2 Kolinto 7 - Amazwi Yakwe Leza 2013

¹ Mwe yacuza, Leza uwacita malayo yaa. Acino tulinzile kufumako ku vintu vyonsi vino vikakowezya mili nga ni mipasi itu. Acino pa koopa Leza twaezya kuya amuzilo.

Iuvi lyazanzya Paulo.

² Tupokelelini ni myenzo inu yonsi! Tutaifya umwi, tutatala umwi mulandu, nanti kucenjezya umwi.

³ Ntakulanda cii pakuti mupele mulandu. Lelo wakwe vino nalanzile nkolelo, mwemo tutalatala tumwilile lyonsi lino tuli nu umi nanti mu mfwa.

⁴ Mwemo namutaila cuze. Lyonsi nkaya ni cilumba pamulandu winu, nga nupya nkakomeleka cuze. Mu ntazi zyane zyonsi nemo ncili nu luzango.

⁵ Na lino twafisile mu Makedoniya tutakweti kupuza kumwi. Konsi kwali intazi, kulemanila na antu yauze nga ni ngofyo mu myenzo itu.

⁶ Lelo Leza akakomelezya antu atonte myenzo nupya watukomelizye lino watumile Tito kuno tuli.

⁷ Asi kwiza kwakwe Tito ukwatukomelizye sile, lelo na mazwi yano watunenyile pali vino mwamukomelizye. Wene watunenyile ukuti mwemo mukulondesya kulolana nani, na pa ulanda uno mukuuvwa nga nu kusakamala kuno mukweti pali nene ukwa kuncingilila. Na cii, candenzile kuya nu luzango lukulu.

⁸ Pano nanti angala kalata wane wamulenzile kuya nu ulanda, ntakuuvwa ui wakuti nalemvile. Nkolelo nuvwile ui lelo ndakai cisi vivyo. Manyile vino mazwi amuli kalata wiyo yamucisile panono.

⁹ Ndakai ndi nu luzango asi pamulandu wakumulenga kuvwa ulanda. Lelo apamulandu wakuti Leza waomvizye ulanda kwene uu, kuti aleke muzenzuke ku miyele inu. Caleka swemo tutacisile cimwi ciipe kuno muli.

¹⁰ Pano ulanda uno Leza akaomvya wene ukuleta ukuzenzuka kuno kukatungulula ku ufyusi. Caleka mutalinzile kuvwa ulanda pali cii. Pano kuvwa ulanda wakwe vino amu nsi yakacita kwene kukaleta imfwa.

¹¹ Mulole vino Leza wacita pa ulanda kwene uu, wamulenga kuya amukozya, nu kulenga musininkizye ukuti mwemwe yakaele, wamulenga kusoka, wamulenga kuvwa intete nu kulondesya kundola, wamulenga kuti muvunuke muntu pa kuluvyanya kwakwe. Vii vyonsi vikulanga paswe kuti mwemwe yakaele.

¹² Lino nalemvile kalata, asi pamulandu wakupeela mulandu kuli wiyo uwaluvyanyizye nanti kuvwangila muntu wino wifizye. Nalemvile kalata kuti Leza amulange paswe kusakamala kuno mwatusakamala.

¹³ Acino naswe twakomeleziwe cuze. Nu kuluta pa kukomeleziwa, catuzanzizye cuze pakulola vino Tito wali nu luzango pano mwensi mwamupile nsansa lino wali namwe.

¹⁴ Namunenyile vino nkailumba pali vino mwaya, nga namwe mutandenga kuya uwa nsonyi. Ndi vino lyonsi tukulanda cumi kuno muli, avino cili pali vino nanenyile Tito ivya pali mwemwe.

¹⁵ Acino Tito watemwisya mwensi kwene, maka maka ndi wiusya vino mwayelanga mazwi yakwe nga na vino mwazakazanga nu koopa lino mwamuzengile.

¹⁶ Mu cumi nemo ndi nu luzango pa kumanya vino ningemelela muno muli.