2 Petulo 1 - Amazwi Yakwe Leza 2013

¹ Kalata kufuma kuli ne Simoni Petulo, muomvi nupya mutumwa wakwe Yesu Klistu. Kuli yao yano uwololoke wakwe Leza nupya Katuula witu Yesu Klistu walenga kuti yene pamwi naswe tupelwe utailo ucindame.

² Leza aye ni cikuku kunomuli, nupya amupeele mutende cuze kupitila mukumanya Leza na Yesu Mwene witu.

Leza Waama nu Kusolola Aina Klistu

³ Leza mu maka yakwe watupeela vyonsi vikalondekwa kuti mucumi twikale umi uwa kupepa. Cii cacitika apa kumanya kuno twamanya wiyo uwatwama kuti tukume ku lulumbi nga nu ku usuma wakwe.

⁴ Mu musango uu, wene watupeela upolelelo ukulu cuze uwamutengo ukome, uno walavile. Wene wacisile cii pakuti mutuulwe ku mbunu zyamu nsi zino zikaonona, nga lyene mukumeko ku mwata wakwe Leza.

⁵ Pamulandu kwene uu, ezyini kucita consi na maka inu kuti mungilizye usuma ku utailo. Ku usuma winu ungilizyini kumanya.

⁶ Ku kumanya kwinu ungilizyini kuikanya. Ku kuikanya kwinu ungilizyini kuposya. Ku kuposya kwinu ungilizyini kuipelesya ku umi wa kupepa Leza.

⁷ Ku kuipelesya ku umi wa kupepa Leza ungilizyini kutemwana kwa wina. Alino ku kutemwana kwa wina ungilizyini kutemwa antu onsi.

⁸ Vii vili vintu vino mulinzile kukwata. Ndi mwavulilwa vintu vii, vyene vilamulenga kuti mwaombesya na maka pa kumanya Mwene witu Yesu Klistu.

⁹ Lelo wino wensi atakwata vintu vii ala wene akoline wa muntu akalola ciyeye nupya wene wilila ukuti waswefiwa ku maifyo yakwe a mpiti.

¹⁰ Caleka, inane ezyini na maka kucita consi icingalanga ukuti Leza wamwama nupya wamusolola. Ndi mwatwalilila kucita cii, ale lyene mutalatala mupone mu utailo winu.

¹¹ Mu musango kwene uu, wene alamuyulila mulyango wakwingila mu Wene wa manda pe, uwa Mwene na Katuula witu Yesu Klistu.

¹² Acino lyonsi kwene nkaamwiusya vintu vii, nanti angala mwavimanya nu kwika utailo mu cumi cino mwapokelela.

¹³ Lyonsi lino ncili nu umi canzipila kuti ntwalilile kumwiusya vintu vii.

¹⁴ Manyile vino Mwene Yesu wanena mpiti ukuti ndasya mwili uu.

¹⁵ Uli mulandu uno nemo indi nukucita consi icingacitwa pakuti ndeke mwensi mwaiusya vintu vii na pacisila ca mfwa yane.

Yakambone ya lulumbi lwakwe Klistu

¹⁶ Kutali ukulaika utulai lino twamunenanga ivya maka nu kuwela kwa Mwene witu Yesu Klistu. Na manso itu twaweni ukulu wakwe.

¹⁷ Swemo apano twali lino Leza Tata wamucindamike nu kumupeela ululumbi. Pa nsita ilya izwi lyafumile kuli Leza uwa lulumbi lukulu, liti, “Wii Mwanane mukundwe. Munoli nkuzanga cuze!”

¹⁸ Sweisikulu tuvwile izwi lii kufuma mwiyulu, lino twali pamwi na aliwe pa mwamba wamuzilo.

¹⁹ Acino twasininkizya cuze ukuti ilandwe lino yakasema yakosozile lyene ilya cumi. Ndi mwasumba mano kunolili ale mwacita ningo, pano lyene likoline wi lampi lino likwaka nu kuyengesa mu cifulo cimwi mu mfinzi. Mulinzile kutwalilila kwikako mano kufika lino kwaca nga na lino namukokola watunka mu myenzo inu.

²⁰ Kuluta pali vyonsi mulinzile kumanya ukuti kusi umwi wino umwisikulu na lwakwe angalondolola usemo mu malembelo.

²¹ Pano kutaya ilandwe lya usemo ilyafuma ku kulonda kwa muntu. Lelo antu yatungulwilwe na Mupasi Wamuzilo lino yavwanganga ilandwe ilyafumile kuli Leza.