2 Kolinto 9 - Amazwi Yakwe Leza 2013

¹ Citakulondekwa kuti mulembele pamulandu wa kwazwa kuno mwapanga kupeela ku antu yakwe Leza amu Yudeya.

² Manyile vino mukulondesya kupeela. Acino nemo namaitumika ku alondezi ya Mwene amu Makedoniya kuti mwe antu amu Akaya mwaiteinye kufuma mwacizo. Ndakai kulondesya kwinu kwa kupeela kwalenga kuti nao kwene yalondesye kupeela.

³ Lelo ndakai natuma aina itu mu utailo kuno muli kuti kuitumika kwitu pali mwemwe kutaya ukwasilesile, na kuti muye aiteyanye, ndi vino nalavile. Cii cilasininkizya ukuti swemo tutaluvinye pa kuitumika pamulandu winu.

⁴ Pano antu yamwi aku Makedoniya ndi yangiza pamwi nani, nu kuzana ukuti musi aiteyanye. Cii cingatulenga insonyi pano twamupile mulimo uu kuti muombe. Lelo mwemo cingamulenga insonyi kuluta.

⁵ Acino nelenginye kuzya ina itu mu utailo kuti nkolelo iize kuno muli pakuti yangakwata kasita kakuteyanya kupoka impiya zino mwalavile. Lyene cilaloleka ukuti mukapela pano mukulondesya kupeela, lelo asi pamulandu wakupatikiziwa.

⁶ Mwiusye ukuti muntu wino akata imbezu zinono sile, wene alazombola vinono. Na wino akata imbezu zingi wene alazombola vingi.

⁷ Cila muntu alinzile kupeela kulingana na vino wataipingula umwisikulu kwaula kusiima nanti kupatikiziwa. Pano Leza watemwa muntu wino akapela ni nsansa.

⁸ Nupya Leza akweti maka akumupeela kuluta pali vino mukulonda, kuti lyonsi kwene mukwate kulingana na vino mukulonda nga nu kuluta pali vivyo pakuti mwaomba mulimo uwa kwazwa yauze.

⁹ Cili ndi vino calembwa mu malembelo cati, “Wene akapeela kuli yao aulilwa. Luse lwakwe ulwa manda pe.”

¹⁰ Leza wino akapela imbezu ku alimi nga ni vyakulya vyakuti yalye. Wene alamupeela imbezu zyonsi azisandulule nu kuvuzya uzombozi kuli yao aulilwa.

¹¹ Alamulenga kuya akama muli vyonsi kuti namwe mwapeela, pakuti antu aingi yataizya Leza pa mawila inu yano yakupokelela kufuma kuno tuli.

¹² Pano kutumikila kwinu kuu kusyaazwa sile antu yakwe Leza, lelo kukalenga kuti antu aingi yataizye Leza.

¹³ Na pa usininkizyo uno kutumikila kwinu kuu kukaleta, antu aingi yalapeela lulumbi kuli Leza pa kuyela kuno mwayela Ilandwe Lisuma lya pali Klistu, lino mwazumila, nga na pa kwankana pamwi nao vintu vinu nga na yauze.

¹⁴ Mu kutemwa kukulu yalamupepela pamulandu wa cikuku cakwe Leza cino wakwata kuno muli.

¹⁵ Lekini tutaizye Leza pa wila wakwe uwakuzunguka uno mazwi yatangalondolola!