1 Timoti 1 - Amazwi Yakwe Leza 2013

¹ Kalata kufuma kuli ne Paulo, mutumwa wakwe Klistu Yesu, ne muno nasolwilwe na Leza, Katuula witu na Klistu Yesu wino tukapaalila.

² Kuli Timoti wino mu utailo witu ali wa mwana kunondi. Leza Tata nu Mwene witu Klistu Yesu akupeele cikuku, mizu, nu mutende.

Cenjelini pamulandu nu usambilizyo waufi

³ Nkulonda kuti wemo wikale mu Efeso, wakwe vino nakukonkomizye lino nayanga ku Makedoniya. Antu yamwi kuku yakusambilizya masambilizyo yaufi, acino nkulonda kuti uyalesye.

⁴ Uyanene kuti yate kulanda vilai ni mitande itali ya mazina ya vikolwe, vivyo vikaleta sile vikanza. Vii visyaazwa kuomba mulimo wakwe Leza, uno ukaombwa mu utailo.

⁵ Pano twimilila pa kunena antu kukwata kutemwa kuno kukafuma mu mwenzo uswepe, nu kwelenganya kusuma nu utailo uwa mpomvu.

⁶ Antu yamwi yasya vii yalondela vyakulanzyanya kwa uwelewele.

⁷ Yene yakalonda kuya yakasambilizya ya Masunde yakwe Leza, lelo yatamanya vino yakalandapo nanti cumi pano iimilila.

⁸ Twamanya ukuti Masunde yene asuma ndi cakuti yayaomvya umu nzila isuma.

⁹ Endi, tulinzile kwiusya ukuti Masunde yasipangilwa antu asuma, suka antu yakavuna yamasunde, yacipote, asyapepa na yakaifya, antu yankota ni nkomi, yano angakoma na akwasi yao kwene.

¹⁰ Masunde kwene yaa yapeelwa pamulandu wakwe yakalongozya na akaulungana na onsi yauze, akaiya antu, antumpu na akapeela umboni waufi nanti cintu cili consi cino citalingine nu usambilizyo usuma.

¹¹ Usambilizyo usuma ukazanwa mwi Landwe Lisuma lino Leza, uwa lulumbi nupya uwa kulumbanya wampile.

Kutaizya Leza pa mizu yakwe

¹² Nkataizya Klistu Yesu Mwene witu, wino uwampile maka akuomba mulimo uu. Nkumutaizya apa kumpenda kuya uwa kutailwa nu kunsolola kuti namutumikila.

¹³ Wene wacisile cii nanti angala mu manda apita cisila namuvwangile viipe, nu kumuzunya nga nu kumutuka. Lelo Leza wali na mizu kunondi pamulandu wakuti lilya ntakweti utailo nupya ntamanyile cino nacitanga.

¹⁴ Mwene witu wanguvwilile luse cuze. Nu luse kwene luu lusanda cuze nu kundetela utailo nu kutemwa muli Klistu.

¹⁵ Muvwango uu, uwa cumi wakuti, Klistu Yesu wizile muno nsi ku kutuula yakaifya. Nupya nene kaifya uwaluta onsi.

¹⁶ Lelo Leza wali na mizu kunondi pakuti Klistu Yesu alange kuteeka mwenzo kunondi ne kaifya uwaluta onsi, nupya ciye icilangililo kuli yao onsi, yano alataila munoli nu kupokelela umi wape.

¹⁷ Ndakai ku Mwene wape, wino asyafwa, asyaloleka, Leza wenga sile, kuye lulumbi nu ukulu, manda pe, Ameni.

¹⁸ We Timoti, uli wa mwana kunondi. Ilamulo lino nkukupeela limikwa pa mazwi ya usemo yano mpiti yavwanzilwe pamulandu wako. Omvya mazwi yaa wa vyanzo kuti ulwe ningo,

¹⁹ nupya sunga utailo wako nu kukwata mwenzo usuma. Antu yamwi yasyatontela yakampingu yao. Acino yene yonona utailo wao.

²⁰ Imeneo na Alekizanda, antu yaa oili amuli yao aonona utailo. Yaa nayapeela mu makasa yakwe Ciwa kuti yasambilile yate yatacivwanga mazwi ya misuli kuli Leza.