2 Kolinto 13 - Amazwi Yakwe Leza 2013

¹ Lii, lili iila lyalenga lyakwe itatu lino nkwiza ku kumutandalila. Ndi vino calembwa mu malembelo cati, “Kupelwa mulandu konsi kulinzile kusininkiziwe na yakambone yaili nanti yatatu.”

² Nemo nasokile yao aifizye nkolelo nga nayauze asyala, nupya nkuswilizya kuyasoka lino nsi pamwi nao ndi vinonayasokile lino nali nao pa kuyatandalila iila lyakwe cili, ukuti lino ndiza nupya ntalayapanya.

³ Cii cilinzile kuya cisininkizyo kuno muli ukuti Klistu akuvwangila munondi. Lino Klistu akumusunda wene atangaya nu utonte, lelo waya na maka cuze.

⁴ Nanti angala wali umutonte lino yamutanyile pa lupanda, ndakai ali nu umi kupitila mu maka yakwe Leza. Swemo tuli atonte ndi vino Klistu wali. Lelo mulalola ukuti swemo tulaya nu umi kupitila mu maka yakwe Leza, ndi vino Klistu ali.

⁵ Muyezye mweisikulu pakuti muilole ndi mu cumi mukwikala mu utailo. Lelo ndi Klistu asyaikala muno muli, ale lyene mwaposiwa.

⁶ Nkutaila vino mumamanya ukuti swemo tutaposiwa.

⁷ Swemo tukapepa kuli Leza kuti mwacita viipe. Asi kuti tuloleke kwati twacimvya, lelo kuti mwemo mutacita visuma, nanti angala cingaloleka kwati twaposiwa.

⁸ Tungacita cimwi cingacilikizya cumi, suka sile cingazwilizya cumi.

⁹ Nanti angala tuli nu utonte, tuli ni nsansa pano mwemwe yakome, nupya tukupepa kuti muye afumaluke.

¹⁰ Nkulemba vintu vii kuno muli lino ntali mfike kuno muli. Cili pamulandu wakuti nemo ntaya na kasokonda kuno muli apa kuomvya maka yano Mwene wampela. Napiilwe maka yaa pakuti nazwe mwemwe kuluta kuti monone.

¹¹ Ndakai, inane, nkuti tukateni! Mupikintike kuya afumaluke. Uvwini kupapata kwane. Ezyini kuzumilizyanya nga nu kwikala mu mutende pakasi kinu. Leza ali ntulo ya kutemwa nu mutende, aye namwe.

¹² Mulamukane nu kutonsolana kwa wina Klistu.

¹³ Antu yakwe Leza yonsi yamulamuka.

¹⁴ Cikuku ca Mwene witu Yesu Klistu, nu kutemwa kwakwe Leza, nu utandano wakwe Mupasi Wamuzilo viye namwe mwensi.