo

¹⁹ atandika kucocovya Abineli. Amulondela pacisila ukwaula kupumba inzila.

²⁰ Lino Abineli wapepela icisila, avwanga ati, “Uzye awewe Asaeli?” Asaeli nawe aasuka ati, “Ee, anene kwene.”

²¹ Abineli amunena ati, “Ta ukunzinganya! Simula londelela sile wenga pa asilika, umupoke vino akweti.” Lelo Asaeli atwalilila sile ukumuzinganya.

²² Nupya kwene Abineli anena Asaeli ati, “Ta ukunzinganya! Uzye pacani cino ukumpatikizya ku kukoma? Uzye umu musango cii muno ningaya nkanenele umunyonko Yoabu?”

²³ Lelo nalyo kwene Asaeli atatiile ukumuzinganya. Icaleka Abineli amutota icundansizi umunda ni sumo lyakwe cakuti ilipuzinkanya ilifumila kunsizi. Asaeli apona pansi afwa nu kufwa. Nupya umuntu wensi uwiza wafika pa ncende pano wafwilile ata ukupita, aimilila papo kwene.

²⁴ Lelo Yoabu na Abisyai iyatandika ukuzinganya Abineli. Lino ilanzi lyawa iyafika ku mwamba waku Ama, uwaya lwaku ufumondaka wakwe Giya, umu museo uwalungama ku Lwanga lwa Gibyoni.

²⁵ Aonsi aina Benjamini iyakongana ukuzinguluka Abineli. Iyaya yimilila pa mwamba papela.

²⁶ Abineli nawe pali pakulaizya Yoabu ati, “Uzye tutwalilile ukulwa vikwene? Uzye wemo utange ulole ukuti apakusyalikizya cili nu kwipisya sana? Ala mwine, sweswe ikalansi yauzo! Alilaci fwandi lino wemo umalesya antu yako ukuta ukutuzinganya?”

²⁷ Yoabu aasuka ati, “Nalaya umwi zina lyakwe Leza wa umi ukuti kwene ukana sile ukulanda vino walanda, antu yane yange yatwalilile ukumuzinganya, mpaka sile akatondo.”

²⁸ Lyene Yoabu alizya intandala nga ivita vyonsi ivimilila, ivita ukuzinganya aina Izlaeli, nga nu ulwi iusila.

²⁹ Usiku ulya onsi Abineli na antu yakwe iyasalala mu Alaba, iyalamba Yodani, nga iyatwalilila ukupita akatondo kaka konsi mpaka iyafika ku Maanaimu.

³⁰ Lino Yoabu wata ukuyazinganya, akonganika antu yakwe yonsi nga azana ukuti antu ikumi na fundimbali yakwe Davidi yasipo ukwikapo na Asaeli kwene.

³¹ Antu yakwe Davidi walanga yatiyakoma antu yakwe Abineli, aina Benjamini yano yali imyanda itatu na makumi mutanda

³² Yoabu na antu yakwe iyatola icala cakwe Asaeli iyaya iyacizika mwi lindi lya aluko lwakwe ku Betelemu. Lyene iyapita usiku onsi suka iyafika ku Hebuloni pa macaca.