2 Kolinto 6 - Amazwi Yakwe Leza 2013

¹ Mu kuomba pamwi na Leza, lyene tukumupapata kuti mwapokelela cikuku cakwe Leza, mutaleka cikuku ciye caula mulimo.

² Leza walanda mu malembelo ati, “Lino kasita kasuma kakumwazwa kafisile, nuvwile kuno muli, nga na lino wanda wafisile uwakuti imutuule namwazwizye.” Uvwini! Ndakai kasita kasuma kakumwazwa. Uvwini! Ilelo wanda wa kutuulwa.

³ Swemo tusyakulonda umwi azane kuluvyanya mu mulimo witu, acino tukwezya na maka kuntaleta intazi.

⁴ Lelo mu vintu vyonsi vino tukacita tukalanga ukuti mu cumi sweswe aomvi yakwe Leza. Lyonsi tukateeka myenzo nu kuzizimizya nanti tukweti intazi zingi, ucuzi nga nu kutitikiziwa.

⁵ Tumwanga, twanyepwanga mu man'ganda ya minyololo nga nu kuciswa mu zya mpanzela. Twaombesyanga nupya tutalalanga tulo nanti kulya.

⁶ Tukailanga nupya ukuya aomvi yakwe Leza mu kuswepa kwa myenzo itu, mukumanya vya cumi, mu kuteeka myenzo, nu mukuya nu luse na Mupasi Wamuzilo, nga nu kutemwa kuno twakwata ukwa cumi,

⁷ tukalanda ivya cumi nga na maka yakwe Leza yaomba muno tuli. Tukaomvya vyanzo vya wololoke kwi kasa itu lunji ni limani kwene.

⁸ Antu yakatucindika nupya yakatusaalula. Tukatukwa nga nu kutasiwa. Antu yakati sweswe ya ufi, lelo swemo tukavwanga cumi.

⁹ Swemo tutamanyikwa kuli yauze, lelo twamanyikwa ningo kuno muli. Yakati tuli nu kufwa, lelo tucili nu umi. Antu yatuvunuka, lelo yatatukoma.

¹⁰ Yakati sweswe ya ulanda, lelo tukazanga lyonsi. Yakati sweswe apina, lelo tukalenga antu aingi kuya akama. Yakati tutakweti nanti cimwi, lelo tukweti vyonsi.

¹¹ Mwe yacuza amu Kolinto, tukalanda cumi lino tukamunena ukuti twayula myenzo itu kuno muli.

¹² Asi sweswe twayala myenzo kuno muli. Lelo mwemwe mwayala myenzo inu kuno tuli.

¹³ Ndakai nkulanda kuno muli ndi vino ningalanda ku ana yane kwene. Nkumupapata, yulini myenzo inu kuno tuli.

Kukanalemana na Antu Atataila

¹⁴ Fuminiko ku antu atataila! Uzye muntu musuma angalemana uli nu muntu mwipe? Uzye wololoke vingalemana uli nu ui? Uzye uluswepo ni mfinzi vingaya pamwi?

¹⁵ Uzye Klistu a cuza wakwe Satana? Uzye ataila Mwene yangalemana uli na antu atamutaila?

¹⁶ Uzye ng'anda yakwe Leza vingalemana uli nu tuluwi? Sweswe ng'anda ikulu yakwe Leza wa umi, ndi vino Leza umwisikulu walanda wati, “Ndikala pamwi na antu yaa nga nu kupita pakasi kao. Ndaya Leza wao, nao yalaya antu yane.”

¹⁷ Nupya Mwene wavwanga wati, “Yatini, nupya fuminiko kuno yali! Mutakumya cintu cikowele cili consi. Lyene ndamuzengela

¹⁸ nu kuya So. Namwe mulaya ana yane aonsi na yakaci, avino Mwene wa maka yonsi walanda.”