2 Samueli 1 - Amazwi Yakwe Leza 2013

Davidi uvwa imfwa yakwe Saulo

¹ Pacisila ca mfwa yakwe Saulo, ali lino Davidi wawelulwike ku kucimvya aina Amaleke nu kwiza ikala ku Zikilagi pa manda yaili.

² Pa wanda uwalenga yatatu ikwiza umuntu umwi ukufuma ku nkambi yakwe Saulo, ala azwite ivyakuzwala ivilepuke. Alino ku mutwe wakwe ala kuli swe ku lukungu. Lino wafika kuli Davidi apona pansi afukama nu kumukunkwila pa kulanga umucinzi.

³ Davidi amuuzya ati, “Uzye aukwi kuno wafuma?” Nawe amwaasuka ati, “Natimpuuka sile ku nsakwe zya ina Izlaeli.”

⁴ Davidi amuuzikisya ati, “Uzye ivyani ivyativicitika kuko? Ale ndondolwela?” Nawe alondolola ati, “Ivita vitu vyutwike inkondo. Aingi yaponanga sana nu kufwa. Saulo kumwi na Yonatani umwana wakwe nayo kwene yatiyafwa.”

⁵ Lyene Davidi auzya umulumendo wilya uwizile amunena impwelo ii, ati, “Nga wamanya uli ukuti Saulo na Yonatani yatiyafwa?”

⁶ Nawe amwaasuka ati, “Cali sile nsula ala indi pa Mwamba wa Giliboa nga ndola Saulo ala watasintilila isumo lyakwe. Lyene papo kwene ndola amaceleta yakwiza alino na antu akwezile pa mfwalasi yamulungime kuti yakamuvwangatile nu kumulema.”

⁷ Alino wizile asenukila kunondi nga lino wandola angama, nga nani imuzya inti, “Icani we musambazi?”

⁸ Anguzya ati, “Uzye wewe weni?” Nani imwasuka inti, “Nene mwina Amaleke.”

⁹ Lyene anena ati, “Iza wimilile pipi nani nga unkome! Ncili nkupefya, lelo natinciseka pipi ni mfwa.”

¹⁰ Fwandi nani ntali mukanyi, avili vino namukomile, namumalila, pano naweni ukuti insita ili yonsi angapona afwe nu kufwa. Lyene pali pakumuzula ingala ku mutwe ni koza ukwi kasa lyakwe. Avili vino fwandi nakuletela, we musambazi wane.

¹¹ Lyene Davidi na antu yonsi yano wali nayo iyalepola insalu zyao apakulanga ulanda.

¹² Iyacula sana nu kulosya, cakuti yatalile icakulya mpaka na manguzi sana, pamulandu wakwe Saulo na Yonatani ni vita vyakwe Yawe nga na ina Izlaeli yonsi yano yakomilwe.

¹³ Alino Davidi anena umulumendo wino wamuletile impwelo ati, “We! Uzye kuno wafuma aukwi?” Nawe amwaasuka ati, “Kwene nene mwana wa mwinamasi, umwina Amaleke. Lelo ukwikala kwene nkaikala umu mpanga yako kwene.”

¹⁴ Nupya Davidi aswilizya ukumuzya ati, “Uzye pacani cino utuvwile intete zya kukatusya ikasa lyako nu kukoma umusololwe wakwe Yawe?”

¹⁵ Lyene Davidi aama nu muntu wenga pa vita vyakwe nga amunena ati, “Mukome wii.” Nawe apali pakuzunzuka nu kumukoma, afwa nu kufwa.

¹⁶ Davidi avwanga nu kuvwanga ati, “Umulomo wako uwakulya. Wewe wemwisikulu watuilandila pa kanwa kako ukuti wakomile umusololwe wakwe Yawe.”

Impoma yakwe Davidi pa kulosya Saulo na Yonatani

¹⁷ Alino lyene Davidi watulwile impoma, atandika nu kulosya Saulo na Yonatani.

¹⁸ Apela ni lamulo kuti a Yuda yasambiliziwe ulwimbo lwa ndosya ndi muno calembelwa mu Lupapulo lwakwe Yasyali.

¹⁹ “Intunguluzi zyako we Izlaeli yazikomolela pa twamba twako! Iye mwe vino malumba yafwa!

²⁰ Cisi cakwezya ukucilanda mu musumba wakwe Gati nanti ukwalazya ilyasi mu museo wa Asyikeloni, pano limwi yamangu amu Filisti yangazanga, nga na ana anaci yakwe yao atasilamulwa yangasansamuka.

²¹ “Namwe mwe myamba ya Giliboa, ulumi lutakezye ukumukunga nanti sile imvula nayo kwene itakezye ukutonya mwenemo! Impanga nayo itakatale ikavunde, pano ali muno ivisyangu vya malumba itu vyasyala vikuliwa ni ngalawa, nga amuno ni cisyangu cakwe Saulo ciikala ukwaula kucipukuta na mafuta.

²² Ulapwa wakwe Yonatani utatazile uwele sile ukwaula ukusalipa. Ulupanga lwakwe Saulo lwakomanga icikalale, lula lukuwisya antu yamaka, ilukoma anisi.

²³ “Saulo na Yonatani, yene aakuzunguka nupya akundwe. Yene yatapalukine umu mfwa numu wikazi wao kwene. Yakweti ulwilo ukuluta yalyang'anda, ni vimaka ukuluta yacisama.

²⁴ “Mwe anaci amu Izlaeli, si mungalosya Saulo! Wene wamuzwikanga insalu izyamutengo nupya iziyenzulukile nu kuyemvya ivizwalo vinu na mapambo ayengese yakwe zaabu.

²⁵ “Iyee kalanda we, vino amalumba yafwa umu nkondo! Yonatani walala umufwe umu myamba.

²⁶ Nakulosya, we mwinane Yonatani. Silola vino nakutemilwe wakwe cimwi. Icitemwiko cako kunondi cali icakuzunguka. Calusile icitemwiko ca anaci.

²⁷ “Iye mwe vino amalumba yafwa, na vino ivyanzo vya nkondo vyatangana nu kupupana.”