2 Kolinto 4 - Amazwi Yakwe Leza 2013

¹ Leza mu mizu yakwe watupela mulimo uu kuti twaomba. Acino tusyatonta.

² Swemo tusyacita vintu vya nsonyi vino vikacitwa mu nkama. Caleka tusyacita vya usomvi nanti kupililika Ilandwe lyakwe Leza. Leza ali kambone witu ukuti vino tukulanda vyene ivya cumi. Caleka antu yauze muli yakampingu yao yangasininkizya ukuti sweswe yakutailwa.

³ Ndi kuli cimwi cino cafiswa ica pamulandu wi Landwe lino tukakosola, ale cafiswa ku antu yano akulowa.

⁴ Yene yatataila, pano Satana wino ali leza uwa nsi ii, walesyanya kuti yatalola luswepo ululi Ilandwe Lisuma lya pali Klistu uwa lulumbi.

⁵ Kukosola kwitu kusi kwa pali sweswe, lelo tukakosola Ilandwe ukuti Klistu u Mwene. Naswe sweswe yaomvi inu sile pamulandu wakwe Klistu Yesu.

⁶ Calembwa mu malembelo cati, “Leza watile kuye luswepo, luyako.” Luswepo luyengesa mu mfinzi. Lyene ndakai Leza kwene wiyo akuyengesa mu myenzo itu kuti antu yamanye vino lulumbi lwakwe lukaloleka muli Yesu Klistu.

⁷ Swemo tukoline wa nyungu muno cuma cii casungwa. Maka ya umi yakafuma kuli Leza, asi kuno tuli.

⁸ Lingi tukacula, lelo tusitonta. Nanti ndi twatwisika tusyata kupaalila.

⁹ Tukazunyiwa, lelo tusitazyelwa. Nanti yatufwanta tusyacimba.

¹⁰ Lyonsi tukapita ni mfwa yakwe Klistu mu mili itu kuti umi wakwe waloleka mu mili itu.

¹¹ Swemo tuli aumi lelo pamulandu wakwe Klistu lyonsi twaya mu uzanzo wa mfwa. Pakuti umi wakwe Klistu waloleka mu mili itu ikafwa.

¹² Caleka swemo tukaya mu mfwa, lelo cikasenula kumupeela umi.

¹³ Calembwa mu malembelo cati, “Navwanzile pano nakweti utailo.” Naswe twakwata utailo uli onga na uwo. Caleka tukavwanga

¹⁴ pano twamanya ukuti Leza wino wazyukwile Mwene Yesu, naswe kwene alatuzyukula pamwi na Yesu nu kutufisya pa manso yakwe pamwi namwe.

¹⁵ Vii vyonsi vyacisilwe pamulandu winu, pakuti vino cikuku cikufika ku antu aingi vivyo kwene cikungilizya ntaizyo ku lulumbi lwakwe Leza.

Kukomeleka mu Utailo

¹⁶ Swemo tusyanenuka. Mili itu ikucucuka, lelo sweisikulu tukukomeleziwa mu myenzo cila wanda.

¹⁷ Macuzi itu angupale ansita inono, lelo yakatuletela lulumbi lukulu kuluta pa macuzi nupya ulwa pe.

¹⁸ Uli mulandu uno swemo tukaika mano pa vintu vino vikaloleka asi pa vintu vino visyaloleka. Vintu vino vikaloleka vyene visyaikalilila lelo vintu vino visyaloleka vyene ivya manda pe.