2 Samueli 14 - Amazwi Yakwe Leza 2013

Yoabu wateyanya ukupokelela Abusalomu

¹ Yoabu umwana wakwe Zeluya wamanyile ukuti umwene Davidi akuluuka sana Abusalomu.

² Acino Yoabu atuma umuntu umwi ku Tekoa uwakuya senda umwanaci umwi uwamano. Lino umwanaci wilya wafika Yoabu amunena ati, “Nkulonda kuti uicite wa muntu ali ni ndosya. Uzwale nu mupango ku mutwe, utasakula ni nyele. Uloleke kwati aumwi uwapokelile mpiti indosya.

³ Lyene uye ku mwene ukamunene vino namakunena.” Lyene Yoabu amunena ivyakunena umwene.

⁴ Umwanaci wilya waku Tekoa pali pakuya ku mwene, aya afukama afupime mucinzi mucinzi, nga avwanga ati, “Mwene, ule ungazwe!”

⁵ Umwene nawe amuuzya ati, “Nkwazwe cani?” Nawe amunena ati, “Musambazi, nene mukamfwilwa. Uwane wafwa.

⁶ Nakweti ana aonsi yaili. Uwanda umwi yalemanile pa vyalo, papo apatali umwi uwa kuyataasya. Alino wenga auma umuze amukoma.

⁷ Musambazi, ali cino fwandi akazi kakwe yonsi yatiyankatukila yati, ‘Suka sile utupeele umwana wiya uwakomile umwana muze uleke nawe tumukome tulandule pali vino wakoma umwina.’ Lyene mwene ndi cakuti yacita cico, nemo ale namasyala sile ukwaula umwana. Lyene ale casila kutalasyala nanti umwi uwakuti yace yaiusizyako uwane pano nsi.”

⁸ Umwene anena umwanaci wilya ati, “Pitanga ukwako, nga nani indi nu kuputula umulandu wako.”

⁹ Umwanaci wilya waku Tekoa anena umwene ati, “We musambazi umwene wane, consi cino ungacita nene na akazi kane tulakwatilapo umulandu. Wemo na akazi kako mutalapeelwa umulandu.”

¹⁰ Umwene nawe avwanga ati, “Ndi umwi wakoofya, umulete kunondi. Wene atalatala aswilizye nupya ku kupamvya.”

¹¹ Umwanaci wilya avwanga ati, “Musambazi, lenga kuli Yawe Leza wako, kuti ataleka uwakazi acite cimwi iciipisye nu kukoma umwana wane.” Davidi nawe amunena ati, “Nalapa umwi zina lyakwe Yawe waumi ukuti kusi umuntu nanti wenga alamukumyako nanti akantengezya.”

¹² Umwanaci wilya nawe amunena ati, “Musambazi, leka nupya inswilizye ukulanda izwi lyonga kunuli.” Umwene nawe amunena ati, “Ale vwanga.”

¹³ Umwanaci wilya avwanga ati, “Uzye icani cino wacitile iciponge icamusango ndi uu ku antu yakwe Leza, icakukana wezya umuntu wako kuno wapuukila? Wewe kwene wemwisikulu waipela umulandu pa mazwi yano wataka.

¹⁴ Swensi pano sweswe ina kufwa. Twaya wa manzi yano yitika pansi, atange yazyolwe. Lelo Leza asicita utazi wa katwe, wene angalonda inzila iya kuwezezyamo umuntu ukufuma kuno utukila.

¹⁵ “Musambazi, ala cino niza navwangila vii kuli wewe, pamulandu wakuti antu yatiyalenga kuti nuvwe intete. Ne muomvi wako nalinelenganya nati, ‘Kamvwange ku mwene. Limwi wene angancitila cino ne muomvi wakwe namamulenga.

¹⁶ Wene angangazwa nu kuntuula ku muntu ali wensi wino akulonda ku nkomela pamwi nu mwana wane umonsi pakuti tutace tukwate icaupyanyi cino Leza watupeela.’

¹⁷ “Nupya natinelenganya ukuti amazwi ya musambazi yangantekezya umwenzo, pano we musambazi uli wa mungeli wakwe Leza. Wamanya ivintu vyonsi nupya ungalekanya pakasi ka visuma ni nkota. Si Yawe Leza wako aye nawe.”

¹⁸ Lyene umwene anena umwanaci wilya ati, “Namakuuzya iuzyo lyonga nawe ungasuke icisinka sile.” Umwanaci wilya avwanga ati, “Musambazi, uzya.”

¹⁹ Umwene nawe auzya ati, “Uzye kwene ukunena ukuti asi a Yoabu wino mwaya nawe muli vyonsi vii?” Umwanaci wilya nawe aasuka ati, “Icumi kwene lino we mwene ucili nu umi, kusi umwi angakutumpoka. Endi, umuomvi wako Yoabu ali wino wanenyile ivyakucita nu kulanda.

²⁰ Nga lelo cino wacitile vyonsi vii, pakuti angalolola ivintu vyonsi muno vingacitikila pamulandu wakuti wemo wacenjela wa mungeli wakwe Leza. Wemo wamanya ivikacitika umu mpanga ii.”

²¹ Umwene anena Yoabu ati, “Natinelenganya ukucita vino ukulonda. Yanga ukatole Abusalomu umulete kuno.”

²² Yoabu pali pakupona pansi inkolelo ya mwene mucinzi mucinzi nga avwanga ati, “Si Leza akupolelele, we mwene. Ilelo umuomvi wako amanyile ukuti watazana ulongo pa manso yako, pamulandu wakuti watuncitila vino natinkulenga.”

²³ Lyene Yoabu akatuka aya ku Gesyuli aya awezya Abusalomu ku Yelusalemu.

²⁴ Lelo umwene avwanga ati, “Mutini aye ku ng'anda yakwe. Wene atalinzile ukwikala mwi sano. Nsikulonda alolekela ku cinso cane.” Acino Abusalomu aya ukwakwe kololo nga atalolekile ku cinso ca mwene.

Davidi yawikizyanya na Abusalomu nupya

²⁵ Kutali umuntu nanti wenga umu ina Izlaeli yonsi wino yangalingana na Abusalomu ku kuyemba. Wene atakweti akaulema nanti kamwi, ukutandikila sile ku mutwe wakwe mpaka na pa kakando.

²⁶ Lyonsi lino wapeelanga inyele zyakwe, ndi vino wacitanga cila mwaka, wene wazipelanga apakuzana ukuti zyanyoma. Nga ndi wazipima, azana ukuti zinyomile ukuluta pa makilogalamu yaili ukulingana ni cipimilo caku wene.

²⁷ Abusalomu wakweti ana aonsi yatatu nu mwanaci wenga. Izina lya mwana umwanaci a Tamala, nga wizile aya umwanaci umuyembe.

²⁸ Abusalomu watenzi imyaka iili mu Yelusalemu ukwaula ukulolana na Davidi.

²⁹ Lyene Abusalomu atuma uwakuya ama Yoabu pakuti amutume ku mwene, lelo Yoabu akana ukwiza kunoli. Acino watumile nupya iila lyakwe ciili, lelo wene wakanyile ukwiza.

³⁰ Lyene Abusalomu anena aomvi yakwe ati, “Mwe, silolini! Icalo cakwe Yoabu cipalamile ni calo cane. Caticikwata ni mbezu zyakwe baale. Pitini mukoce icalo cakwe.” Acino aomvi yakwe Abusalomu iyaya iyasonteka umoto mwenemo.

³¹ Lyene Yoabu aya ku ng'anda yakwe Abusalomu nga amutoka ati, “Uzye icani cino aomvi yako yatiyasonteka umoto mu calo cane?”

³² Abusalomu nawe aasuka ati, “Pamulandu wakuti utizile lino natumile uwa kwizakwama pakuti nkutume ku mwene ku kumuuzya uti, ‘Uzye pacani cino nemo nafumile ku Gesyuli nu kwiza kuno? Cange cizipe inikala kuku kwene.’” Abusalomu atwalilila ukuvwanga ati, “Acino lyene nkasi ukulolana nu mwene, nga ndi cakuti indi nu mulandu umwi, ale lyene cingazipa kuti ankome.”

³³ Acino Yoabu aya ku mwene Davidi nga amunena vino Abusalomu wavwanzile. Lyene umwene aama Abusalomu, nga nawe aingila, afukama pansi afupime. Umwene nawe amutonsola pa kumuzengela.