1 Samueli 5 - Amazwi Yakwe Leza 2013

¹ Pacisila lino aina Filisti yapoka Mbokosi ya Upangano yakwe Leza, iyaifumya ku Ebenezeli nga iyaitwala ku Asyidodi,

² mpaka nu kuingizya sile mu ng'anda ikulu yakwe Dagoni nga iyaipalamika ku unkolanya wakwe Dagoni.

³ Lino aina Asyidodi yakatuka akatondo akalondelela, iyazana Dagoni watapona pansi inkolelo ya Mbokosi ya Upangano wakwe Yawe ala afupime. Iyamukatusya nu kumuswilizya pa ncende yakwe.

⁴ Lelo katondo kauze akalondelela lino yakatuka, nupya kwene iyazana Dagoni watapona pansi inkolelo ya Mbokosi ya Upangano yakwe Yawe ale afupime! Umutwe wakwe Dagoni na makasa ala vyativitamoka, nupya ale vilambalile lwapa ciimbili nga ale kusile sile umwili.

⁵ Uli mulandu kwene uno yasimapepo yakwe Dagoni nanti antu yauze akaingila mu ng'anda ikulu yakwe Dagoni ku Asyidodi yasilyata pa ciimbili cakwe Dagoni.

⁶ Alino lyene Yawe avunuka aina Asyidodi wakwe cimwi nu kuleka yuvwe intete sana. Wene wayavunwike apakuyaponyezya ivipute kumwi na antu amu tumisumba tonsi utwazingulwike.

⁷ Lino aonsi amu Asyidodi yalola icikucitika, yavwanga iyati, “Leza wa ina Izlaeli akuvunuka sweswe nga na Dagoni leza witu. Mbokosi ya Upangano yakwe Yawe italinzile kwikalilila kuno.”

⁸ Acino iyakonganika intunguluzi zyonsi zya ina Filisti nga iyayuzya iyati, “Uzye tumacita cani ku Mbokosi ii iya Upangano yakwe Leza wa ina Izlaeli?” Nayo iyaasuka iyati, “Tumini akuti yaitwale ku Gati.” Acino iyatwala Mbokosi ilya ku Gati.

⁹ Lelo pacisila lino yaitwala kuku, Yawe nawe avunuka aikazi amu musumba ulya, ance na ikolo kwene, ayaponyezya ivipute.

¹⁰ Acino iyatuma Mbokosi ilya iya Upangano yakwe Leza ku Ekiloni. Lino yakwingizya Mbokosi ilya mu musumba wa Ekiloni, aikazi ya mwenemo iyapunda iyati, “Yatuletela Mbokosi ya Upangano yakwe Leza wa ina Izlaeli kuno pakuti yatukome kumwi na antu itu!”

¹¹ Acino nupya kwene iyakonganika intunguluzi zyonsi izya ina Filisti nga yavwanga iyati, “Fumini Mbokosi ii iya Upangano yakwe Leza wa ina Izlaeli nga muiswilizye kuno mwaifumizye, pakuti itatukoma pamwi na antu itu.” Pasi pano lyene calesile intete izikalamba sana pamulandu ni imfwa izyacitikanga mu musumba ulya.

¹² Na yao apuswike ku kukanafwa yalwile ivipute, nga na antu yakuta kuli yaleza yao kuti yayatuule.